Tus sau: TP. Nyiaj Pov (1966), tus kho: Txawj Tsav Lauj Vaj Tawm
Mas Tais qhia Yes Xus lub keeb vim nws sau lub Moo Zoo rau cov Yus Das. Cov Yus Das hwm As Nplas Has ua lawv tus yawg koob xub tau txais lo lus foom hmoov zoo ntawm Huab Tais Tswv Ntuj los. Cov Yus Das tso siab tias tus yuav cawm lub ntiaj teb yog As Nplas Has ib tug xeeb ntxwv. Mas Tais thiaj xav qhia cov Yus Das tias Yes Xus yog As Nplas Has xeeb ntxwv tiag, ces cov Yus Das yuav ntseeg txog Yes Xus sai. Mas Tais txhob txwm tsis hais tias Yos Xes yug Yes Xus vim Yos Xes tsis yog Yes Xus tseem txiv, Mas Tais thiaj sau tias Mab Liab yug Yes Xus. Mas Tais faib Yes Xus lub keeb ua 3 txheej muaj 14 tiam neeg kom nco tau yooj yim. Yog zoo li txij As Nplas Has los txog Yes Xus muaj 42 tiam neeg, tab sis hais qhov tsawg ntshai muaj 75 tiam.
Nyob hauv Mas Tais cov lus no, tseem muaj 2-3 lo lus peb yuav tau paub txog; xws li lo lus tias ‘Pleev’, lo lus ‘Yes Xus’, lo lus ‘Yos Xes’ thiab lo lus ‘Mab Liab’. Lo lus ‘Pleev’ yog ntxeev los ntawm lo lus Hes Nplaws tias ‘Mes Xias’ (Messiah) thiab lo lus Hes Las tias ‘Khes Tos’ (Christ), txhais tias ‘tus tau txais roj pleev los ua vaj, los yog ua Leej Choj’. Lo lus ‘Yes Xus’ mas lus As Las Mais hais tias ‘Yos Hos Suas’ txhais tias ‘Tswv Ntuj cawm.
Ib tsoom phooj ywg Hmoob, kom peb nco tias thaum peb hais tias ‘Yes Xus Pleev’, mas peb yuav hwm Yes Xus ua ‘Vaj’ (King) thiab ua ‘Leej Choj’ (Priest), peb kuj yuav nco tias Yes Xus yog tus cawm lub qab ntuj neeg.
‘Yos Xes’ mas lus Hes Nplaws hais tias ‘Yosep’ txhais tias ‘Tswv Ntuj ntxiv rau’. Hos ‘Mab Liab’ mas lus Hes Nplaws hais tias ‘Maryam’ yog ncau ntawm cov Hais Nkws Tos lo lus ‘Mri’ los, txhais tias ‘Nyiam’. Thaum hais ua xeem lus Hes Las mas yuav hais tias ‘Maria’.
Peb tseem pom tias nyob hauv cov His Xas Lais txoj cai, mas thaum lawv qhaib ib tug ntxhais rau tus txiv neej twg, mas lawv saib tus ntxhais ntawd yog tus txiv neej ntawd poj niam ntag, yog yuav nrauj mas tsum ua ntawv sib nrauj. Yog li mas thaum Yos Xes yuav nrauj Mab Liab, nws kuj yuav tsum ua ntawv nrauj Mab Liab thiab.
Muaj ib qib lus hauv zaj no hais tias ‘Yos Xes yog ib tug neeg ncaj, nws tsis xav kom zeej tsoom hais lus xaiv txog Mab Liab, ces nws txiav siab nrauj Mab Liab twj ywm’.
Raws li cov His Xas Lais hais mas ‘tus neeg ncaj’ yog tus coj rawv txoj cai ces nws ua qhov yog nyob ntawm Tswv Ntuj xub ntiag. Yog li nyob hauv qib lus no mas cov kws Ntawv Ntshiab thiaj muab twm cia tias vim Yos Xes yog tus neeg coj rawv Txoj Cai, thaum nws pom tias Mab Liab xeeb tub mas raws kev cai Mab Liab thiab tus me nyuam yuav yog Yos Xes lub cuab tam, tab sis nws tsis xav txeeb lwm tus tej cuab tam los ua nws tug, nws thiaj xav nrauj Mab Liab ntsiag ntsiag. Tseem muaj tej tus hais tias Yos Xes hwm Mab Liab kawg, nws paub tias Mab Liab yog ib tug ntxhais tsim txiaj nyob hauv lub zos Nas Xas Les. Thaum nws pom tias Mab Liab lub cev xeeb me nyuam, mas nws tsis thuam, nws tsis hais ib lo lus txog qhov ntawd rau leej twg paub vim nws tsuas xav tias nyaj tej zaum yog luag yuam deev Mab Liab xwb. Yos Xes kuj txaj muag nug Mab Liab vim nws hwm Mab Liab. Ntawm Mab Liab los nws kuj tsis qhia tias yog Tswv Ntuj ua kom nws xeeb tub, nws tso siab tias muaj ib hnub twg mas Tswv Ntuj yeej yuav qhia rau Yos Xes paub xwb.
