HNUB TIM 9 LUB 11 HLIS; HNUB CEV LUB TUAM TSEV LAS TES LAAS (Z 2: 13-22)
Kwv tij Hmoob sawv daws, hnub no lub Koom Txoos ua hmoov cev lub Tuam Tsev Las Tes Laas rau Tswv Ntuj. Lub tsev teev Ntuj no yog lub tuam tsev loj tshaj plaws nyob hauv tuam ceeb Los Mas, yog lub tuam tsev Vaj Qhia ua tus tswj, yog lub tuam tsev niam hauv txhua lub tsev teev Ntuj tag nrho thoob ntiaj teb.
Kwv tij Hmoob sawv daws, hnub no lub Koom Txoos thiaj zoo siab cev lub Moo Zoo raws li tus Hauv Paus Xa Lus Zam phau ntawv; yog zaj hais txog thaum Huab Tais Yes Xus ntiab cov tub luam tawm hauv lub Tuam Tsev Teev Ntuj.
Tos Huab Tais Yes Xus ntiab cov tub luam tawm mus vim tias lub Tuam Tsev Teev Ntuj yog lub Tsev Ntshiab rau teev hawm Huab Tais Tswv Ntuj, yog Tswv Ntuj lub chaw nyob. Tsis phim yuav muab qhov chaw ntshiab los ua lag luam, los ua chaw nrhiav nyiaj, los ua tej yam tsis huv. Huab Tais Yes Xus hais tias “Nej tshem tej ntawd tawm hauv no mus. Nej tsis txhob muab kuv Txiv lub Tuam Tsev los ua ib lub tsev ua luam ntxiv.”
Nyob hauv Mas Tais, Mas Kos, thiab Lus Kas Ntawv Moo Zoo, mas peb kuj yuav pom Huab Tais Yes Xus hais ntxiv tias “Ntawv sau hais tias ‘Kuv lub tsev yuav hu ua tsev teev Ntuj. Hos nej, mas nej muab kuv lub tsev ua tub sab lub qhov nkaum.”
Kwv tij Hmoob sawv daws, niaj hnub no nyob His Xas Lais teb tsis muaj lub Tuam Tsev Teev Ntuj ntxiv, vim tias txij thaum Huab Tais Yes Xus tuag theej peb cov txhaum tas, mas Tswv Ntuj lub Tuam Tsev tsis nyob hauv His Xas Lais teb lawm, tab sis yog nyob hauv cov neeg ntseeg sawv daws lub cev. Tas ib tsoom neeg ntseeg hloov ua lub Tuam Tsev rau Huab Tais Leej Ntuj Plig nyob.
Yog li mas lub Moo Zoo hnub no thiaj yog ntuas peb sawv daws, kom peb tsis txhob cia peb lub cev, peb lub siab lub tswv yim ua chaw rau dab phem ntxias neeg tau ua qhov nkaum. Peb yuav tau ua lub tsev teev Ntuj ntshiab.
Peb yuav txais Huab Tais Yes Xus los nyob hauv peb nruab siab, peb cia Huab Tais Yes Xus ntiab tus dab tawm hauv peb mus, peb cia Huab Tais Yes Xus tuaj ntxuav peb lub tswv yim, hloov dua lub siab tshiab rau peb.
Kwv tij, tsis hais peb yog neeg muaj txhaum loj thiab hnyav npaum cas, peb nyob hauv qhov txhaum los tau pes tsawg xyoo; mas tsis yog ib yam nyuaj rau Huab Tais Yes Xus li. Huab Tais Yes Xus hais tias “Nej rhuav nej lub qub siab pov tseg mas, peb hnub xwb kuv yuav rov txhim tau lub siab tshiab rau nej.”
Nyob hauv hnub ua hmoov cev lub Tuam Tsev Las Tes Laas rau Tswv Ntuj no, thov kom peb tsoom neeg ntseeg sawv daws, peb cev peb lub cev, peb lub siab lub ntsws ua ib tsev ntshiab rau Huab Tais Tswv Ntuj.
