ZAJ NYEEM HNUB TIM 4 LUB 7 HLI 2026
HNUB NCO TXOG LEEJ NTSHIAB ES LIS XAS NPES TUS POJ VAJ NYOB POS TWS NKAS
COV LUS NYOB HAUV MAS TAIS NTAWV MOO ZOO (MT 9: 14-17)
Kwv tij Hmoob, muaj ntau zaus peb ua neej nyob mas peb nyiam ua raws li qhov qub, peb tsis xav hloov vim peb xav tias ua zoo li qub mas thiaj tsis raug teeb meem. Peb ua li, ces tos nco peb cia li tsis qhib siab txais tej yam tshiab tshiab. Hnub no lub Moo Zoo piav tias Zam cov thwj tim tuaj nug Huab Tais Yes Xus txog kev yoo mov tias ua cas Huab Tais Yes Xus thab nws cov thwj tim tsis coj cov kab ke yoo. Lawv tuaj nug li ntawd vim lawv xav tias lawv yoo raws li lawv ua kam, mas yog qhov zoo lawm, lawv xav tias lawv ua cov kab ke yoo li ntawd yog lawv tau ua raws txoj cai lawm.
Huab Tais Yes Xus xav thiab lawv lub tswv yim kom siab tuaj, mas Huab Tais Yes Xus thiaj hais ib co lus pab xav tswv yim rau lawv kom pom tias thaud cov His Xas Lais coj kab ke yoo, yog lawv yoo tos tus Mes Xias yuav tuaj. Nyem no Huab Tais Yes Xus yog tus nraug vauv, nws tuaj lawm tsis tsim nyog sawv daws yuav yoo, tab sis yog lub caij lawv tsum muaj kev zoo siab. Huab Tais Yes Xus thiaj li muab ob zaj lawv niaj hnub pom coj los ua piv txwv qhia. Huab Tais Yes Xus hais tias tsis muaj leej twg ntxiv ib daim ntaub tshiab rau ib lub qub tsho, vim tias thaum coj mus ntxhua daim ntaub tshiab yuav rub qub tsho, ces lub tsho haj yam yuav ntuag loj tuaj. Huab Tais Yes Xus hais tias tsis muaj leej twg muab cawv tshiab ntim rau hauv lub hnab tawv qub vim cov cawv tshiab yuav tom lub hnab tawv qub, ces lub hnab tawv yuav ntuag, cawv yuav nchuav tas.
Daim ntaub tshiab, cov cawv tshiab, mas yog cov lus qhia, yog kev nyiam, yog Leej Ntuj Plig Ntshiab uas Huab Tais Yes Xus coj tuaj. Lub qub tsho thiab lub hnab tawv qub, mas yog neeg zaj tswv yim, neeg txoj kev xav, thiab neeg txoj kab txoj ke ua neej.
Yog peb tsis hloov tswv yim tshiab, tsis xav ib zaj tshiab, tsis hloov txoj kev ua neej tshiab kom haum rau Huab Tais Yes Xus cov lus qhia, mas peb txais tsis tau Huab Tais Yes Xus zaj tswv yim.
Niaj hnub no peb puas tseem ua lub hnab tawv qub, yam li peb mus teev Ntuj, peb txais cov Cim Ntshiab vim peb saib tias yog ib txog hauj lwm peb yuav tsum ua raws li peb yog ib tus neeg ntseeg, peb ua vim ib txwm peb yeej ua kam li ntawd. Yog peb xav tias peb mus teev Ntuj, txais cov Cim Ntshiab vim txoj cai thiab cov lus qhia qhia kom ua, tab sis nyob hauv peb tsis muaj lub siab nyiam luag tej, peb tseem ua siab nqaim, peb tseem niaj zaus hais lus xaiv lus dag, tseem ib siab rau qhov phem qhov tsis zoo, mas peb zoo li lub qub tsho, zoo li lub hnab tawv qub.
Yog peb xav ua lub tsho tshiab, ua lub hnab tawv tshiab, mas peb yuav tau hloov peb lub siab lub tswv yim, hloov peb tus yam ntxwv tus cwj pwm dua tshiab los ua raws li Huab Tais Yes Xus cov lus qhia, lawv taug txoj kev ntshiab kev ua zoo.
Nypo zoo sawv daws.
