ZAJ NYEEM HNUB TIM 23 LUB 9 HLI 2025
HNUB NCO TXOG LEEJ NTSHIAB PIS OS
COV LUS NYOB HAUV LUS KAS NTAWV MOO ZOO (LK 8: 19-21)
Kwv tij sawv daws, nyob rau hauv zaj no Huab Tais Yes Xus hais meej tias “Kuv niam thiab kuv cov kwv tij yog cov uas mloog Tswv Ntuj Lo Lus thiab lawv ua raws li Tswv Ntuj Lo Lus.”
Cov ntsiab lus nyob rau hauv zaj no, tsis yog Yes Xus tsis lees nws niam thiab nws cov kwv tij, tiam sis, Yes Xus xav qhia peb tias, nws lees peb sawv daws, los koom ua nws kwv nws tij, yog cov uas muaj lub siab ntseeg thiab ua raws li Tswv Ntuj cov lus qhia.
Kwv tij sawv daws, Huab Tais Yes Xus yog Tswv Ntuj Leej Tub, nws yog peb tus Huab Tais, nws txo nws lub hwj chim, nws lees peb ua nws kwv nws tij. Yog peb muab ua tib zoo xav, mas yog ib txoj kev nyiam kev hlub uas loj kawg kiag, uas Huab Tais Yes Xus nyiam thiab hlub peb, yog li ntawd, ua cas peb thiaj yuav tsis lees Huab Tais Yes Xus. Peb tsis tau koom niam koom txiv, koom roj koom ntshav nrog Huab Tais Yes Xus, tiam sis, nws kam lees peb ua nws kwv nws tij, li ntawd, peb kuj yuav tsum sib lees los ua kwv ua tij nyob rau hauv peb lub Koom Txoos, vim peb sawv daws, yog Yes Xus cov kwv tij.
Nyob zoo sawv daws.
