ZAJ NYEEM HNUB TIM 8 LUB 7 HLI 2025
HNUB PEB, LIS PIAM 14 CAIJ NYOB NRUAB XYOO
COV LUS NYOB HAUV MAS TAIS NTAWV MOO ZOO (MT 9: 32-37)
Kwv tij Hmoob sawv daws, thaum cov Fas Lis Xais hnov zeej tsoom qhuas txog Huab Tais Yes Xus, mas lawv khib, lawv thiaj hais rau tsoom sid tias tos Huab Tais Yes Xus ntiab tau dab thiab kho tau cov neeg dig muag, neeg nplaig txhav li ntawd vim Huab Tais Yes Xus hu txog tus tuam thawj dab tuaj pab.
Cov Yus Das hais tias tus tuam thawj dab yog tus dab Npes Ntxes Npus. Tus dab Npes Ntxes Npus yog tus coj txiab mob tuaj raug rau neeg, xws li Hmoob hais kam tias Ntxwg Nyoog yog tus tso txiab mob kev tuag los rau ntiaj teb neeg mas leej tib neeg thiaj muaj mob muaj tuag. Li ntawd, Hmoob thiaj ntxub tus dab Ntxwg Nyoog tshaj plaws. Cov Yus Das los kuj zoo ib yam li ntawd; lawv ntxub tus dab Npes Ntxes Npus tshaj thiab. Cov Fas Lis Xais thiaj liam tias tos Huab Tais Yes Xus kho tau neeg kom zoo ntawm kab mob mas vim Huab Tais Yes Xus hu tus dab Npes Ntxes Npus tuaj tshem tus mob ntawd. Lawv hais li no, mas sawv daws thiaj yuav tsis vam txog Huab Tais Yes Xus ntxiv.
Zaj Ntawv Moo Zoo hnub no, tsis yog los xaus rau cov Fas Lis Xais cov lus liam ntawd xwb, tseem hais ntxiv tias Huab Tais Yes Xus mus ncig txhua cov nroog thiab cov zos huv si, nws qhia sawv daws nyob hauv cov tsev txoos, nws tshaj lub Moo Zoo txog Ntuj lub Ceeb Tsheej, nws kho sawv daws tej txiab xeeb thiab tej mob nkeeg tas huv si. Yes Xus pom tsoom pej xeem, nws hlub lawv, vim lawv sawv daws sab thiab qaug zog zoo li ib co yaj tsis muaj tsw zov. Yes Xus thiaj hais rau nws cov thwj tim tias “Qoob loo ntau kawg, tab sis cov tub zog tsawg. Nej thov tus Tswv qoob kom nws xa ib co tub zog tuaj sau nws cov qoob.”
Peb muab 2 zaj no los sib piv, mas peb yuav pom tias sib txawv ntau tshaj.
Cov Fas Lis Xais kub siab coj txoj cai tab sis lawv zoo li tsis to taub tias nyob hauv txoj cai qhia kom lawv ua dab tsi, lawv tsuas soj lwm tus saib puas yuav hla txoj cai los tsis hla, lawv tsis pom tias coj hla txoj cai ntau tshaj mas yog lawv. Cov Fas Lis Xais ua li, mas lawv thiaj tsis nco pom tsoom sid kev txom nyem.
Huab Tais Yes Xus xub saib neeg kev txom nyem ua ntej, nws muab txoj cai los pab sawv daws kom dim hauv lawv kev txom nyem hauv lawv lub tswv yim, lawv sab ntsuj plig.
Huab Tais Yes Xus pom tsoom pej xeem, lawv vam txog cov Fas Lis Xais, cov Kws Ntawv, cov Leej Choj uas paub qab hau pab lawv. Tab sis cov neeg ntawd tsuas muaj muab tus quab rau lawv ris, tsis quav ntsej txog lawv. Huab Tais Yes Xus thiaj hais tias “Qoob loo ntau kawg, tab sis cov tub zog tsawg.”
Nyob hauv peb txoj kev ntseeg txog Yes Xus, niaj hnub no tseem muaj zoo li ntawd. Tsis hais tus tuav txoj kab xwm dab tsi; yam li ua Leej Choj, ua Leej Phauj, ua tub tshaj Ntuj Lus, ua Xib Hwb, ua pej xeem ntseeg; yog tias peb tsis ntsia pom lwm tus li kev txom nyem, peb tsis muab siab rau saib lawv vam txog dab tsi ntawm peb, peb tsuas saib lawv raws li peb xav, peb tsuas xav kom lawv ua raws li peb hais; mas ntshai peb yuav zoo li cov Fas Lis Xais uas niaj hnub nrhiav kev txhaum hauv lwm tus, niaj hnub liam rau tus ub tus no.
Tsim nyog peb yuav hloov dua lub tswv yim tshiab, mloog cov nyob ib ncig peb saib lawv xav li cas, lawv tos dab tsi ntawm peb, peb yuav pab lawv tau li cas.
Phim peb yuav tawm mus ntsib lawv, mus nyob nrog lawv.
Nyob zoo sawv daws.
