ZAJ NYEEM HNUB TIM 28 LUB 5 HLIS 2025
HNUB PLAUB, LIS PIAM 6 CAIJ HLA
COV LUS NYOB HAUV ZAM NTAWV MOO ZOO (Z 16: 12-15)
Kwv tij Hmoob, Huab Tais Yes Xus hais qhov tseeb tias Leej Ntuj Plig yuav coj cov thwj tim mus rau qhov tseeb tas huv si. Li ntawd, tus thwj tim twg txais Leej Ntuj Plig, nws yuav ua neej mus raws qhov tseeb. Qhov tseeb ntawd yog Huab Tais Yes Xus.
Yog peb muaj Leej Ntuj Plig nyob nrog peb, mas peb yuav to taub Huab Tais Yes Xus cov lus qhia, peb yuav muaj lub siab nyiam thiab hlub sawv daws, peb zam tau rau tus ua phem rau peb, peb ntsia pom Huab Tais Yes Xus kev nyiam peb, ces peb lub neej hloov dua tshiab.
Thaum peb txais Cim Ntxuav tas, peb txais Cim Txhab Zog, thaum ntawd mas Leej Choj yuav thov Tswv Ntuj tso Leej Ntuj Plig los roos peb. Kwv tij, tsis yog tias Leej Ntuj Plig yuav los ib zaug ces cia li tas li ntawd. Peb tsum thov Leej Ntuj Plig tuaj nyob hauv peb tsis tseg, thiab peb tsum kub siab nrhiav kev paub Tswv Ntuj tsis tseg thiab; yam li peb nquag teev Ntuj, thov Ntuj, nyeem Ntawv Ntshiab, twm Ntawv Ntshiab, xav tswv yim txog Tswv Ntuj Lo Lus, ua raws li Tswv Ntuj Lo Lus tshoj peb siab kom peb nyiam cov nyob ze peb, zam txim rau tus ua phem rau peb, tsob hwb cov neeg txom nyem, pub yam peb muaj rau tus tsis muaj.
Peb ua li no mas thiaj yog peb cia Leej Ntuj Plig ua hauj lwm hloov peb lub neej. Leej Ntuj Plig tuaj ntawm Leej Txiv thiab Leej Tub tuaj. Leej Ntuj Plig koom nrog Leej Txiv thiab Leej Tub ua tib tug Tswv Ntuj. Huab Tais Yes Xus thiab cov Hauv Paus Xa Lus qhia peb tias Tswv Ntuj yog tus zoo tshaj, yog kev nyiam. Tswv Ntuj tawm tuaj nrhiav peb ntiaj teb neeg kom tau nrog peb nyob, Tswv Ntuj tso lub hwj chim Tswv Ntuj nqes los ua leej tib neeg xws li peb, thiab Tswv Ntuj tseem yeem tuag kom tau ris peb cov txim txhaum. Li ntawd, thaum peb txais Leej Ntuj Plig uas yog ib tug Huab Tais nyob peb leeg Huab Tais koom tib tug Tswv Ntuj lawm, peb kuj yuav yuam peb kom taug txoj kev ua zoo, kev nyiam, kev nrauj tus kheej tawm mus fim luag lwm tus thiab.
Kwv tij Hmoob, qhov tseeb yog qhov tiag tsis muaj qhov cuav xyaw. Huab Tais Yes Xus hais tias nws yog qhov tseeb, yog li mas nyob hauv Huab Tais Yes Xus thiaj yog qhov tiag tsis tsuas kev cuav, ces peb ntseeg tau tias txhua yam Huab Tais Yes Xus qhia rau peb ntawd puav leej yog qhov tseeb. Tab sis muaj ntau zaus peb ua xyem xyav, peb xav tias puas yuav muaj li ntawd tiag. Hnub no Huab Tais Yes Xus qhia peb kom thov Leej Ntuj Plig tus qhia qhov tseem ceeb tuaj tshoj peb lub siab lub tswv yim kom tsis txhob ua xyem xyav ntxiv.
Nyob zoo sawv daws.
