ZAJ NYEEM HNUB TIM 4 LUB 11 HLIS 2025
HNUB NCO TXOG LEEJ NTSHIAB NPOS LOS MES OS
COV LUS NYOB HAUV LUS KAS NTAWV MOO ZOO (LK 14: 15-24)
Kwv tij sawv daws, Huab Tais Yes Xus ua paj lug qhia peb tias Tswv Ntuj lub Ceeb Tsheej zoo yam li ib rooj qav uas noj haus tsis txawj tag, Tswv Ntuj tau npaj ib rooj qav loj thiab zoo tshaj plaws tos peb sawv daws, nws xav caw peb sawv daws los koom nrog nws, tab sis, tseem muaj ib txhia neeg tsis kav los.
Tswv Ntuj pub txiaj ntsim rau peb ntau tsav ntau yam dawb dawb, Tswv Ntuj hu peb los ua Tswv Ntuj cov me nyuam, Tswv Ntuj tsis taij tsis thov dab tsi ntawm peb, Tswv Ntuj tsuas xav kom peb txawj coj lub neej ua ib tug neeg zoo, ua neeg ntshiab neeg huv, ces thaum txog hnub kawg, Tswv Ntuj yuav txais peb mus nrog Tswv Ntuj nyob hauv nws lub Ceeb Tsheej, uas yog lub teb chaws ntshiab, yog lub teb chaws yuav tsis muaj kev txom nyem, tsis muaj kev iab kev daw, kev lwj siab lwj plawv ntxiv lawm, tsuas muaj kev kaj siab lug mus li lawm xwb.
Thov kom peb npaj peb lub siab, thiab peb tu peb tus ntsuj plig kom ntshiab kom huv txhua txhia hnub, nyob rau hauv peb txoj kev ntseeg txog Huab Tais Yes Xus, ces thaum txog hnub kawg, peb yeej yuav tau nrog Huab Tais Tswv Ntuj lub Ceeb Tsheej mus li.
Nyob zoo sawv daws.