Tab sis tus Tshiab tawm los cheem Yos Xes kom txhob ua li ntawd; qhov Yos Xes yuav tau ua mas yog coj Mab Liab los nyob hauv nws tsev xws li Mab Liab yog nws tseem poj niam lawm tiag, vim tus me nyuam xeeb hauv Mab Liab lub cev tsis yog neeg ua kom muaj, tab sis yog Leej Ntuj Plig Ntshiab ua kom Mab Liab xeeb tub.
Peb tseem pom tias Yos Xes yog neeg tsis hais lus ntau, nws tsis nco txog nws li, nws kuj tsis nrhiav txoj kev yuav tau nyob zoo; yog li Yos Xes thiaj zoo siab yuav Ntuj lus, ces nws coj Mab Liab los ua nws poj niam.
Yos Xes ua hauj lwm txua ntoo nyob hauv lub zos, mas sawv daws thiaj hu kam Yos Xes yog kws ntoo, tab sis tus Tshiab hu Yos Xes ua ‘Das Vis leej tub’, vim Tswv Ntuj pom neeg lub hwj chim uas neeg tsis nco qab, Tswv Ntuj hwm neeg. Yos Xes yog Das Vis cov xeeb ntxwv, ces Yos Xes cov me nyuam kuj yuav yog Das Vis cov xeeb ntxwv thiab; yog li tus me nyuam uas Mab Liab yug kuj yuav yog Das Vis leej tub thiab, vim Yos Xes yog Mab Liab tus txiv, thiab vim Mab Liab kuj yog Das Vis cov xeeb ntxwv.
Mas Tais vam txog tus Yaj Saub cov lus hais tias “Tus ntxhais nkauj xwb yuav xeeb tub, nws yuav yug ib tug tub. Luag yuav tis nws npe hu ua Es Mas Nus Es.” Lo lus tias ‘Es Mas Nus Es’ txhais tias ‘Tswv Ntuj nrog peb nyob’, vim Yes Xus yog lub cim qhia kom peb paub tias Tswv Ntuj nrog nraim peb, nws ua tus pov hwm peb thiab pov hwm tas lub ntiaj teb.
Nyob hauv qib lus kawg hauv Mas Tais Ntawv Moo Zoo zaj 1 no yog hais tias “Yos Xes tsis kov nws poj niam mus txog hnub yug tus tub. Yos Xes tis tus tub npe hu ua Yes Xus.” Tos Yos Xes tsis kov Mab Liab vim nws paub lawm tias Mab Liab yog tus nkauj Tswv Ntuj xaiv los xeeb tus Ntshiab, tsim nyog Mab Liab yuav ua nkauj ntshiab mus li.
Cov phooj ywg, peb yuav nco tias Tswv Ntuj yog tus tsis fav xeeb, tsis hloov siab, mas Tswv Ntuj thiaj xa Yes Xus tuaj cawm nws haiv neeg.
Tswv Ntuj ib txwm cog lus rau As Nplas Has thiab Das Vis tias nws yuav pub ib txoj hmoov zoo rau nkawd cov xeeb ntxwv; txoj hmoov zoo ntawd kuj yog Yes Xus ntag.
Cov phooj ywg, thaum nej hnov piav txog Yes Xus lub keeb, mas nej yuav pom tias muaj tej tus yog neeg muaj txhaum. Tos Tswv Ntuj kheev kom muaj li ntawd, vim Tswv Ntuj xav qhia peb tias Yes Xus tuaj xyaw lub ntiaj teb neeg muaj txhaum vim nws xav cawm sawv daws ntawm txoj kev ua txhaum xws li tus kws tshuaj mus nyob xyaw cov neeg mob mas nws thiaj yuav nrhiav tau tshuaj los kho tus mob ntawd.
Yes Xus lub keeb muaj tej tus neeg ua txhaum, tsis kav Tswv Ntuj pub txiaj ntsim los rau Yes Xus, nws tsa Yes Xus ua tus Ntshiab. Qhov no pab kom peb nco tias Tswv Ntuj pub txiaj ntsim rau peb tsis yog vim peb tsim nyog txais lub txiaj ntsim ntawd, tab sis yog vim Tswv Ntuj nyiam thiab hlub peb; Tswv Ntuj thiaj pub nws cov txiaj ntsim dawb dawb rau peb.
