Txoj kev koom ua lub Txoos Txi Ntuj hauv kab sab online yuav piv tsis tau rau txoj kev tuaj koom lub Thaj Txi Ntuj hauv tsev teev Ntuj.

Hnub tim 12 lub 8 hli tas los, Vaj Qhia rov tawm tuaj qhia Ntuj kev cai rau cov ntseeg tuaj tsham nws nyob hauv Leej Ntshiab Pob Zeb lub Tuam Tsev Teev Ntuj nyob tim Vas Tis Kas. Hnub no Vaj Qhia rov muab lub Rooj Ncauj Lus Vas Tis Kas Ob tsab ntawv ‘tshaj lus qhia txog Tuam Kev Teev Ntuj’ los yog Sacrosanctum Concilium los nthuav qhia rau sawv daws ntxiv. Vaj Qhia hais txog lub ntsiab hauv lub xyoo teev Ntuj thiab vam txog Vaj Qhia Pis Yus 12 lo lus tias ‘lub Koom Txoos cov ntees tsis yog cia rau nco txog cov xwm tshwm sim puag ntau txhiab xyoo thaud, tab sis yog cia rau tau pab cov ntseeg kom pom txog Huab Tais Yes Xus txoj kev cawm ntiaj teb neeg nyob hauv lawv txoj sia’.

Vaj Qhia hais li no “Lub xyoo teev Ntuj tsis yog qhov tias peb muab cov xwm thaud los qog los ua raws yam tsis muaj sia, los yog kom cim tau tiam dhau tiam. Tab sis lub xyoo teev Ntuj yog Leej Pleev tus ib txwm muaj txoj sia nyob hauv lub Koom Txoos ntag. Li ntawd, peb tsum nkag siab tias lub xyoo teev Ntuj yog txoj kev rov txhim tsa Leej Pleev txoj num cawm ntiaj teb neeg nyob hauv ntiaj teb liv xwm tas mus li. Qhov kom tau ntsib Huab Tais Yes Xus tus tau tuag thiab sawv rov los thiaj li yog lub hauv ntsis lub Koom Txoos coj mus kom txog.”

Vaj Qhia taw tias lub xyoo teev Ntuj lub plawv tsis yog pib ntawm cov hnub nyoog loj hauv lub xyoo, tab sis yog pib ntawm ‘Hnub Chiv’. Lub Rooj Ncauj Lus Vas Tis Kas Ob hais tias Hnub Chiv yog lub xyoo teev Ntuj tus cag thiab lub plawv. Leej Ntshiab Vaj Qhia Zam Paj Lug 2 tau nthuav tseg tias ‘Hnub Chiv yog Tswv Ntuj hnub, yog lub Koom Txoos hnub, yog ntiaj teb neeg hnub, thiab yog hnub loj dua tas txhia hnub.’

“Hnub Chiv yog Hnub Hla hauv lub lis piam, yog hnub pab peb nco txog Huab Tais Yes Xus sawv rov los thiab ua kom Huab Tais Yes Xus tau sawv rov los rais ua Huab Tais Yes Xus sawv rov los ziag no tam sim no kiag. Hnub Chiv xeeb hauv kev sawv rov los tuaj thiab txiav dhau neeg lub caij nyoog tsis hais hli, xyoo, thiab tiam. Hnub Chiv thiaj zoo li rab xub taw mus rau lub phiaj Leej Pleev yuav rov tuaj.”

Yam tseem ceeb thiab yog lub hauv paus hauv kev teev Ntuj Hnub Chiv yog ‘koom txais lub Cim Yug’ vim tias kev txais Ntuj Lus thiab txais Leej Pleev lub Cev tsum coj cov ntseeg los sib txoos nyob hauv tib lub cev. Li ntawd, thaum cov ntseeg tuaj ua lub Txoos Txi Ntuj, yog cov ntseeg tuaj koom nyob hauv Tswv Ntuj thiab ua tim khawv zeem tseeb tias cov ntseeg yog Leej Pleev tug thiab cov ntseeg pheej xeeb rau lub Koom Txoos.

Yog li mas kev nyob tom tsev koom lub Txoos nyob hauv cov kab sab online thiaj hloov cov neeg ntseeg txoj kev tuaj sib txoos ua ke txi Ntuj tsis tau. Tsis tas li ntawd xwb, kev tuaj koom lub Txoos Txi Ntuj kuj tsis yog tuaj zaum ntsia tsis muaj feem nrog. Lub Txoos Txi Ntuj yuav tiav tau tsum yog yus muaj feem xyuam koom nrog. Yog li Vaj Qhia thiaj thov txhib txhua leej txhua tus txhua pab txhua pawg kom tsis txhob muaj chaw xyeej tsis tau tuaj mus koom lub Txoos Txi Ntuj hauv Hnub Chiv tom tsev teev Ntuj.