Zaj nyeem hnub tim 28 lub 2 hlis 2026
Hnub Xya, Lis Piam 1 caij plaub Caug
Cov lus nyob hauv Mas Tais Ntawv Moo Zoo (MT 5: 43-48)
Kwv tij sawv daws, lub Moo Zoo hnub no qhia kom peb pom txog Tswv Ntuj lub siab nyiam, kom peb txawj nyiam cov neeg nyob ze peb, thiab nyiam peb tus yeeb ncuab, peb thov Ntuj pub rau cov neeg ua phem rau peb, kom xwv peb thiaj yog Tswv Ntuj cov me nyuam, peb yuav tsum xyaum tswj peb lub siab kom tiaj kom tus, peb tsis txhob ua ywj peb siab, thaum luag ua rau peb mob siab, peb yuav tsis txhob ua pauj rau luag, peb yuav zam rau luag, zoo li Tswv Ntuj tau zam txhaum rau peb. Peb yuav txawj hlub luag zoo li Tswv Ntuj tau nyiam tau hlub peb. Tswv Ntuj tsis xav kom peb tsim yeeb ncuab, tiam sis, nws xav kom peb tsim kev phooj kev ywg, kev kwv kev tij rau saum zeej tsoom neeg sawv daws. yog peb coj tau li no, mas Tswv Ntuj yuav nyiam peb thiab nws yuav saib peb yog nws cov me nyuam.
Nyob rau lub caij plaub caug no thov Tswv Ntuj pab kom peb txawj tswj tau peb lub siab, kom xwv peb loj hlob nyob rau hauv peb txoj kev ntseeg. Ua li.
