Zaj nyeem hnub tim 6 lub 5 hlis 2026
Hnub Plaub, Lis Piam 5 caij Hla
Cov lus nyob hauv Zam Ntawv Moo Zoo (Z 15: 1-8)
Kwv tij sawv daws, nyob rau hauv zaj no, Huab Tais Yes Xus ua paj lug hais qhia peb tias, nws yog txoj hmab txiv cawv, hos peb tsoom ntseeg yog tej ceg txiv. Li ntawd, tus ceg txiv cawv yuav tawg paj txi txiv tau yog yuav tsum txuas ntawm txoj hmab.
Nyob rau hauv peb kev ua neej, muaj ntau yam sib tiv nyob rau hauv peb lub tswv yim, thiab txoj kev xav, txog peb tej kev cai Hmoob thiab peb txoj kev ntseeg Ntuj, ua rau peb tsis tshua meej pem pes tsawg.
Txawm muaj ntau yam ua rau peb ntxhov siab, tsis kav, thov kom peb nco ntsoov tias, thaum peb tau txais lub Cim Ntuxav lawm, peb txiav siab tso plhuav ib puas tsav yam cia tom qab, ces peb lub neej thiab txoj sia rau hauv Huab Tais Tswv Ntuj txhais tes. Ua li mas peb thiaj yuav loj hlob thiab ciaj sia nyob rau hauv peb tus Huab Tais Tswv Ntuj.
Huab Tais Yes Xus hais meej tias “Tus uas ciaj sia nyob hauv kuv thiab kuv nyob huav nws, mas nws yuav tawg paj txi txiv ntau. Yog tsis muaj kuv mas nej ua tsis tau dab tsi.”
Txhais tias, peb yuav ua tau cov hauj lwm zoo yog peb yuav tsum vam txog Huab Tais Yes Xus pab.
Li ntawd, peb yuav tsum thov Leej Ntuj Plig Ntshiab coj peb kev, thiab pub lub tswv yim thoob tsib rau peb, kom peb coj tau ib lub neej npuab Huab Tais Yes Xus thiab coj tau raws li nws txoj lus qhia.
Nyob zoo sawv daws.
