HNUB TIM 8 LUB 11 HLIS; HNUB RAU LUB LIS PIAM 31 CAIJ NYOB NRUAB XYOO
COV LUS NYOB HAUV LUS KAS NTAWV MOO ZOO (LK 16: 1-8)
Kwv tij Hmoob sawv daws, thaum nej hnov lub Moo Zoo hnub no mas nej yuav xav twj ywm tias ua cas tus neeg nplua nuj thiab qhuas tus tim xyoob xam txiaj siab tsis ncaj, nws twb coj tus tswv tej nyiaj txiag muss iv ua lwj ua liam tas, nws kuj tseem tso tus nqi luag tshuav ntawm tus tswv kom qis dua qhov tseeb thiab.
Kwv tij, puas yog nws ua tsis ncaj tiag?
Nyob hauv cov Yus Das lub neej, cov sau se thiab cov xam txiaj mas lawv tsis tau txais tus nqi zog ua lawv txoj hauj lwm ntawm lawv tus tswv. Cov neeg sau se thiab cov neeg xam txiaj mas lawv tau tus nqi zog ntawm cov neeg tuaj them se thiab them nuj nqi xwb. Yog tias nws xav tau ntau ces nws sau nws tus nqi txhab ntxiv rau cov se los cov nuj nqis luag tshuav ntawm tus tswv kom ntau, nws sau tsawg mas nws kuj yuav tau tsawg.
Thaum peb paub li no, mas peb thiaj yuav to taub tias ua cas tus neeg nplua nuj thiaj qhuas tus tim xyoob xam txiaj no.
Tus tim xyoob paub tias nws yuav poob hauj lwm, mas nws yuav tsis muaj chaw kaus cov neeg tshuav nuj nqis tej nyiaj lawm, ces nws thiaj thim xav tias yog nws xav kom cov neeg tuaj them nqi nyiam nws mas kawg nws yuav tsum tsis txhob xam nws tus nqi zog ntawm cov neeg ntawd; nws tsis txhob cia lawv ris nws tus nqi zog. Li ntawd, tus zauv nws hais kom cov tshuav nuj nqis sau tshiab thiaj yog tus tseem nqi uas lawv tshuav ntawm tus tswv. Qhov muab rho tawm ntawd yog tus tim xyoob feem yuav tau ntawm cov neeg tuaj them nuj nqis.
Tus tswv ntuj nqi qhuas nws tus tim xyoob vim nws pom tias tus tim xyoob xyuam xim txawj xaiv yuav qhov ncaj rau cov neeg tshuav nqi kom lawv nyiam nws, ces lawv txais nws.
Kwv tij Hmoob sawv daws, tus tim xyoob no ntse mas nws thiaj xyuam xim. Nws xyuam xim mas nws thiaj txiav siab ua qhov ncaj li ntawd.
Kev xyuam xim yog lub laj lim Tswv Ntuj pub rau txhua tus neeg. Li ntawd, peb tsim nyog yuav muab lub laj lim Tswv Ntuj pub rau peb no mus xaiv ua qhov zoo, ib yam li tus tim xyoob siab tsis ncaj no uas thaum kawg nws rho nws lub laj lim kev xyuam xim los xaiv ua qhov ncaj thiab yog.
