Niaj xyoo mas lub Koom Txoos yeej tsa kom muaj hnub hwm cov Leej Ntshiab nto npe hauv lub Koom Txoos lawm, tiam sis nyob hauv ntiaj teb no muaj coob leej ntau tus lawv tau ua neej raws Tswv Ntuj siab nyiam, lawv tau tu siab rau lawv cov txhaum thiab tig los yuav siab tshiab ntseeg Huab Tais Yes Xus thiab ua raws li Huab Tais Yes Xus lo lus qhia. Thaum lawv tso ntiaj teb no tseg mas lawv tau ua ib tug Ntshiab nyob saum Tswv Ntuj lub Ceeb Tsheej lawm. cov Ntshiab no yog cov peb tsis paub lawv npe, peb tsis tau hnov txog lawv lub neej dua, ces peb thiaj hu lawv sawv daws ua ‘Tsoom Leej Ntshiab’.
Koom Txoos Kav Tos Liv tsa hnub no los hwm lawv, kom peb nco tias tseem tshuav ib cov Leej Ntshiab nyob saum Ntuj, thiab kom peb muaj ib lub hom phiaj tias muaj ib hnub peb yuav tau mus koom nrog lawv ua ke.
Lub keeb puam ntawm hnub hwm tsoom Leej Ntshiab yog li no : Xyoo 155 cov ntseeg tau tuaj sib txoos ua hmoov nco txog Leej Ntshiab Pos Lis Kas Pos vim lawv nyiam nws thiab hwm nws heev. Los txog xyoo 609 ntawd, tus vaj Npos Kas tau muab lub tsev teev hawm Npes Tis Oos los txi rau Tswv Ntuj. Vaj Qhia Npos Nis Fas tim 4 thiaj hloov lub tsev teev hawm cov dab Los Mas no ua ib lub tsev teev Ntuj muaj lub npes tias ‘Tsev Teev Ntuj Hwm Niam Mab Liab Thiab Cov Tim Khawv’. Tsis tas li, Vaj Qhia kom 28 lub tsheb nees thauj cov tim khawv li pob txha hauv Kas Tas Koos los tso rau hauv lub tsev teev Ntuj no, ces lawv thiaj ua hmoov loj rau hnub tim 13 lub 5 hlis los hwm niam Mab Liab thiab cov tim khawv.
Txog caij Vaj Qhia Nkes Nkos Lis tim 3 tswj lub Koom Txoos, nws tau txhim tsa ib lub me nyuam tsev teev Ntuj nyob hauv lub tuam tsev teev Ntuj hwm Leej Ntshiab Pob Zeb los nco txog cov Leej Ntshiab sawv daws. Vaj Qhia Nkes Nkos Lis tim 3 thiaj hloov ‘Hnub hwm niam Mab Liab thiab cov tim khawv’ ua ‘Hnub hwm tsoom Leej Ntshiab’ thiab hloov caij nyoog los rau tim 1 lub 11 hlis.
