Huab cua pauv ntxeev thiab kev ntes ntses ntau, ua teeb meem rau kev ntes ntses Thus Naj nyob Is Ntos Nes Xias teb. (Climate change and overfishing hit Indonesia tuna catch)

Huab cua pauv ntxeev thiab kev ntes ntses ntau, ua teeb meem rau kev ntes ntses Thus Naj nyob Is Ntos Nes Xias teb. (Climate change and overfishing hit Indonesia tuna catch)

Yav tag los Solihin ua cov hauj lwm ntim ntses Thus Naj rau hauv kas poom, tab sis nyem no nws tsav tsheb Taxi xws li ntau leej neeg nyob Is Ntos Nes Xias teb.  Tus txiv neej uas nws hnub nyoog 28 xyoo no, nws tau txais kev txom nyem hauv kev ntes ntses thiab huab cua pauv ntxeev. Qhov no yog ib qho piv txwv ntawm yam uas nws tau ua dhau los vam meej kawg, thiab rais ua ib lub Koom Haum uas raug kaw tseg. Kev ntes ntses kuj tau tsawg zuj zus, tus nqi muag hauv tej kiab khw kuj tsis ruaj khov thiab cov neeg poob hauj lwm ntau txhiab leej. Thiab cov Koom Haum ntes ntses hauv hiav txwv puav leej tau txais kev kub ntxhov.

Hauv lub qab xyoo 2023, Solihin pib xav tias nws yuav nrhiav lwm txoj kev nrhiav noj tshiab thiab tsis ntes ntses lawm, yog tias nws yuav yug nws tsev neeg kom nyob tau.    

Thaum ntes tau ntses tsawg zuj zus, nws tus tswv ntiav zog kuj khwv tsis tau nyiaj thiab qhov kawg nws kuj nrhiav tau lwm txoj hauj lwm tshiab. Tam sim no Solihin yog tsav tsheb Taxi nyob hauv lub nroog Bitung ntawm ntug hiav txwv.

Nws hais tias : “Kuv txiav txim siab tawm mus.” Thiab nws tsis tig rov qab.

Hauv lub tuam tsev uas Solihin ua hauj lwm los tau 2 xyoos, nws tau txais nqi zog ib lub hlis yog 2,500,000 Rupia los yog 153 dos las. Nws tus nqi zog qis dua tus nqi zog txheej qis thiab nws kuj tau txais nyiaj OT los yog nyiaj ua hauj lwm dhau sij hawm, tsis kav nyiaj kuj tsis txaus nws them nqi tsev thiab tsis txaus yug nws poj niam me nyuam. Vim nws muaj ib tug me nyuam hnub nyoog 3 xyoos.

Tam sim no Solihin nrhiav tau nyiaj ib lub hlis yog 4,500,000 Rupia los yog 300 dos las hauv kev tsav tsheb Taxi thiab ntawm cov neeg tuaj ncig tsham lub nroog Bitung.

Lub nroog Bitung muaj lub tshav nkoj uas loj kawg nyob hauv lub teb chaws thiab yam nto npe tshaj yog hom ntses Thus Naj.

Bitung yog qhov chaw uas muaj tshaj 100 lub Koom Haum ntes ntses Thus Naj, lawv xa ntses tawm mus thiab muab ntses ntim rau hauv kas poom xa mus thoob As Xias teb, As Xias nrab thiab As Mes Lis Kas teb. Hais txog cov hauj lwm ntes ntses cov Koom Haum ntiav tub zog li ntawm 3,200,000 leej, txhais tau tias yog 1 feem pua ntawm tas tsoom pej xeem Is Ntos Nes Xias. Raws li tej ntaub ntawv ntawm lub pwm tsav khiav nkoj thiab ntes ntses nyob Is Ntos Nes Xias teb tshaj tawm.

Is Ntos Nes Xias teb yog lub teb chaws ua cov txhiam xws hiav txwv loj tim 2 nyob ntiaj teb no. Nws yog tim 2 los ntawm Suav teb. Xyoo 2022 Is Ntos Nes Xias teb ntes tau ntses li ntawm 25 plhom ton. Tab sis ob peb xyoos dhau los no, Thaib teb tsis tuaj yeem ntes tau ntses raws li qhov lawv teeb tseg. Cov txhiam xws hauv hiav txwv tsuas yog 2 feem pua xwb, ces GDP hauv lub teb chaws qis dua tseem hwv tus zauv uas teeb tseg yog 4 feem pua. Kev ua kas poom ntses hauv xyoo 2014, ib hnub yuav tsum tau txog 70,000 kis lus. Tab sis los txog rau xyoo 2023, tsuas ua tau 40,000 kis lus lawm xwb. Thiaj ua teeb meem rau cov Koom Haum ntes ntses nyob Bitung loj kawg. Tib lub caij ntawd cov tub zog raug rho tawm li ntawm 14,000 leej.

