ZAJ NYEEM HNUB TIM 2 LUB 4 HLIS 2025
HNUB PLAUB LIS PIAM 4 CAIJ PLAUB CAUG (Z 5: 17-30)
Kwv tij Hmoob sawv daws, txhua zaus Huab Tais Yes Xus kho neeg nyob hauv hnub xas npas tos, mas cov Yus Das hais tias Huab Tais Yes Xus hlas Mais Xes txoj cai, Huab Tais Yes Xus tsis ua raws Tswv Ntuj cov lus qhia. Tab sis hnub no tus Hauv Paus Xa Lus Zam tab meeg hais tias cov Yus Das xav muab Huab Tais Yes Xus tua vim Huab Tais Yes Xus hu Tswv Ntuj ua Txiv; yog Huab Tais Yes Xus tsa nws loj ib yam li Tswv Ntuj, Huab Tais Yes Xus rov saib nws yog Tswv Ntuj. Cov Yus Das tshwj xeeb cov Fas Lis Xais mas lawv txais tsi tau.
Kwv tij, Huab Tais Yes Xus qhia peb hu Tswv Ntuj ua Txiv. Huab Tais Yes Xus kuj qhia peb tias nws yog Leej Tub. Huab Tais Leej Txiv thiab Huab Tais Leej Tub koom ua ib tug Tswv Ntuj, ces txhua yam Huab Tais Yes Xus ua thiaj yog tuaj ntawm Tswv Ntuj tuaj, txhua lo lus tawm ntawm Huab Tais Yes Xus lub ncauj los thiaj yog Tswv Ntuj hais. Leej twg pom Huab Tais Yes Xus mas nws pom Tswv Ntuj, leej twg hwm Huab Tais Yes Xus mas kuj yog nws hwm Tswv Ntuj. Leej twg mloog Huab Tais Yes Xus mas yog nws mloog Tswv Ntuj, leej twg ua raws li Huab Tais Yes Xus qhia mas yog nws ua xis Tswv Ntuj siab.
Vim Huab Tais Leej Txiv thiab Huab Tais Yes Xus koom ua ib tug Tswv Ntuj ces peb thiaj pom Tswv Ntuj kev nyiam peb nyob hauv Huab Tais Yes Xus cov hauj lwm.
Thaum peb txais Cim Ntxuav, peb tau koom yug dua tshiab nyob hauv Tswv Ntuj. Li ntawd, peb thiaj yuav tau nyiam luag tej ib yam li Tswv Ntuj nyiam peb, peb thiaj yuav tau ua cov hauj lwm zoo kom luag pom Tswv Ntuj kev nyiam.
Hnub no peb puas tau ua cov hauj lwm ua tim khawv tias Tswv Ntuj nyob hauv peb. Nyob zoo.
