HNUB TIM 4 LUB 11 HLIS; HNUB NCO TXOG LEEJ NTSHIAB TSHAS LAWS NPOS LOS MES OS
COV LUS NYOB HAUV LUS KAS NTAWV MOO ZOO (LK 14: 12-14)
Kwv tij Hmoob, peb ua neej nyob mas peb nyiam fim cov neeg zoo li peb; piv li thaum peb ua rooj qav mov nplej tshiab mas peb hu peb cov kwv tij, cov phooj ywg los cov muaj xws li peb tuaj koom; thaum peb ua ib rooj tshoob los peb hu cov neeg nto moo, cov neeg muaj, cov lub neej nto ntsis tuaj koom tuaj nrog foom koob foom hmoov. Hnub no Huab Tais Yes Xus qhia ib zag tswv yim tshiab rau peb; yog zaj txawv yam peb niaj hnub ua. Huab Tais Yes Xus hais tias thaum peb ua ib roog qav mas peb yuav tau hu cov neeg pluag, cov neeg tu test u taw, cov ceg tawv, cov dig muag.
Kwv tij, cov neeg li hais los no mas yog cov neeg sawv daws saib lawv tsis muaj tsim dab tsi, saib lawv yog cov neeg tsis tseem ceeb, saib awv yog cov neeg seem.
Kwv tij, Huab Tais Yes Xus tsis xav kom peb muaj ib lub tswv yim tias thaum peb hu luag los yog caw luag tuaj koom, ces peb yuav tau ib yam dab tsi ntawm luag pauj rov. Huab Tais Yes Xus tsis xav kom peb muaj lub tswv yim tias thaum kuv ua rau ib tug twg, mas muaj ib hnub nws yuav ua li ntawd rau kuv.
Qhov Huab Tais Yes Xus xav kom peb hloov lub tswv yim mas yog qhov tias peb ua dab tsi kuj xij, peb tsum saib lub siab nyiam thiab hlub luag ua qhov tseem ceeb dua lub siab xav tias kuv yuav tau dab tsi rov qab.
Yog peb lub siab xav li ntawd, mas peb lub neej tsuas poob rau qhov tsaus, peb lub siab yuav tsis kaj.
Yog peb lub siab xav li ntawd, mas peb yuav ceeb laj nyiam thiab hlub lwm tus kawg.
Kwv tij Hmoob, tus Hauv Paus Xa Lus Paj Lug sau ib tsab ntawv mus ntuas cov ntseeg nyob Fis Lis Pos; yog zaj 2 qib 1-4. Nws ntuas lawv tias “Kuv cov kwv tij, kuv taij nej tsis tseg kom nej rov sib nplij nyob hauv Leej Pleev, sib nres nyob hauv txoj kev nyiam, sib koom nyob hauv Leej Ntuj Plig, kom nej muaj kev sib hlub thiab sib khuv leej. Nej ua kom kuv txoj kev zoo siab puv phwj yaws; ua li mas nej yuav muaj tib lub siab xav, tib lub siab nyiam, tib tug plig, thiab tib lub tswv yim xwb.
Nej tsis txhob swb txoj kev ua ob peb lub siab, txhob swb lub koob meej cuav; nej nyias yuav saib nyias yog tus me dua cov, yuav saib luag tej loj dua nej. Nej nyias txhob nrhiav yam zoo rau nyias, nej yuav nrhiav yam zoo rau luag.”
Kwv tij Hmoob, nej yuav tau hloov tswv yim hloov txoj kev xav tiag tiag, mas nej thiaj yuav muaj lub siab nyiam.
