ZAJ NYEEM HNUB TIM 2 LUB 6 HLI 2026
HNUB NCO TXOG LEEJ NTSHIAB MAS XES LIS NUS THIAB POB ZEB
COV LUS NYOB HAUV MAS KOS NTAWV MOO ZOO (MK 12: 13-17)
Kwv tij Hmoob, nyob hauv Huab Tais Ntuj Lo Lus Qhia hais tias “Koj yuav teev Huab Tais Ntuj ib tug xwb, thiab koj yuav nyiam Huab Tais Ntuj tshaj tas puas tsav yam.” Li ntawd, cov Yus Das ib txhia thiaj li xav tias thaum lawv them se rau cov vaj kav ntiaj teb no xws li cov Los Mas tus vaj Xes Ntxas, mas yog lawv tab tom hla Huab Tais Ntuj Lo Lus Qhia no; tus lawv tsim nyog cev nyiaj rau kawg yog Tswv Ntuj xwb. Cov Fas Lis Xais thiab cov Hes Los Dias xav muab qhov no los ua chaw rau lawv tau kom Huab Tais Yes Xus, mas lawv thiaj li txhob txwm nug Huab Tais Yes Xus tias puas tsim nyog them se rau Xes Ntxas.
Huab Tais Yes Xus teb li cas?
Huab Tais Yes Xus hais tias nyob ntawm lub txiaj nyiag, muaj Xes Ntxas tus duab, yog li mas txhais tau tias cov nyiaj no yog Xes Ntxas li, ces lawv kuj tsum muab ua se them rau Xes Ntxas. Huab Tais Yes Xus hais ntxiv tias “Yam twg yog Tswv Ntuj tug, mas nej muab rau Tswv Ntuj.”
Lo lus no zoo rau peb coj los xav tswv yim ntuas siab. Raws li peb ib txwm paub, Ntawv Ntshiab qhia tias Tswv Ntuj tsim neeg kom muaj ntsis zoo xws li Tswv Ntuj tus duab. Txhais tias peb muaj Tswv Ntuj tus duab nyob hauv peb ib yam li lub txiaj nyiag muaj Xes Ntxas tus duab nyob saud. Li ntawd, peb txhua tus thiaj li yog Tswv Ntuj tug, peb thiaj yuav tau muab peb rau Tswv Ntuj.
Ib yam ntxiv, tshwj xeeb rau peb cov tau txais lub Cim Ntxuav ua neeg ntseeg, yog Tswv ntuj tau ntaus thwj rau peb tus ntsuj plig lawm tias tab txawm peb muaj txoj sia los tuag lawm, peb tus plig yog Tswv Ntuj tug mus li. Tswv Ntuj yog peb tus plig tus tswv. Yog li mas tas peb sid peb thiaj yog Tswv Ntuj tug lawm.
Kwv tij, peb paub li no lawm, tsim nyog peb yuav ua neej mus raws li Huab Tais Yes Xus cov lus qhia, mas txog qhov kawg, peb thiaj rov tau mus cuag Tswv Ntuj. Peb tsis txhob muab peb lub cev thiab peb tus plig pov rau hauv dab phem tes.
Nyob zoo sawv daws.
