HNUB TIM 6 LUB 11 HLIS; HNUB PLAUB LUB LIS PIAM 31 CAIJ NYOB NRUAB XYOO
COV LUS NYOB HAUV LUS KAS NTAWV MOO ZOO (LK 14: 25-33)
Kwv tij Hmoob sawv daws, thaum nej hnov Huab Tais Yes Xus cov lus hais tias “Leej twg los raws kuv, yog nws tsis nyiam kuv dua nws niam nws txiv, nws poj niam me nyuam, nws cov kwv tij thiab cov muam, thiab yog nws nyiam nws txoj sia dua kuv, mas tus ntawd ua tsis tau kuv thwj tim”, mas nej xav li cas?
Leej twg yog Huab Tais Yes Xus cov thwj tim? Yog peb cov neeg ntseeg txog Huab Tais Yes Xus ntag!
Peb ua Huab Tais Yes Xus cov thwj tim, mas peb puas ua raws li lo lus Huab Tais Yes Xus hais no?
Ntshai nej tej tus yuav hais tias ‘Ab! Yog kuv paub tias ua Huab Tais Yes Xus thwj tim nyuaj cuag li hais no mas ntshai kuv yuav tsis ua Huab Tais Yes Xus thwj tim lawm.”
Kwv tij Hmoob, ua Huab Tais Yes Xus thwj tim mas yeej nyuaj tiag tiag li. Saib mas, saib peb puas yuav nyiam Huab Tais Yes Xus tshaj txhua yam, txhua leej txhua tus peb nyiam, peb puas nyiam Huab Tais Yes Xus tshaj peb txoj sia.
Peb yog tib neeg mas peb ceeb laj nyiam lwm tus dua peb txoj sia tiag. Tab sis yog peb muab ntsia kom dav me ntsis mas peb kuj yuav pom tias peb niam peb txiv mas lawv nyiam peb dua lawv txoj sia. Peb ntsia ntawm peb cov yog niam yog txiv, mas peb kuj pom tias peb yeej nyiam peb cov me nyuam tshaj peb txoj sia thiab.
Peb niam peb txiv nyiam peb vim peb yog lawv chaw vam khom. Peb nyiam peb tej me nyuam vim lawv yog peb chaw kaj siab.
Huab Tais Yes Xus yog peb chaw vam khom thiab kev kaj siab lug, yog li mas tsis phim peb yuav nyiam Huab Tais Yes Xus tshaj txhua yam lod?
Kwv tij, Huab Tais Yes Xus tsis yog txhib peb kom nyiam nws tib tog xwb; ntawm Huab Tais Yes Xus mas peb yeej pom tias nws los kuj nyiam peb tshaj plaws, nws thiaj yeem raug ntes mus tua tuag saum Ntoo Cuam kom tau txhiv peb hauv qhov txhaum, theej peb txoj sia hauv qhov tuag, tsa peb sawv los txais txoj sia tshiab thiab tau ua Tswv Ntuj cov me nyuam.
Li ntawd, thiaj phim peb yuav nyiam Huab Tais Yes Xus dua peb niam peb txiv, nyiam Huab Tais Yes Xus dua peb tej txij nkawm me nyuam, nyiam Huab Tais Yes Xus dua peb cov kwv tij nkauj muam, nyiam Huab Tais Yes Xus dua peb rov nyiam peb txoj sia. Tab sis muaj ib yam peb yuav nco ntsoov yog Huab Tais Tswv Ntuj lo lus qhia tias ‘koj yuav hwm koj niam koj txiv.’ Yog li mas Huab Tais Yes Xus lo lus hauv hnub no thiaj tsis yog kom peb txiav niam txiav txiv, txiav poj niam me nyuam los kev neej kev tsav tseg, tab sis yog kom peb saib kev nyiam Huab Tais Yes Xus ua qhov tseem ceeb mas peb thiaj yuav nyiam tau peb niam peb txiv, peb poj niam tub se los peb cov txheeb ze nyob hauv Huab Tais Yes Xus.