Kev pauv ntxeev ntawm huab cua ua rau ntau hom ntses nyob hauv hiav txwv khiav mus nrhiav tej niam dej txias, thiab huab cua kub kuj ua rau cov caij ntes ntses hloov tag. Warjono hais tias nws ntsia pom huab cua hloov thawj zaug yog nyob hauv 7 xyoo tag los. Thaum ntawd nws tsis tuaj yeem vam txog kev ntes ntses Thus Naj los yug nws tsev neeg. Warjono uas yog ib tug neeg ntes ntses, nws muaj 52 xyoos.  Nws tuaj ntawm lub nroog Pekalongan uas nyob hauv lub xeev Ntsas Vas nruab nrab tuaj. Yav tag los nws tawm mus ntes ntses ib zaug, mas tau 1,000 kis lus. Txhua zaus nws yuav tsum tsav nkoj ntes ntses mus txog lub hiav txwv Nas Tus Nas uas nyob ze Mas Les Xias teb. Nws mus ib zaug yog siv sij hawm ntau lub lis piam. Tab sis yog vim huab cua pauv ntxeev thiab ntsuas tsis tau lub caij, ua rau nws kev ntes ntses tsawg lawm ib nrab nyob hauv cov thaj tsam uas nws kheev kheev mus.

Warjono hais tias : “Yog koj tsis paub mem huab cua thiab tsis paub txog seem cua xws li peb yawg yav tag los, mas txhais tias koj tsis tuaj yeem mem tau kev ntes ntses thiab.” Nyem no kev noj kev haus nce siab tuaj, txhua yam puav leej kim tas, kev ntes ntses kuj ntes tau tsawg dua qub. Li ntawd, qee zaus peb yuav tsum mus qiv nyiaj hauv cov tuam txhab ceev nyiaj los them nuj nqis thiab siv ua lub neej, los yog pab kom peb tsev neeg tau rov qab mus vaj mus tsev. Vim lub teb chaws nyob hauv hiav txwv, cov neeg Is Ntos Nes Xias yuav luag 7 plhom leej thiaj khwv noj khwv haus nyob hauv kev ntes ntses xa mus muag. Cov lus no yog hais raws li ntiaj teb lub tuam txhab ceev nyiaj tshaj tawm.

Txawm li cas kuj xij, raws li cov tseem hwv Is Ntos Nes Xias teev tseg, mas cov pej xeem uas nyob ntawm ntug hiav txwv 10 feem pua tseem yog neeg pluag txom nyem. Xyoo 2010 tsoom pej xeem Is Ntos Nes Xias uas lawv ua lub neej ntes ntses yog 2,160,000 leej, tab sis xyoo 2019 tshuav 1,830,000 lawm xwb.

Huab cua pauv ntxeev thiab txhua yam nyob ib puag ncig piam sij, yog los ntawm kev luaj hav zoov thiab cov Koom Haum ntes ntses, thiaj ua rau txhua yam poob qis tuaj. Ridwanuddin tus thawj coj kev txuag dej hiav txwv WALHI hais cov lus no.

Vim cov huab cua phem kheev kheev tshwm sim, thiaj ua teeb meem rau kev lag luam thiab zej zog, ces cov neeg ntes ntses yuav tsum tso lawv txoj hauj lwm tseg thiab khiav mus nrhiav hauj lwm tshiab ua nyob rau lwm qhov chaw.

Is Ntos Nes Xias teb yog lub teb chaws ntes ntses thiab xa ntses mus muag nyob thoob ntiaj teb li ntawm 1 feem 4. Tab sis kev ntes ntses nyob Is Ntos Nes Xias raug ntsia pom tias muab ua heev dhau lawm, vim kev ntes ntses txhab ntxiv tas zog.

Kev soj ntsuam tshaj tias : xyoo 2022, Is Ntos Nes Xias teb xa ntses tawm mus muag li ntawm 91,000 tawm ton. Tab sis xyoo 2023 uas yog xyoo tom qab, cov ntses xa tawm mus muag tsuas tshuav 48,000 ton lawm xwb.

Sudarta uas nws yog tus thawj tswj ntawm lub Koom Haum ntses Thus Naj los yog (ATLI) nyob Is Ntos Nes Xias teb, yog lub Koom Haum sawv cev ntawm cov neeg ntes ntses Thus Naj hais tias : “Is Ntos Nes Xias teb pib ntes cov ntses me heev zuj zus, vim kev ntes ntses tau tsawg thiab cov nkoj ntes ntses kuj muaj tsawg lawm.” Nyob hauv lub hiav txwv Benoa, Npas Lis kuj yog ib lub tshav nkoj ntes ntses uas suav tau tias loj kawg nyob Is Ntos Nes Xias teb thiab.

