Zaj nyeem hnub tim 8 lub 2 hlis 2026
Hnub Chiv, Lis Piam 5 caij Nyob Nruab Xyoo
Cov lus nyob hauv Mas Tais Ntawv Moo Zoo (MT 5: 13-16)
Kwv tij zoo nyiam sawv daws, hnub no yog hnub chiv lis piam 5 hauv lub caij Nyob Nruab Xyoo. Hauv Mas Tais Ntawv Moo Zoo hnub no, peb hnov tias Huab Tais Yes Xus qhia nws cov thwj tim txog txoj hauj lwm tseem ceeb tshaj plaws, uas yog txoj hauj lwm tshaj Ntuj Lus. Yes Xus cov thwj tim huv tib si yuav tsum ua hauj lwm Tshaj Ntuj Lus no. Ntawm kev tshaj Ntuj Lus mas tsis yog hais tias yus hais tawm ntawm yus qhov ncauj xwb, tiam sis yus yuav tsum ua qhov yus tshaj tawm kom pom xyeem tuaj kom tseeb. Zoo li hnub no, Huab Tais Yes Xus hais tias “Nej yog cov ntsev las lub ntiaj teb” thiab “yog lub teeb ci rau lub ntiaj teb.” Cov ntsev thiab lub teeb yog ob yam tseem ceeb uas Huab Tais Yes Xus siv kom cov thwj tim pom meej tias lawv yuav tsum ua hauj lwm tshaj Ntuj Lus zoo li cov ntsev thiab lub teeb. Ntsev tsis muaj qab hau dab tsi yog ntsev tsuag lawm, lub teeb kuj tsis muaj qab hau dab tsi li yog lub teeb tsis ci rau cov neeg kom pom kev, puas yog? Ntawm kev tshaj Ntuj Lus kuj zoo ib yam thiab. Yog tus tshaj Ntuj Lus tsis ua piv txwv kom sawv daws pom, cov lus uas tus tshaj Ntuj Lus hais kuj tsis muaj qab hau dab tsi thiab. Huab Tais Yes Xus thiaj hais tias “Li ntawd, nej lub teeb yuav tsum ci nyob ntawm zeej tsoom xub ntiag, kom lawv pom nej cov dej num zoo, ces lawv yuav cav txog nej Txiv, nej Tswv Ntuj nyob saum ntuj.”
Kwv tij zoo nyiam sawv daws, txhob ntshai ua neej zoo li cov ntsev las lub ntiaj teb kom muaj kev zoo, kev hlub, kev ncaj ncees thiab tsis txhob ntshai ua neej zoo li lub teeb ci rau luag kom pom kev. Tej zaum, luag taug hauv txoj kev tsaus ntuj nti, thov kom peb yog lub teeb coj lawv txoj kev kom lawv pom kev, kom lawv pom txoj kev zoo, txoj kev hlub, txoj kev ncaj ncees. Txhob ntshai vim Huab Tais Yes Xus yuav pub lub zog rau peb, nws tsis tso peb pov tseg. Nws nrog nraim peb mus tas ib txhiab ib txhis vim peb ua nws txoj hauj lwm Tshaj Ntuj Lus. Peb ua tim khawv txog nws. Thov Tswv Ntuj nrog nraim nej sawv daws os mog.
Nyob zoo.
