ZAJ NYEEM HNUB TIM 18 LUB 9 HLI 2025
HNUB TSIB, LIS PIAM 24 CAIJ NYOB NRUAB XYOO
COV LUS NYOB HAUV LUS KAS NTAWV MOO ZOO (LK 7: 36-50)
Kwv tij sawv daws, Leej Ntshiab Paj Lug hais rau tsoom ntseeg tias, lawv yuav tau txais kev dim yog lawv ntseeg raws li phau Ntawv ntshiab tias ; Huab Tais Yus Xus Pleev tau tuag vim peb cov txhaum, Huab Tais raug faus cia hauv lub qhov tsua, thiab hnub Huab Tais tau sawv rov los, raws li Ntawv Ntshiab tau piav tseg.
Nyob rau hauv lub Moo Zoo hnub no, peb pom tias, Huab Tais Yes Xus tuaj cawm cov neeg txhaum, tsis hais txiv neej los poj niam, tiam sis nyob rau hauv Yes Xus tiam neeg ntawd, cov txiv neej feem coob, lawv saib cov poj niam qis qis, lawv tsis pom lawv tus kheej, lawv tsis pom lawv qhov txhaum, lawv xav tias lawv zoo txhij zoo txhua lawm. Tus Fas Lis Xais uas hnub no nws caw Huab Tais Yes Xus tuaj hauv nws tsev, nws kuj zoo ib yam li ntawd, nws xav tias nws yog ib tug Fas Lis Xais, los yog ib xib hwb, nws xav tias, nws yog neeg zoo txhij zoo txhua lawm, nws xav tias nws lub hwj chim loj sib txig nrog Huab Tais Yes Xus, los yog tseem loj dua Yes Xus, vim nws yog ib tug Fas Lis Xais nplua nuj, nws muaj vaj tse loj dav, li ntawd, nws tsuas ntsia Yes Xus yog zoo li ib tug xib hwb xwb, los ib tug yaj saub xwb, nws tsis tau xav tias Yes Xus yog Tswv Ntuj Leej Tub. Li ntawd, hnub no, nws kev tos txais Yes Xus kuj zoo yam li nws tos txais tej qhua nom qhua tswv xwb.
Hos tus poj niam uas luag hais tias, nws yog neeg txhaum, thaum nws hnov tias Yes Xus yuav tuaj xwb, nws twb mus npaj tshuaj tswv qab tos lawm, thaum nws pom Yes Xus chaw los hauv tus Fas Lis Xais lub tsev, uas yog ib lub tsev loj dav, nws chaws los sawv ze Yes Xus, nws quaj tu siab rau nws cov txhaum, nws lub kua muag ntws los ntub Yes Xus ko taw, nws muab nws cov plaub hau so thiab muab tshuaj tswv qab pleev. Huab Tais Yes Xus hais tias “Koj cov txhaum raug daws tas lawm, vim koj lub siab ntseeg cawm koj lawm. Koj rov mus nyob kiab siab lug mog.” Tus poj niam ntawd, cov txhaum tau raug daws tas, vim nws txawj tu siab rau nws txoj kev txhaum, thiab nws muaj lub siab hlub. Hos tus Fas Lis Xais nws tos txais Yes Xus zoo kawg, raws ntiaj teb neeg txoj kev xav, tiam sis, nws tsis ntseeg ces nws cov txhaum tseem nyob.
Neeg sawv daws xav tias, Yes Xus yog leej twg? Vim li cas nws muaj cai daws tau tib neeg tej kev txhaum, ces lo lus teb kuj yog tias yog vim Yes Xus yog Tswv Ntuj Leej Tub, thiab nws yog Tswv Ntuj, nws siv nws lub hwj chim uas yog Tswv Ntuj los daws txhaum rau neeg. Yog tus neeg uas muaj lub siab ntseeg thiab txawj hlub luag, ces nws yuav tau txais kev zam txhaum. Hos tus neeg uas nws ntsia tsis pom nws qhov txhaum, thiab tsis kam lees txais Yes Xus ua nws tus Tswv, ces nws cov txhaum yuav tsis raug daws.
Nyob zoo sawv daws.
