Cov tub rog Is Tas Lias uas saib xyuas kev thaj yeeb ntawm lub Leej Haum Kuj, muab tus mlom Yes Xus uas raug tsoo nyob Lis Npaas qab teb rov los teeb dua tshiab

Tus thawj pwm tsav Giorgia Meloni hais tias : “Cov tub rog tuav kev thaj yeeb ntawm lub Leej Haum Kuj uas tuaj Is Tas Lias teb tuaj, tau muab tus mlom Yes Xus uas raug cov tub rog His Xais Lais xuas rauj tsoo nyob Lis Npaas qab teb rov los teeb dua tshiab. Tus mlom Yes Xus dai saum Ntoo Cuam teeb nyob hauv lub zos Dable, uas yog ib lub zos ntseeg nyob Lis Npaas qab teb ze His Xas Lais ciam teb.” 

Cov duab uas tso tawm nyob Online pom cov tub rog His Xas Lais xuas rauj tsoo tus mlom lub taub hau, ces ua rau txhua txhia lub teb chaws tsis txaus siab. Meloni hais cov lus ua tsaug rau lub Leej Haum Kuj los yog UNIFIL cov tub rog tuav kev thaj yeeb uas tuaj Is Tas Lias teb tuaj. Ua tsaug qhov uas lawv pub tus Ntoo Cuam tshiab rau lub zos Dable nyob Lis Npaas teb. Nws hais tias : “Kev rov teeb dua tus mlom tshiab no, yog “lo lus muaj zog hauv kev cia siab, kev sib hais haum thiab kev thaj yeeb.”

Cov tub rog His Xas Lais hais lub lis piam tag los tias : “Lawv muaj ob tug tub rog yuav raug kaw raws txoj cai tub rog 30 hnub, thiab yuav raug rho tawm ntawm kev ua tub rog mus, vim nkawd tsoo tus mlom Yes Xus.”