ZAJ NYEEM HNUB TIM 6 LUB 6 HLI 2024
HNUB NCO TXOG LEEJ NTSHIAB NOS NPAWS
COV LUS NYOB HAUV MAS KOS NTAWV MOO ZOO (MK 12: 28-34)
Kwv tij Hmoob sawv daws, lub Moo Zoo hnub no mas peb cov neeg ntseeg hais tias yog Huab Tais Yes Xus txoj cai nyiaj txoj cai kub; yog txoj cai uas cov neeg ntseeg yuav coj thiab ua raws. Txoj cai ntawd hais tias “Koj yuav nyiam koj tus Huab Tais Tswv Ntuj tas siab tas ntsws, tas koj tus ntsuj plig, tas koj lub tswv yim thiab tas koj lub zog. Koj yuav nyiam tus nyob ze koj ib yam li koj nyiam koj.”
Tus Hauv Paus Xa Lus Zam hais ntxiv tias “Yog peb tsis nyiam cov kwv tij peb pom tau, mas peb yuav ua cas nyiam tau Tswv Ntuj tus peb pom tsis tau.” Yeej yog li ntawd tiag, yog peb twb tsis nyiam cov neeg nyob ib puag ncig peb, mas peb yuav ua li cas nyiam tau Tswv Ntuj. Yog peb tsis nyiam Tswv Ntuj mas peb yuav ua li cas nyiam tau neeg.
Lub Koom Txoos qhia ntxiv tias yog peb xav paub tias peb puas nyiam Huab Tais Tswv Ntuj tas siab tas ntsws, tas koj tus ntsuj plig, tas koj lub tswv yim thiab tas koj lub zog, mas yog kom peb rov mus muab Huab Tais 10 Lo Lus Qhia; lo lus 1, lo lus 2, thiab lo lus 3 coj los tshuaj saib puas muaj nyob hauv peb. Peb lo lus ntawd yog “Koj yuav teev Huab Tais Ntuj ib tug xwb thiab koj yuav nyiam Huab Tais Ntuj tshaj tas puas tsav yam, koj yuav hwm Huab Tais Ntuj lub npe, koj yuav caiv Huab Tais Ntuj hnub.
Cov kwv tij, hais txog lo lus tias “Koj yuav nyiam tus nyob ze koj ib yam li koj nyiam koj”, mas kom peb xav saib txhua hnub peb puas ua raws li Huab Tais Ntuj lo lus qhia 4 txog 10 yam li; hwm niam hwm txiv, tsis txo neeg txoj sia, tsis zes luag li txij nkawm, tsis yuav yam tsis yog yus li, tsis hais lus dag, tsis tso yus lub siab lub tswv yim mus xav txog kev plees los yog ntshaw luag tej li cuab tam.
Kwv tij Hmoob, nyob hauv Huab Tais Ntuj 10 Lo Lus Qhia no mas tseem muab cais tau ntau qib ntau nqe tab sis peb tsuas coj los hais me me li no xwb, kom nej tau coj mus tshuaj saib nyob hauv nej lub neej, nej puas muaj Huab Tais Ntuj 10 Lo Lus Qhia no. Yog muaj mas nej ntxiv nej lub siab nyiam rau thiab, mas nej thiaj yuav ua tau tus neeg nyiam Tswv Ntuj thiab nyiam neeg mog.
