ZAJ NYEEM HNUB TIM 9 LUB 10 HLI 2025
HNUB NCO TXOG LEEJ NTSHIAB DIS OS NIS XIS OS
COV LUS NYOB HAUV LUS KAS NTAWV MOO ZOO (LK 11: 5-13)
Kwv tij sawv daws, muaj lus nug tias puas yog peb xav tau dab tsi, mas peb yuav tsum thov Ntuj tas zog, kom Tswv Ntuj siab muag, ces nws mam li pub rau peb. Nyob rau hauv zaj no Huab Tais Yes Xus qhia tseeb txog Tswv Ntuj lub siab nyiam, uas nws hlub neeg tas nrho rau peb, Huab Tais Yes Xus xav qhia peb tias Huab Tais Tswv Ntuj yog peb Leej Txiv nyob saum Ntuj, uas nws siab zoo tas nrho. Nws nyiam thiab hlub peb tshaj nws tus me nyuam, Huab Tais Yes Xus qhia meej rau peb tias Tswv Ntuj xub paub peb txoj kev xav ua ntej peb yuav xub thov lawm. Yog li ntawd, txhais tias Tswv Ntuj yeej xub paub lawv tias peb xav tau dab tsi, peb ntshaw dab tsi, tab sis, nws tsuas tos saib peb yuav thov nws zoo li cas thiab nws saib qhov peb thov ntawd puas zoo pab peb. Peb tsis tas yuav hais ib co lus ntau ntau, rov mus rov los ob peb lwm, vim peb kuj txawj pub tej yam zoo rau peb tus me nyuam, li ntawd peb txhob txhawj tias tsam Tswv Ntuj tsis hlub peb, peb txhawj tias peb yuav tsis tau raws li peb thov, yog yam tias yam uas peb thov ntawd zoo pab peb thiab tsis txhaum cai, mas Tswv Ntuj yeej pub rau peb xwb. Tsuas yog qee zaus peb thov tej yam tsis tsim nyog, ces Tswv Ntuj thiaj tsis tau pub rau peb xwb. Yam li peb thov kom muaj nyiaj nplua nuj, mas tej yam no ntshe Tswv Ntuj yuav tsis pub, vim yog Tswv Ntuj paub tias thaum peb ua lub neej muaj nyiaj nplua nuj lawm, peb yuav tsis nco Tswv Ntuj lawm, peb yuav muab nyiaj txiag los siab hlob dua Tswv Ntuj, mas tej yam no Tswv Ntuj yuav tsis pub, tiam sis, yog peb ua zoo, coj zoo raws li Tswv Ntuj lub Moo Zoo qhia lawd, qhov tsim nyog pub, mas Tswv Ntuj pub xwb, nws yuav tsis pub kom peb muaj ntau ntau, tiam sis, nws yuav pub kom peb muaj txaus noj txaus siv, kom peb txhob ntshaw luag. Zoo yam li peb tus me nyuam uas nyob nyob nws cia li los taij nws niam thiab nws txiv ib thooj nyiaj, mas tab txawm peb muaj los peb yeej yuav tsum nug, saib nws yuav coj mus ua dab tsi, thiab puas tsim nyog, los tsis tsim nyog, yog tsis tsim nyog mas peb yuav tsis pub rau, yog tsim nyog mas peb li pub. Huab Tais Yes Xus qhia meej tias Huab Tais Tswv Ntuj hlub peb tshaj peb hlub peb cov me nyuam, li ntawd, peb yim meem thov, tej yam zoo uas yuav pab txhawb peb lub neej, mas Ntuj yuav pub kom peb tau raws li peb txoj kev thov xwb.
Nyob zoo sawv daws.
