ZAJ NYEEM HNUB TIM 28 LUB 12 HLIS 2025
HNUB HWM YIM NEEG NTSHIAB
COV LUS NYOB HAUV MAS TAIS NTAWV MOO ZOO (MT 2: 13-15, 19-23)
Cov kwv tij hmoob sawv daws, hnub no peb hwm Yim Neeg Ntshiab. Yim Neeg Ntshiab uas yog Yos Xes, Mab Liab, thiab Yes Xus. Thov kom peb twm txog lub Moo Zoo hnub no kom zoo. Vim tias yim neeg ntshiab no yog piv txwv zoo tshaj plaws rau peb yim neeg thiab.
Mas Tais qhia tias thaum cov kws hnub qub rov qab mus lawm, Yos Xes yuav tsum coj tus me nyuam Yes Xus thiab Niam Mab Liab khiav mus nyob Hais Nkws Tos teb vim lawv peb leeg ntshai Hes Los yuav tua tus me nyuam. Lawv lub neej hauv txoj kev mus nyob pej kum teb tsis yooj yim kiag li. Yos Xes thiab Mab Liab yuav tsum saib xyuas tus me nyuam Yes Xus kom zoo vim nws tseem me me xwb thiab hauv txoj kev mus txog Hais Kws Tos teb kuj muaj xwv txheej ntau yam. Saib ntawm nkawd ob leeg niam thiab txiv, Mab Liab thiab Yos Xes, nkawd ntsib teeb meem ntau ntau yam, thiab sis, peb tsis hnov Yos Xes thiab Mab Liab yws los tsis txaus siab rau Tswv Ntuj ntawm qhov lawv tau ntsib hauv lawv lub neej. Qhov peb pom meej yog kev cia siab rau Tswv Ntuj. Nyob hauv txoj kev mus nyob lwm lub teb chaws, Tswv Ntuj yog tus coj lawv mus ua ntej. Yos Xes tso siab rau Tswv Ntuj kom Tswv Ntuj coj nws yim neeg mus. Yos Xes kuj tsis paub yuav muaj dab tsi tshwm sim hauv txoj kev, lawv yuav tsib teeb meem los xwv txheej dab tsi, nws tsis paub li. Niam Mab Liab kuj zoo ib yam thiab. Nws tsis paub Yos Xes yuav coj nws thiab tus me nyuam mus nyob qhov twg thiaj dim ntawm kev xwv txheej. Taim sis, niam Mab Liab tso siab rau Yos Xes, nws tus txiv.
Kwv tij zoo nyiam sawv daws, hnub no, muaj ob yam kuv xav caw peb kom twm txog. Yam tim ib tso siab rau Tswv Ntuj, kom Tswv Ntuj coj peb lub neej. Zoo xws li Yos Xes mloog Tswv Ntuj lo lus, nws kam Tswv Ntuj tshoj nws lub siab thiab coj nws mus taug hauv txoj kev, nws tso kom Tswv Ntuj coj nws lub neej. Peb lub neej mas kuj zoo ib yam thiab. Peb yuav tsum tso kom Tswv Ntuj coj peb lub neej. Tso siab rau Tswv Ntuj.
Yam tim ob, thov kom niam thiab txiv, tub thiab ntxhai sib cia siab, tso siab ua ke hauv yus yim neeg tsev neeg zoo li niam Mab Liab tso siab rau Yos Xes tias Yos Xes yuav coj nws thiab tus me nyuam Yes Xus mus hauv txoj kev zoo, dim ntawm kev xwv txheej. Hauv peb tsev neeg, peb yuav tsum sib nyiam sib hlub, sib nkag siab, txawj sib tham sib faib. Muaj teeb meem dab tsi, yuav tsum sib tham zoo zoo.
Ob yam no: tso siab rau Tswv Ntuj, kom Tswv Ntuj coj yus lub neej, thiab tso siab rau yus yim neeg, mas peb kuj yuav tsis ntshai dab tsi li. Txawm tias muaj teeb meem los xwv txheej dab tsi hauv yus txoj kev, yog yus muaj ob yam no, yus kuj yuav mus dhau tau, yus kuj yuav dim tau.
