ZAJ NYEEM HNUB TIM 9 LUB 6 HLI 2025
HNUB NCO TXOG MAB LIAB UA KOOM TXOOS LEEJ NIAM
COV LUS NYOB HAUV ZAM NTAWV MOO ZOO (Z 19: 25-34)
Kwv tij Hmoob sawv daws, xyoo 1964 lub 11 hlis tim 21 thaum tsoom Tswv Qhia hauv lub Koom Txoos tab tom ua Rooj Ncauj Lus Vas Tis Kas Ob, Vaj Qhia Paj Lug 6 tau zeem tseeb txog ib nqe lus ntseeg tias ‘Mab Liab yog Koom Txoos leej niam’. Los txog xyoo 2018 lub 2 hlis tim 11 Vaj Qhia Fas Ntshis Kus tau tshwj Hnub Ob tom qab hnub hwm Leej Ntuj Plig nqes los cia ua lub Txoos nco txog Mab Liab ua Koom Txoos leej niam, thiab cev zaj hais txog niam Mab Liab sawv nyob ntawm Huab Tais Yes Xus tus ntoo cuam raws li Zam Ntawv Moo Zoo rau lub Txoos tau nyeem; yog zaj Ntawv Moo Zoo raws li hnub no peb tau hnov ua ntej ntawd.
Nyob hauv zaj Ntawv Moo Zoo, peb hnov Huab Tais Yes Xus hais rau nws niam Mab Liab tias “Niad, tus ntawd yog koj tus tub.” Lo lus no yog Huab Tais Yes Xus tab tom muab tas nrho nws cov thwj tim cob rau niam Mab Liab kom tau ua niam Mab Liab cov me nyuam.
Yog peb nyeem hauv phau ntawv Hauj Lwm mas peb yuav pom tias muaj ob peb tug poj niam nrog nraim cov thwj tim, nyob hauv hnub Leej Ntuj Plig nqes los; ib tug yog niam Mab Liab. Tom qab ntawd, niam Mab Liab kuj tseem nrog nraim cov ntseeg hauv lub Koom Txoos ua hauj lwm; yam li nrog lawv teev Ntuj, mloog cov Hauv Paus Xa Lus qhia Huab Tais Yes Xus cov lus, ua kab ke lov mov.
Yog peb muab cov phau Ntawv Moo Zoo tag nrho los ua tib zoo saib, peb pom tias txij thaum pib Huab Tais Yes Xus lub neej mus txog thaum xaus, puav leej pom muaj niam Mab Liab nrog nraim Huab Tais Yes Xus.
Tus ntxhais Mab Liab mloog tus Tshiab hais, ces Huab Tais Yes Xus xeeb rau hauv nws lub cev. Yug tau tus me nyuam Yes Xus, Mab Liab coj mus cev rau Tswv Ntuj hauv lub Tuam Tsev Teev Ntuj. Thaum Huab Tais Yes Xus muaj 12 xyoos raws li cov Yus Das kev cai, mas yog tus me nyuam pib nto hluas, Mab Liab nrhiav tau Huab Tais Yes Xus nyob hauv lub Tuam Tsev Teev Ntuj. Huab Tais Yes Xus nto 30 xyoo, nws pib leg Leej Txiv Tswv Ntuj txoj hauj lwm cawm neeg, mas muaj niam Mab Liab yog tus hais kom Huab Tais Yes Xus pab hloov cov dej ua cawv nyob hauv rooj tshoob nyob Kas Nas. Niam Mab Liab nrog Huab Tais Yes Xus mus tshaj lub Moo Zoo thoob xeev Nkas Lis Lais thiab Yus Das teb. Hnub Huab Tais Yes Xus raug txom nyem, muaj niam Mab Liab nyob ib sab. Thaum Huab Tais Yes Xus nyob saum ntoo cuam, niam Mab Liab nyob hauv qab ntoo cuam koom nrog nws Leej Tub ris kev mob kev ntsaj. Sij hawm Huab Tais Yes Xus txoj sia tu, niam Mab Liab puag rawv Huab Tais Yes Xus rau hauv nws xub ntiag. Hais tau tias niam Mab Liab koom nrog nws Leej Tub ua Tswv Ntuj txoj hauj lwm thiab taug kev txom nyem.
Niam Mab Liab thiaj yog tus piv txwv hais txog kev ntseeg thiab nyiam Huab Tais Tswv Ntuj. Li ntawd, tas tsoom ntseeg hauv lub Koom Txoos thiaj saib niam Mab Liab yog sawv daws niam hauv txoj kev ntseeg, tsoom ntseeg npuab lub Koom Txoos thiaj cav tias Mab Liab yog Koom Txoos leej niam.
Kwv tij Hmoob, hnub no peb nco txog Mab Liab ua Koom Txoos leej niam, peb saib nws yog tus piv txwv, tus qauv rau peb yoog raws. Yog li thaum peb mloog lub Moo Zoo hnub no lawm, xav kom peb ua xws li niam Mab Liab, sawv ruaj nreb nyob hauv qab ntoo cuam. Txawm tias peb yuav tu siab, mob siab, txom nyem npaum cas, peb yuav tsis tso kev ntseeg txog Yes Xus pov tseg.
Zoo siab cev tas peb lub neej rau Huab Tais Tswv Ntuj ua tus coj, txaus siab txais tej xwv txheej tuaj nphav peb thaum tig los ua neeg ntseeg.
