ZAJ NYEEM HNUB TIM 20 LUB 5 HLIS 2025
HNUB NCO TXOG LEEJ NTSHIAB NPES NAS DIS NOS NYOB XIS AS NAS
COV LUS NYOB HAUV ZAM NTAWV MOO ZOO (Z 14: 27-31)
Kwv tij Hmoob, Huab Tais Yes Xus cov lus peb tau hnov nyob hauv lub Moo Zoo hnub no, yog cov lus Huab Tais Yes Xus hais rau cov thwj tim nyob hauv hmo lawv noj Pluas Hla. Hmo ntawd, yog nej nco tau mas Huab Tais Yes Xus qhia rau cov thwj tim tias yuav muaj ib tug hauv lawv ntxeev siab rau nws thiab muab nws cob rau cov phem, ces qhov kawg nws yuav ncaim ntawm sawv daws mus. Hmo ntawd, Huab Tais Yes Xus kuj qhia tias cov thwj tim yuav tso nws pov tseg, Pob Zeb yuav tsis kam lees nws txog 3 zaug.
Thaum cov thwj tim hnov cov lus no mas lawv ntxhov siab kawg, lawv tsis paub yuav ua li cas ntxiv. Huab Tais Yes Xus thiaj hais cov lus hnub no los nplij lawv tias “Kuv tso txoj kev thaj yeeb rau nej, yog kuv txoj kev thaj yeeb. Kuv tsis pub txoj kev thaj yeeb xws li lub qab ntuj neeg pub. Nej tsis txhob ntxhov siab, tsis txhob ntshai.”
Kwv tij, tus ntxhov siab tshaj sawv daws, yog Huab Tais Yes Xus. Nej muab xav saib, yog nej paub tias ib tug phooj ywg nej nyiam tshaj yuav rov ntxeev siab tig los ua phem rau nej. Nej xav pauj rau nws tiam sis nej ua tsis tau vim nej nyiam nws dhau, mas nej los nws tus twg yuav yog tus ntxhov siab dua?
Huab Tais Yes Xus ntxhov siab npaum ntawd, tsis kav nws tseem hais tau tias “Kuv muab kev thaj yeeb rau nej.” Kev thaj yeeb Huab Tais Yes Xus muab yog ‘kev kaj siab’ vim nws yeem sawv los nres qhov ntxhov siab kom tau yeej. Huab Tais Yes Xus kev thaj yeeb thiaj txawv qab ntuj neeg kev thaj yeeb vim neeg xav tias lawv lub siab yuav kaj tau yog thaum lawv tso tes khiav kom deb yam ua kom ntxhov siab.
Piv li peb paub tias tus phooj ywg yuav ua phem rau peb, ces peb yeem tsis mus ntsib nws kom txhob raug nws ua phem. Thaum ntawd, peb kaj siab, peb nyob thaj yeeb. Yog peb yeem cia tus phooj ywg ua phem rau peb, peb raug kev mob siab, tu siab tiag; tab sis qhov ntawd yuav pab tau kom peb tus phooj ywg ntsia pom nws qhov txhaum. Peb ntsia li ntawd, ces peb siab kaj.
Nyob hauv peb lub neej, muaj ntau yam xwv txheej tuaj nphav peb, yog peb khiav mus li mas peb puas yuav tau kev thaj yeeb, los peb sawv los nres los daws yuav tau kev thaj yeeb dua? Yog li mas Huab Tais Yes Xus thiaj hais tias “Kuv tsis pub txoj kev thaj yeeb xws li lub qab ntuj neeg pub.”
Kwv tij, cov thwj tim kev ntxhov siab yuav hloov ua kev kaj siab, lawv yuav txais kev thaj yeeb yog thaum lawv rov pom Huab Tais Yes Xus sawv rov los, ces Huab Tais Yes Xus thiaj hais rau cov thwj tim tab tom ntxhov siab tias “Kuv mus, tab sis kuv yuav rov los cuag nej. Yog nej nyiam kuv, mas nej yuav zoo siab cia kuv mus cuag Leej Txiv.” Li ntawd, nyob hauv Vaj Qhia Fas Ntshis Kus txoj kev tuag hauv hnub tim 21 lub 4 hlis tas los no, peb thiaj pom tias tas lub Koom Txoos tu siab vim sawv daws plam ib tug thawj coj zoo nyiam. Tab sis nyob hauv kev tu siab ntawd, peb muaj kev zoo siab vim peb tus Vaj Qhia hla dhau nws kev txom nyem mus txais txoj sia nyob mus li ntawm peb tus Huab Tais Tswv Ntuj lawm. Peb pom li ntawd, ces nyob hauv peb siab muaj kev thaj yeeb, peb ua siab kaj. Nyob zoo sawv daws.
