ZAJ NYEEM HNUB TIM 22 LUB 2 HLIS 2024
HNUB NCO TXOG LEEJ NTSHIAB POV LIS
COV LUS NYOB HAUV MAS TAIS NTAWV MOO ZOO (MT 5: 20-26)
Kwv tij Hmoob sawv daws, Huab Tais Yes Xus ntuas peb kom ua siab ncaj dua cov Kws Ntawv Ntshiab thiab cov Fas Lis Xais mas pej thiaj yuav mus tau hauv Ntuj lub Ceeb Tsheej.
Cov Kws Ntawv Ntshiab thiab cov Fas Lis Xais uas Huab Tais Yes Xus hais txog mas lawv ua ncaj rau sawv daws pom tab sis lawv lub siab nkhaus, lawv hais ib yam tab sis ua ib yam, lawv coj Txoj Cai tab sis lawv tsis ua raws txoj cai; lawv tsuas ua kom sawv daws pom ces sawv daws qhuas txog lawv xwb. Huab Tais Yes Xus hais tias cov neeg ua zoo li no yog cov neeg zoosab nraud.
Hnub no Huab Tais Yes Xus kom peb txhob ua zoo li ntawd. Huab Tais Yes Xus xav kom peb ua ncaj tawm plaws hauv nruab siab los, peb hais li cas mas ua li ntawd, peb txhob lam ua kom sawv daws pom ces sawv daws qhuas. Yog peb lub ncauj hais tias ‘kuv nyiam koj’, los yog hais tias ‘kuv zam txim rau koj’, tab sis hauv peb siab tseem ntxub tus neeg ntawd, chim rau nws, npau taws rau nws, tsis kam zam hauv nruab siab; mas hais tsis tau tias peb yog neeg ncaj.
Hnub no Huab Tais Yes Xus hais meej kawg tias “Thaum kojcev ib co txim rau saum lub thaj txi Ntuj, yog koj nco dheev tias koj tus kwv tau muaj lus rau koj lawm; mas koj cia li tso koj cov txim rau ntawm lub thaj txi Ntuj, koj mus nrog koj tus kwv hais kom haum tso, koj mam rov los cev koj cov txim. Thaum koj nrog tus neeg ntxub koj tseem ua ke mus kev, koj kav tsij nrog nws hais kom haum, tsam nws muab koj mus kom rau tus txiav txim, ces tus txiav txim yuav muab koj cob rau tub ceev xwm kom muab koj kaw hauv tsev loj faj.”
Kwv tij Hmoob, Huab Tais Yes Xus cov lus no yog kom peb sib zam txim, yog kom peb tsim kev haum xeeb nyob hauv peb lub neej, yog kom peb sis nyiam sis hlub. Peb ua li no mas txog hnub peb tso lub ntiaj teb tseg, peb thiaj tsis zoo li tus neeg raug kaw hauv tsev loj faj. Li ntawd, nyob hauv lub caij Plaub Caug no, thov kom peb cov kwv tij Hmoob sawv daws hloov lub siab tshiab, tig los sib zam txim,ua neej nyob hauv kev sis nyiam sis hlub mog.
Nyob zoo sawv daws.
