ZAJ NYEEM HNUB TIM 2 LUB 12 HLIS: HNUB OB, LUB LIS PIAM 1 CAIJ TOS HUAB TAIS
COV LUS NYOB PHAU NTAWV HIS XAIS (HX 2: 1-5)
LUB MOO ZOO RAWS LI MAS TAIS (MT 8: 5-11)
Kwv tij Hmoob sawv daws, nyob hauv lub Moo Zoo hnub no peb hnov hais txog zaj tus xab txheeb Los Mas tuaj thov kom Huab Tais Yes Xus pab cawm nws tus tub txib. Tus xab txheeb hais tias “Huab Tais, kuv tus tub txib pw tom tsev, nws tes taw tuag tas. Nws mob heev kawg.”
Tus xab txheeb lo lus no tsom kom pom tias nws hwm Huab Tais Yes Xus heev, nws thiaj hu Huab Tais Yes Xus ua ‘Huab Tais’.
Lo lus ‘Huab Tais’ yog lo lus cov tub txib, cov qhev, cov neeg hwj chim me siv los hu tus neeg muaj hwj chim los yog hu lawv tus tswv; yam li peb hnov hauv cov dab neeg Hmoob hais txog txiv huab tais thiab nraug ntsuag.
Tus xab txheeb hu Yes Xus ua ‘Huab Tais’ mas yog nws hwm thiab lees tias Huab Tais Yes Xus yog tus loj dua nws thiab muaj hwj chim dua nws.
Tus xab txheej hais tias “Kuv tus tub txib pw tom tsev.” Yog peb ua tib zoo saib raws li cov lus Hes Las mas tus xab txheeb hais tias “Kuv tus me tub txib.”
Nws hut us tub txib ua ‘me tub txib’ yog nws hlub tus tub txib no kawg, nws hlub yam li yog nws ib tug me nyuam.
Kwv tij Hmoob, peb tig ntsia hauv peb, saib peb puas muaj lub siab hwm thiab hlub lwm tus neeg xws li tus xab txheeb Los Mas no.
Tus xab txheeb hais ntxiv tias “Huab Tais, kuv tsis tsim nyog koj chaws los hauv kuv tsev, tsuav yog koj hais ib los lus xwb ces kuv tus tub txib yuav zoo hlo.”
Lo lus no yog tsom kom pom tias tus xab txheeb no yog ib tug neeg nyiam ua neeg me tiag tiag, nws lees tias nws yog pej kum neeg mas nws yog ib tug neeg muaj txhaum ces tsis tsim nyog cia ib tug neeg tsis muaj txhaum yuav chaws los hauv nws tsev.
Lo lus no tseem tsom kom pom tias tus xab txheeb no ‘ntseeg txog Yes Xus’, nws ntseeg tias tsuav Huab Tais Yes Xus hais tib lo lus xwb mas nws tus tub txib yeej zoo hlo.
Kwv tij, peb rov tig los saib hauv peb, saib peb puas ua tus neeg me thiab muaj lub siab ntseeg xws li tus xab txheeb no.
Thaum Huab Tais Yes Xus hnov tus xab txheeb cov lus thov, Huab Tais Yes Xus ua li cas?
Huab Tais Yes Xus hais tias “Kuv yuav musk ho nws.”
Huab Tais Yes Xus tsis ua xyem xyav tias tus neeg ntawd yog cov Los Mas, kuv tsis tsim nyog yuav mus tom nws tsev. Huab Tais Yes Xus hnov tus xab txheeb hais txog nws tus tub txib mob hnyav, mas Huab Tais Yes Xus hlub tus tub txib.
Kwv tij Hmoob, Huab Tais Yes Xus lub siab hlub mas nws tsis cais tias yuav pub rau cov Yus Das xwb, nws pub rau txhua tus neeg hu txog nws.
Li ntawd, thaum peb vam txog thiab hu txog Huab Tais Yes Xus pab, mas Huab Tais Yes Xus yeej yuav pab peb xwb xwb li.
Kwv tij, Huab Tais Yes Xus tseem hais ib lo lus los ntuas nws cov thwj tim tias yuav muaj lwm cov neeg tsis yog haiv His Xas Lais tuaj koom Tswv Ntuj rooj qav vim lawv muaj lub siab ntseeg xws li tus xab txheeb no.
Tus Yaj Saub His Xais kuj tau hais Huab Tais Tswv Ntuj cov lus ceeb toom rau cov His Xas Lais ua ntej Huab Tais Yes Xus li 700 xyoo hais tias “Tas ib tsoom kuj cuab yuav khiav ua npoj ntws tuaj saum Huab Tais Ntuj lub roob.”
Kwv tij Hmoob sawv daws, tus xab txheeb no ntseeg tias Huab Tais Yes Xus lo lus muaj hwj huam tiag, tus xab txheeb no ua neeg me nyob ntawm Huab Tais Yes Xus xub ntiag, tus xab txheeb no hlub cov neeg me dua nws, tus xab txheeb no hwm cov neeg nws saib tias lawv muaj hwj chim; mas nws thiaj tau raws li nws cov lus thov.
Hnub no, yog Hnub Ob hauv thawj lub Lis Piam caij Tos Huab Tais, thov kom peb ntseeg ruaj tias Huab Tais Yes Xus yog Leej Lo Lus xeeb los ua neeg, ces peb yuav mloog Huab Tais Yes Xus thiab tso siab rau Huab Tais Yes Xus lo lus xws li tus xab txheeb hauv lub Moo Zoo hnub no.
Kwv tij, peb mloog Tswv Ntuj Lo Lus, thov kom hnub no peb ua tus neeg me tsis muab hlob, kom peb ntseeg txog cov lus tawm hauv Huab Tais Yes Xus lub ncauj los, thov kom peb txawj nyiam txawj hlub lwm tus neeg; mas peb thiaj yuav hais tau li tus xab txheeb no tias “Huab Tais, kuv tsis tsim nyog koj chaws los hauv kuv tsev, tsuav yog koj hais ib los lus xwb ces kuv tus tub txib yuav zoo hlo.”
