ZAJ NYEEM HNUB TIM 14 LUB 12 HLIS: HNUB NCO TXOG LEEJ NTSHIAB ZAM NYIAM NTOO CUAM
COV LUS NYOB PHAU NTAWV HIS XAIS (HX 48: 1-4, 9-11)
LUB MOO ZOO RAWS LI MAS TAIS (MT 17: 9-13)
Kwv tij Hmoob sawv daws, hnub no peb hnov hais txog tus Yaj Saub Es Lias. Huab Tais Yes Xus hais tias tus Ntxuav Plig Zam yog tus Es Lias tshiab.
Yaj Saub Es Lias lub npe txhais tias ‘Yas Ves yog Tswv Ntuj’. Nws yug los nyob ze xyoo 875 ua Yes Xus ntej, nws tuaj ntuas cov His Xas Lais qaum teb tias tsuas muaj tib tug Tswv Ntuj xwb yog Yas Ves tus npo cov His Xas Lais ntawm cov Hais Nkws Tos kwv quab yuam ua qhev los, yog li mas cov His Xas Lais yuav tsis txhob teev cov dab Npas Has ua lawv cov Tswv Ntuj. Cov His Xas Lais yuav tau tso siab rau Yas Ves Tswv Ntuj xwb.
Kwv tij Hmoob, Tswv Ntuj lub npe ‘Yas Ves’ mas cov His Xas Lais thiab tsoom nseeg sawv daws tshwj cia ua lub npe ntshiab, ces thaum sawv daws tuav txog Tswv Ntuj lub npe ‘Yas Ves’ mas sawv daws yuav hu tias ‘Huab Tais’ los yog ‘Huab Tais Ntuj’ ces thaum sawv daws hais tias ‘Yas Ves Tswv Ntuj’ mas sawv daws thiaj hais zoo li no tias ‘Huab Tais Tswv Ntuj’.
Kwv tij, nyob hauv phau ntawv Npes Xis Las peb hnov hais tias Ntuj xaiv Es Lias ua tus qhuab qhia tib neeg thaum lub caij kawg. Nyob hauv Ntawv Ntshiab Cog Lus Qub mas cov Yaj Saub kuj hais tias thaum Tswv Ntuj tus Pleev yuav tuaj, mas Es Lias yuav xub los tso.
Kwv tij, Huab Tais Yes Xus qhia cov thwj tim tias tus Ntxuav Plig Zam yog tus Es Lias uas sawv daws hais txog. Zam yog tus tuaj tshaj rau cov Yus Das tias Huab Tais yog Tswv Ntuj, nws tuaj lawm; cov Yus Das yuav tau hloov siab tshiab tos txais Huab Tais.
Kwv tij Hmoob, Es Lias yuav yog tus tuaj ua kom Ntuj siab nqig, ua kom phaj txiv thiab phaj tub rov sib haum xeeb, tuaj tsa cov His Xas Lais lub hwj chim kom rov sawv siab. Zam Ntxuav Plig tuaj ntuas cov Yus Das kom tu siab rau lawv cov txhaum mas Huab Tais Tswv Ntuj thiaj tsis muab txim rau lawv, Zam Ntxuav Plig tuaj ntuas cov Yus Das kom rov tig los mloog Huab Tais Tswv Ntuj lus mas lawv thiaj rov los npuab tau Huab Tais Tswv Ntuj, Zam Ntxuav Plig tuaj ntuas cov Yus Das kom hloov siab tshiab mas lawv thiaj tsim nyog ua Tswv Ntuj haiv neeg, ces lawv yuav rov muaj hwj chim nyob ntawm txhua haiv neeg xub ntiag.
Kwv tij Hmoob, ob txhiab tawm xyoo tas los, Zam tawm tuaj ntuas cov Yus Das kom npaj txoj kev rau Huab Tais Yes Xus taug. Ob txhiab tawm xyoo tom qab no, lub Koom Txoos tseem ntuas peb cov neeg ntseeg kom npaj siab npaj ntsws tos Huab Tais Yes Xus yuav rov tuaj dua.
Hnub no, peb hnov hais txog tus Yaj Saub Es Lias lawm, yog li mas peb lub tshaj xo ZOO TSWV ZOV YAJ thiaj thov cev tus Yaj Saub Es Lias tus yam ntxwv rau nej paub txog; yam li thaum tus poj vam Yes Xes Npes coj cov dab Npas Has los teev hauv tus vaj lub tuam tsev, mas Es Lias mus ntuas tus vaj kom txhob ib siab rau cov dab Npas Has, tsis li ntawd mas tas His Xas Lais qaum teb yuav raug xwv txheej. Es Lias nrog cov leej choj teev cov dab Npas Has sib twv saib lawv cov dab yog tseem Tswv Ntuj los Huab Tais yog tseem Tswv Ntuj. Es Lias ua siab loj tiv cov neeg teev cov dab Npas Has mus txog qhov kawg.
Kwv tij Hmoob, lub caij Tos Huab Tais no, peb thiaj yuav ua xws li Es Lias tus piv txwv; pheej xeeb rau Tswv Ntuj, ua tim khawv zeem tseeb txog Tswv Ntuj, ua siab loj tiv cov neeg tsis ntseeg txog Tswv Ntuj; ces peb yuav hais tau tias ‘Huab Tais yog Tswv Ntuj; nws yog peb tus Tswv Ntuj, nws tuaj lawm.”