Xyoo 2019, cov nkoj ntes ntses Thus Naj muaj txhab ntxiv li ntawm 1,000 lub, tab sis xyoo no tsuas tshuav 275 lub lawm xwb. Vim peev nyiaj txiag siv khiav nkoj nce siab tuaj thiab hom ntses Thus Naj ntes nyuab heev.

Kastolani uas nws yog ib tug neeg ntes ntses, nws xub paub los ntev lawm tias huab cua pauv ntxeev, yuav ua teeb meem rau lawv txoj kev ntes ntses.

Ib tug tsav nkoj ntes ntses Thus Naj hauv lub hiav txwv Npes Nuas, uas nws muaj 50 xyoo. Nws hais tias yav tag los ib lub hlis lawv ntes ntses Thus Naj tau li ntawm 40 txog 60 ton, tab sis nyem no tsuas ntes tau ib nrab lawm xwb. Kastolani pom tias cov neeg ntes ntses nyob hauv nws lub nkoj, lawv muab siab rau thiab ua tas zog kom ntes tau ntses ntau, tab sis kuj ntes tau ntses tsawg zuj zus. Nws hais tias yog yuav ua kom nyob taus, dhau ntawm qhov lawv ua hauj lwm ib hnub 12 teev lawm, lawv tsis muaj lwm txoj kev tawm. Thiab yuav tsum tsav nkoj mus deb dua qub, kom tau nrhiav ntes cov ntses uas khiav lawm. Lawv mus ib zaug, mas lawv nyob hauv hiav txwv li 2-3 lub hlis mam rov los txog tsev. Txawm li ntawd tsis kav cov tub zog hauv nws lub nkoj, lawv tsuas tau txais nyiaj hli ib lub hlis yog 1,800,000 Rupia xwb.

Kastolani hais ntxiv tias : “Tej zaum huab cua sov tseem yuav nce siab tuaj. Yog tias cov huab cua sov hauv dej hiav txwv nce siab dhau, mas cov ntses nyob hauv yuav tsiv mus nrhiav tej qhov chaw uas dej txias. Yog tsis khiav, ces cov ntses yuav tuag tas.”

Cov tseem hwv tab tom xa kev pab mus rau cov neeg ntes ntses uas lawv khwv tsis tau nyiaj. Tsaib no, tseem hwv tau tawm txoj cai ntes ntses uas teeb tseg tias pub ntes ntses npaum li cas xwb. Vam tias yuav pib muab txoj cai no los siv rau lwm xyoo, thiab tso cai rau ntes ntses raws li qhov teeb tseg nyob hauv 6 thaj tsam.

Lub hom phiaj yog : Ua kom cov tsiaj muaj sia nyob hauv hiav txwv huam vam thiab  teeb lub caij rau kev ntes ntses. Kom cov neeg ntes ntses thiaj li tau nyiaj hauv lawv txoj kev ntes ntses, raws li Latif tus thawj tswj ntawm tseem hwv cov hauj lwm hu ua Capture Fisheries uas lub pwm tsav khiav nkoj thiab lub pwm tsav ntes ntses hais tseg cia. Latif hais tias lub hom phiaj no yog ua kom “tau txuag txhua yam muaj txoj sia thiab cov Koom Haum xwb.”

Kwv tij Hmoob sawv daws ! Hnub no peb tham txog kev ntes ntses ntau ntau, nws ua teeb meem rau cov neeg ntes ntses Thus Naj nyob Is Ntos Nes Xias teb. Is Ntos Nes Xias teb yog lub teb chaws uas muaj pov txwv ntau tshaj 10 txhiab lub thiab nyob xyaw dej hiav txwv, ces tsoom pej xeem feem coob lawv lub neej yog ntes ntses muag. Tab sis yog vim huab cua pauv ntxeev thiab tib neeg ntes ntses heev dhau, ces thiaj ua teeb meem rau tsoom pej xeem.

Peb haiv hmoob tsis yog cov neeg nyob ze dej hiav txwv, peb yog nyob pem tej toj roob hauv pes. Peb yuav sib pab txuag hav zoov xyoob ntoo, thiab txuag txhua hom tsiaj muaj txoj sia nrog rau txhua yam nyob ib puag ncig peb, kom lub ntiaj teb nyob xwm yeem raws li qhov Tswv Ntuj tsim.

Thov Huab Tais Yes Xus Pleev lub txiaj ntsim nrog nej nyob, ua nej siab kaj lug !

Peb mam sib ntsib dua, nej sawv daws nyob zoo !