ZAJ NYEEM HNUB TIM 19 LUB 6 HLI 2026
HNUB NCO TXOG LEEJ NTSHIAB LOS MUS AS DOS
COV LUS NYOB HAUV MAS TAIS NTAWV MOO ZOO (MT 6: 19-23)
Kwv tij Hmoob, lub Moo Zoo hnub no yog Huab Tais Yes Xus qhia kom peb hloov lub tswv yim dua tshiab los saib tias yam tseem ceeb thiab muaj nqis tshaj rau peb tsis yog nyiaj txiag, tab sis yog lub neej sab ntsuj plig. Huab Tais Yes Xus hais tias “Nej txhob sau tej cuab tam nyob ntiaj teb no. Nej yuav sau tej txhab cuab tam nyob saum ntuj.”
Txhab cuab tam nyob ntiaj teb no yuav tsis nyob ruaj mus li, hnub no muaj tag kis ploj. Txhab cuab tam nyob saum ntuj yuav nyob mus li.
Txhab cuab tam nyob ntiaj teb no yam li nyiaj txiag, suab npe, meej mom. Txhab cuab tam nyob saum ntujyam li kev nyiam, kev hlub, kev sib pab, kev sib nres, kev ua qhov zoo. Cov cuab tam no pab tau peb lub neej sab ntsuj plig kom yuj plaws rau Tswv Ntuj.
Huab Tais Yes Xus tseem hais ntxiv tias “Nej txhab cuab tam nyob qhov twg, nej lub siab kuj yuav nyob qhov ntawd.” Yam li yog peb muab lub nej dai ncuv rau nyiaj txiag, mas peb niaj hnub muab tas lub sij hawm mus nrhiav nyiaj, peb lub hlwb tsuas khiav ntsoov txog nyiaj txiag xwb, ces peb tsis tshuav nco txog lwm yam. Yog peb muab lub neej dai rau Tswv Ntuj, mas niaj hnub peb yuav xub nco txog Tswv Ntuj ua ntej, peb ua dab tsi los peb yuav xub vam txog Tswv Ntuj, peb qee lub sij hawm rau tau thov Ntuj, teev Ntuj.
Yog peb muab saib cuab tam nyob ntiaj teb no muaj nqis dua lub neej sab ntsuj plig, mas yog zoo li peb lub qhov muag muaj mob, qhov pom kev nyob hauv peb tsaus ntuj nti lawm. Yog peb xav kom peb qhov muag rov pom kev dua, mas peb yuav muab siab rau saib peb lub neej sab ntsuj plig xws li Huab Tais Yes Xus qhia rau peb.
Nyob zoo sawv daws.
