ZAJ NYEEM HNUB TIM 3 LUB 2 HLIS 2025
HNUB NCO TXOG LEEJ NTSHIAB AAS NKAS
HN 11: 32-40; MK 5: 1-20
Kwv tij Hmoob sawv daws, Yes Xus lub Moo Zoo hnub no piav txog thaum Huab Tais Yes Xus thiab cov thwj tim caij nkoj hla lub pas dej Nkas Lis Lais mus rau sab ntug dej tim ub uas yog nyob rau sab hnub tuaj. Cov neeg nyob tham tsam ntawd tsis yog cov Yus Das xws li Huab Tais Yes Xus lawv; cov neeg ntawd lawv kuj coj kev teev hawm txawv cov Yus Das.
Muaj ib tug neeg raug dab nyob hauv thaj tsam Huab Tais Yes Xus lawv theem nkoj. Tus neeg ntawd tsis yog raug ib tug dab, tab sis nws rauag ib npoj dab diam; coob kawg nkaus.
Tus neeg raug dab pom Huab Tais Yes Xus, nws cia li khiav los txhos caug ntawm Huab Tais Yes Xus xub ntiag. Huab Tais Yes Xus pom tias tus neeg ntawd tus plig txom nyem heev, nws xav dim ntawm npoj dab, nws thiaj ua tiag kom yeej dab phem lub zog kom tau los thov Huab Tais Yes Xus.
Huab Tais Yes Xus pom li ntawd, Huab Tais Yes Xus hlub nws ces Huab Tais Yes Xus thiaj ntiab npoj dab tawm ntawm tus neeg ntawd.
Cov dab tawm mus nyob hauv ob txhiab tus npua, cov npua dhia mus rau hauv dej ntuj tuag tas.
Kwv tij Hmoob, peb coob tus neeg zoo li tus raug dab no, peb muaj txoj kev phem ntau tsav nyob hauv peb; yam li kev ntshaw luag lwm tus lub cuab tam, kev ntshaw zes luag tej lub cev, kev npau taws, kev khib, kev ntxub, kev nkees thiab ntau ntau yam. Cov no yog npoj dab looj peb cia. Tab sis tob tob hauv peb tus plig, mas peb txhua tus neeg yeej xav ua qhov zoo, xav rho tej yam phem tawm hauv peb mus.
Kwv tij, peb yog me nyuam neeg, peb lub zog tsis loj txaus yuav tiv tau txoj kev phem tuaj nyob hauv peb. Peb kawg vam txog Huab Tais Yes Xus pab ntiab kev phem kev tsis zoo tawm ntawm peb xws li tus raug npoj dab hauv lub Moo Zoo hnub no, tsuav peb txhos caug thov Huab Tais Yes Xus, mas Huab Tais Yes Xus yuav pab tau peb.
Tab sis yog peb ua xws li cov neeg nyob hauv lub nroog, peb pom Huab Tais Yes Xus, tab sis peb tsis kam txais Huab Tais Yes Xus tuaj ua tus cawm peb, mas Huab Tais Yes Xus kawg pab peb tsis tau.
Cov neeg hauv lub nroog, lawv khuv xim cov npua dua yuav tig los ntseeg tias Huab Tais Yes Xus yog tus hlub lawv, yog tus cawm ib tug neeg raug dab hauv lawv lub teb chaws; lawv saib cov cuab tam muaj nqes dua.
Kwv tij, peb ua neej nyob peb puas zoo li ntawd; peb puas muab lwm yam saib loj thiab tseem ceeb dua kev ntseeg txog Yes Xus.
Tus raug dab, nws thov raws Huab Tais Yes Xus mus, tab sis Huab Tais Yes Xus tsis kheev, Huab Tais Yes Xus hais kom nws rov mus tsev thiab qhia txhua yam nws tau txais ntawm Tswv Ntuj los rau cov neeg nyob ib ncig nws.
Kwv tij, Huab Tais Yes Xus tab tom hais rau tus neeg no kom nws mus ua tim khawv txog lub Moo Zoo nyob hauv nws lub zos; yam li nws qhia rau sawv daws paub txog Tswv Ntuj kev nyiam thiab hlub nws.
Hnub no, peb sawv daws tau ntsib Huab Tais Yes Xus, tau txais kev cawm ntawm Huab Tais Yes Xus; peb kuj hloov ua tus neeg tshiab coj tus yam ntxwv tshiab, peb kuj yuav ua piv txwv rau hauv peb tsev neeg, hauv peb lub zos kom lawv pom tias Tswv Ntuj khuv leej peb npaum cas. Peb tsis tos kom tau ua ib tug Leej Choj, ib tug Leej Tij, los ib tug Leej Phauj tso mam ua txoj hauj lwm tshaj lub Moo Zoo. Peb yog ib tug pej xeem ntseeg, los peb kuj muaj cuab kav tshaj lub Moo Zoo tau yog tias peb muab tas peb lub neej los ua tim khawv txog Tswv Ntuj kev nyiam thiab hlub peb.
