ZAJ NYEEM HNUB TIM 5 LUB 8 HLI 2025
HNUB CEV LUAB TUAM TSEV ZAM LAS TES LAAS
COV LUS NYOB HAUV MAS TAIS NTAWV MOO ZOO (MT 14: 22-36)
Kwv tij Hmoob, Huab Tais Yes Xus ua hwj huam kom 5 lub ncuav mov thiab 2 tug ntses ntsu tuaj yug cov neeg tuaj vam txog Huab Tais Yes Xus tau noj tas, thaum ntawd lig lawm, ces Huab Tais Yes Xus thiaj mam kom sawv daws nyias mus nyias tsev. Huab Tais Yes Xus xub hais cov thwj tim kom nce nkoj ua nws ntej mus lawm sab ntug dej tim ub.
Thaum cov thwj tim nyob hauv nkoj, lawv raug xwv txheej loj; dej nphau tuaj nplawm lub nkoj. Cov thwj tim sib pab hwj lub nkoj kom tsis txhob nphau, ces thaum ntawd, lawv pom Huab Tais Yes Xus mus ko taw saum dej ntuj, lawv xav tias yog lawv pom poj ntxoog, ces lawv yim ntshai.
Huab Tais Yes Xus hais kom lawv tsis txhob ntshai, nws qhia lawv tias yog nws, ces Pob Zeb thiaj thov mus cuag Huab Tais Yes Xus. Pob Zeb tsuj saum dej ntuj mus nrhiav Huab Tais Yes Xus; nws tsis tog, tab sis thaum nws pom cua hlob, nws ntshai, ces nws pib tog. Pob Zeb hu Huab Tais Yes Xus kom tsuag tsuag los pab nws.
Huab Tais Yes Xus rub Pob Zeb tes thiab hais rau nws tias “Neeg ntseeg tsawg, ua cas koj ua xyem xyav?”
Kwv tij Hmoob sawv daws, niaj hnub peb muab peb kev ua neej piv rau cov thwj tim thaum lawv nyob hauv lub nkoj nyob plawv dej ntuj, muaj ntau yam teeb meem thiab ntau yam xwv txheej tuaj nphav tuaj raug peb ua rau peb lub neej tshuav nphau. Txawm li ntawd, Huab Tais Yes Xus xav kom peb tso siab tias thaum peb muab tas peb lub siab los ntseeg txog Huab Tais Yes Xus lawm, nws yuav pab peb kom hla dhau kev txom nyem tuaj raug peb ntawd.
Hnub twg peb ntsia ntsoov Huab Tais Yes Xus, hnub ntawd peb yuav tsis plam taw; tab sis hnub twg peb muab teeb meem saib ua qhov loj, mas hnub ntawd peb yuav raug cov teeb meem tsuam.
Nyob zoo sawv daws.
