ZAJ NYEEM HNUB TIM 29 LUB 6 HLI 2026
HNUB OB, LIS PIAM 13 CAIJ NYOB NRUAB XYOO
COV LUS NYOB HAUV MAS TAIS NTAWV MOO ZOO (MT 8: 18-22)
Kwv tij Hmoob sawv daws, nyob hauv lub Koom Txoos, mas hnub no peb cov neeg ntseeg tsum ua lub Txoos hwm Leej Ntshiab Pob Zeb thiab Leej Ntshiab Paj Lug, tab sis nyob hauv ntau lub teb chaws muaj cov neeg ntseeg tsawg, mas lub Koom Txoos muab ncua mus rau Hnub Chiv tom qab hnub no. Yog li mas hnub no peb thiaj tsis nthuav lub Moo Zoo raws li cov zaj nyeem hauv hnub hwm nkawd, tab sis peb thov muab lub Moo Zoo raws li cov zaj nyeem niaj hnub los nthuav rau sawv daws tau khaws coj mus ntuas siab ua ke.
Lub Moo Zoo hnub no hais tias Huab Tais Yes Xus los txog Kas Fas Nais, nws kho Pob Zeb niam tais thiab cov neeg raug dab zoo tas, mas cov neeg Kas Fas Naus tuaj vij Pob Zeb lub tsev coob tsis coob, Huab Tais Yes Xus thiaj li hais rau cov thwj tim kom lawv caij nkoj hla mus rau lawm qhov chaw. Nyob hauv cov neeg tuaj mloog Huab Tais Yes Xus ntawd, muaj ib tug yog Kws Ntawv Ntshiab, nws tau kawm phau Ntawv Ntshiab ntau, mas nws pom tias Huab Tais Yes Xus yog tus Mes Xias cov Yaj Saub tau hais txog nyob hauv Ntawv Ntshiab tiag, nws thiaj li txav los hais rau Huab Tais Yes Xus tias “Xib Hwb, txawm koj mus qhov twg, los kuv yuav raws koj mus.”
Huab Tais Yes Xus ntsia nws saib nws hais tiag los lam hais xwb, ces Huab Tais Yes Xus hais rau nws tias “Hma muaj hma lub qhov nkaum, cov noog saum ntuj lawv kuj muaj lawv cov zes, hos Neeg Leej Tub tsis muaj chaw rau ncoo.”
Lo lus no yog Huab Tais Yes Xus xav hais rau tus Kws Ntawv Ntshiab xav raws nws qab tias “Yog koj xav los raws kuv, mas koj puas kam tso koj txoj kev noj qab pw sov tseg, koj puas yuav kam ris kev txom nyem zoo ib yam li kuv mas?”
Kwv tij Hmoob, peb tsis paub tias tus Kws Ntawv Ntshiab txiav siab li cas. Tab sis muaj ib tug thwj tim nyob ntawd, nws to taub Huab Tais Yes Xus cov lus, ces nws pib ua xyem xyav, nws hais tias “Thov koj cia kuv mus faus kuv txiv tso.” Ces Huab Tais Yes Xus hais rau nws tias “Koj cia cov tuag mam faus cov tuag, ntawm koj mas koj raws kuv mus.”
Huab Tais Yes Xus lo lus hais rau tus thwj tim li no, tsis yog hais kom nws tsis txhob hlub niam hlub txiv, txhob quav ntsej txog niam txiv. Tab sis yog Huab Tais Yes Xus xav kom tus thwj tim muab ua zoo xav saib qhov twg tseem ceeb dua, ces nws yuav tau xub ua qhov ntawd ua ntej. Nyem no nws raws Huab Tais Yes Xus, mas nws yuav xub saib yog qhov tseem ceeb. Txog hnub nws txiv tuag, mas nws mam mus faus.
Kwv tij Hmoob, nyob hauv peb lub neej mas muaj zoo li tus Kws Ntawv Ntshiab thiab tus thwj tim no. Yog peb xav raws Huab Tais Yes Xus, mas peb yuav tsum lees txais kev txom nyem tuaj raug tuaj nphav peb kom tau, peb yuav muab Huab Tais Yes Xus saib uab qhov loj tshaj, peb yuav saib Tswv Ntuj lub Ceeb Tsheej yog lub cuab tam peb yuav tau xub nrhiav. Tsis txhob hais tias kuv txiav siab los ntseeg txog Yes Xus tab sis thaum ntsib teeb meem ces cia li thim rov qab. Thaum peb los ua neeg ntseeg lawm, peb txhob muab tas lub sij hawm mus nrhiav noj nrhiav haus, ces ua rau peb tsis muaj sij hawm rau Tswv Ntuj.
Nyob zoo sawv daws.
