Zaj nyeem hnub tim 20 lub 3 hlis 2026
Hnub Rau, Lis Piam 4 caij Plaub Caug
Cov lus nyob hauv Zam Ntawv Moo Zoo (Z 7: 1-2, 10, 25-30)
Kwv tij sawv daws, nyob rau hauv zaj no piav txog lub caij cov His Xas Lais lawv nqaum paj nqaum nruas tsa tsev tsam phooj, lawv ua cov kab ke no nco txog lub caij Tswv Ntuj tau cawm lawv thiab foom koob hmoov rau lawv, kom lawv muaj noj muaj haus, ces txog lub caij nplej siav, thiab lawv sau qoob loo, lawv yuav coj los cev ua Tswv Ntuj tsaug. Lub caij no thiaj yog ib lub caij tseem ceeb nyob rau hauv haiv Yus Das.
Thaum ntawd, Huab Tais Yes Xus thiaj nrog cov Thwj Tim nce mus pem Yes Lus Xas Les. Huab Tais Yes Xus mus ntsiag to, nws kuj tsis xav kom muaj neeg paub, vim nyob rau pem lub nroog Yes Lus Xas Les muaj cov Yus Das uas lawv nrhiav kev muab Yes Xus tua, vim lawv yog ib co neeg tsis hwm Ntuj, lawv muab txoj cai los yuam neeg, lawv ntxub cov neeg ncaj, lawv hiam tus neeg zoo. Lawv tsa cai rau cov nom tswv thiab cov nplua nuj. Yog vim Huab Tais Yes Xus qhia qhov tseeb thiab hais qhov ncaj mas tsis haum lawv lub siab, thiab tsis haum lawv txoj cai, ces lawv thiaj ntxub Huab Tais Yes Xus, lawv thiaj nrhiav kev tua Yes Xus. Tab sis, Huab Tais lub caij nyoog los tsis tau txog, ces lawv kuj ua tsis tau li cas rau Huab Tais Yes Xus thiab.
Kwv tij sawv daws, nyob rau hauv zaj no lub ntsiab kuj yog qhia kom peb yuav tsum mloog Tswv Ntuj ntau dua mloog peb lub siab, peb txhob ntxub ntxaug cov neeg ncaj, peb txhob muab txoj cai los saib hlob dua txoj kev zoo, peb tsis txhob hiam leej twg.
Nyob zoo sawv daws.
