Zaj nyeem hnub tim 24 lub 6 hli 2026 (Hnub hwm tus ntxuav plig Zam yug los).
ZAJ NYEEM HNUB TIM 24 LUB 6 HLI 2026
HNUB HWM TUS NTXUAV PLIG ZAM YUG LOS
COV LUS NYOB HAUV LUS KAS NTAWV MOO ZOO (LK 1: 57-66, 80)
Kwv tij Hmoob, hnub no lub Koom Txoos Kav Tos Liv hwm Zam Ntxuav Plig yug los. Dhau ntawm hnub no lawm tseem tshuav ib hnub ntxiv, yog hnub tim 29 lub 8 hli uas yog hnub Zam Ntxuav Plig tuag. Tos lub Koom Txoos tshwj hnub no ua hnub Zam Ntxuav Plig yug vim Ntawv Moo Zoo qhia peb tias hnub niam Mab Liab zoo siab hlo cia Huab Tais Yes Xus xeeb hauv nws lub cev, mas thaum ntawd Es Lis Xas Npes xeeb Zam tau 6 hli lawm. Yog li Zam thiaj hlob Huab Tais Yes Xus 6 hli. Lub Koom Txoos muab hnub tim 24 lub 12 hlis ua hmo Huab Tais Yes Xus yug, yog li Zam thiaj tsum xub yug ua ntej Huab Tais Yes Xus 6 hli, yog ncaj rau hnub no.
Lub Moo Zoo hnub no thiaj yog zaj xwm piav txog thaum Zam yug los, nws txiv thiab nws niam muab nws hu ua Zam txhais tias ‘Tswv Ntuj hlub’ los yog ‘Tswv Ntuj khuv leej’. Vim Tswv Ntuj pom tias Ntxas Kas Lias thiab Es Lis Xas Npes nkawd yog neeg ncaj nyob ntawm Tswv Ntuj xub ntiag thiab nkawd laus lawm tseem tsis muaj me nyuam, mas Tswv Ntuj hlub nkawd, nws thiaj pub tus me nyuam Zam rau nkawd. Tsis tas li ntawd, vim Tswv Ntuj hlub Tswv Ntuj haiv neeg, mas Tswv Ntuj thiaj tso Zam los ua tus npaj Tswv Ntuj haiv neeg kom txais tau Tswv Ntuj kev cawm uas yog Huab Tais Yes Xus.
Hnub no peb hwm Zam Ntxuav Plig yug los, mas thiaj yog ib hnub zoo rau peb rov nco txog Tswv Ntuj lub siab nyiam peb, nws hlub peb mas nws thiaj cia Zam ua tus rhawv kev rau peb tau tuaj ntsib Huab Tais Yes Xus. Peb yuav ua Tswv Ntuj tsaug thiab vam txog Zam Ntxuav Plig pab peb thov Tswv Ntuj pub kev zoo siab rau peb thiab pub Leej Ntuj Plig ua tus coj peb kev kom peb loj hlob nyob hauv Tswv Ntuj lub txiaj ntsim.
Nyob zoo sawv daws.
