HNUB TIM 5 LUB 11 HLIS; HNUB PEB HAUV LUB LIS PIAM 31 CAIJ NYOB NRUAB XYOO
COV LUS NYOB HAUV LUS KAS NTAWV MOO ZOO (LK 14: 15-24)
Kwv tij Hmoob, lub Moo Zoo hnub no Huab Tais Yes Xus hais tias muaj ib tug neeg ua ib roog qav loj, nws xa ntawv mus caw sawv daws tas. Thaum lawv npaj zaub npaj mov tias tas lawm, nws tso cov tub txib mus hu cov neeg nws caw tab sis lawv tsis tuaj, nyias muaj nyias chaw tsis xyeej tsis khoom tuaj koom rooj mov.
Kwv tij, yog tias tus ua rooj qav ntawd yog nej, mas nej xav li cas rau cov neeg nej caw tab sis lawv tsis tuaj? Puas yog lawv saib nej tsis tseem ceeb? Puas yog lawv tsis pom nej nyob ntawm lawv qhov muag?
Nej rau rooj rau tog tiav tas tab sis tsis muaj qhua tuaj koom, mas kawg nej yuav ua li tus tswv hauv lub Moo Zoo hnub no. Kav liag, cov neeg ntawd tsis tuaj, ces kuv kawg yuav mus hu cov neeg kuv tsis tau caw tuaj xwb los mas.
Kwv tij Hmoob, Huab Tais Yes Xus hais zaj no los ntuas cov His Xas Lais txog Tswv Ntuj lub Ceeb Tsheej.
Huab Tais Tswv Ntuj xaiv lawv ua Tswv Ntuj haiv neeg, lawv yog cov tau caw musk oom rooj qav tab sis lawv saib Tswv Ntuj rooj qav tsis muaj nqis, ces lawv nyias nrhiav nyias chaw mus ua lwm yam kom txhob xyeej.
Kwv tij Hmoob, nyem no Tswv Ntuj haiv neeg tsis yog cov His Xas Lais xwb, tseem yog peb tsoom neeg sawv daws tau txais lub Cim Ntxawv los nyob hauv lub Koom Txoos tib si thiab.
Niaj lis piam Hnub Chiv mas Huab Tais Tswv Ntuj ua nws rooj qav thiab caw peb mus koom tsis tseg li. Peb puas hais tias ‘Kuv ua hauj lwm 6 hnub, ces hnub 7 kuv mus teev Ntuj.’ Tab sis txog hnub ntawd peb tsis mus. Los peb puas xav tias ‘Ab! Ceeb laj mus teev Ntuj, kuv muab lub sij hawm ntawd mus nrhiav noj nrhiav haus mas yuav zoo dua.’ Los peb puas yuav hais tias ‘Ib lis piam kuv tsuas tos hnub chiv xwb thiaj tau nrog poj niam me nyuam nyob, tau nrog phooj ywg ua si. Kuv tsis mus teev Ntuj, cia txog caij kuv so laus tso, mam mus yeej tsis lig!’
Kwv tij Hmoob, nej cov xav li no mas yog zoo li cov neeg tus tswv caw tuaj koom rooj qav tiag. Muaj ib hnub Huab Tais Tswv Ntuj yuav tsis ua siab ntev rau nej ntxiv, Huab Tais Tswv Ntuj yuav hais rau nej tias “Nej cov neeg kuv caw ntau zaus ko, nej yuav tsis tau saj kuv rooj qav.”
