Nyob hauv zaj no nej yuav hnov lo lus tias ‘hloov siab’. Lo lus no yog zoo li cas? Lo lus ‘Hloov siab’ lus Hes Las siv lo lus tias ‘Metanoia’ txhais tias ‘tu siab rau yus cov txhaum ces yus txiav siab hloov tswv yim thiab tso txoj kev ua txhaum pov tseg. Yog li ‘hloov siab’ thiaj yog ‘tu siab rau cov txhaum thiab tig los nrhiav Tswv Ntuj’.
Zam ua kab ke ntxuav rau tsoom sid mas thiaj tsis yog ntxuav sab nraud xwb, Zam kom lawv ntxuav lub siab thiab hloov tus cuj pwm.
Mas Tais hais tias ‘Ntuj lub Ceeb Tsheej’ (Kingdom of Heaven), nws tsis hais tias ‘Tswv Ntuj lub Ceeb Tsheej’ (Kingdom of God) vim cov Yus Das ntshai tuav txog Tswv Ntuj lub npe, lawv thiaj hais tias ‘Ntuj’. Mas Tais sau nws phau ntawv rau cov Yus Das nyeem, nws thiaj hais xws li cov Yus Das hais kam; yog ‘Ntuj lub Ceeb Tsheej’.
Hais txog cov Fas Lis Xais thiab cov Xas Dus Kais. Ob hom neeg no yog neeg zoo li cas? Cov ‘Fas Lis Xais’ yog cov coj Mais Xes txoj cai nruj, lawv sau tej ntawv piav txoj cai, lawv qhia sawv daws kom ua raws li lawv piav. Cov Fas Lis Xais yuav txoj cai raws li sau nyob hauv ntawv thiab lawv tseem yuav cov txheej laus thaud tej kab ke. Ntawm cov ‘Xas Dus Kais’ mas lawv yog tus Leej Choj Xas Dus thaud cov thwj tim, lawv ua nom tswv nyob hauv rooj txwj lus Xas Nes Nrees; lawv nyiam hwm cov nom Los Mas. Cov Xas Dus Kais tsuas yuav txoj cai raws li sau nyob hauv ntawv xwb.
Lo lus ‘ntxuav’ mas lus Aas Kiv hu ua ‘Baptism’ yog ntxeev los ntawm lo lus Hes Las tias ‘Bapto’ los ‘Baptizein’ txhais tias ‘raus dej’. Cov His Xas Lais txais kab ke ntxuav no ntawm cov Hes Las los. Thaum Zam ua kab ke ntxuav mas nws yuav xub ntuas lawv kom tu siab rau lawv cov txhaum thiab hloov siab tshiab tso. Thaum tus twg tu siab rau nws cov txhaum lawd, nws yuav thov txhaum, ces Zam mam ua kab ke ntxuav rau. Zam yuav tuav tus neeg ntawd tes, coj nws mus hauv tus dej, thiab muab dej los hliv saum tus neeg ntawd lub taub hau.
Zam ntuas tias “Tus lawv kuv qab tuaj, nws muaj zog dua kuv, kuv tsis tsim nyog hle nws nkawm khau. Tus ntawd yuav ntxuav nej nyob hauv Leej Ntuj Plig Ntshiab thiab nyob hauv hluav taws. Nws txhais tes tuav rawv ib lub vab, nws yuav ntxuaj nws lub tshav ntaus nplej, nws yuav yawm cov nplej qoos rau hauv txhab, hos cov npluag, nws yuav muab hlawv hauv cov hluav taws tsis txawj tuag.” Nyob hauv Zam cov lus no, tus tuav lub vaj ntxuaj nplej yog ‘Leej Pleev’, lub vab yog ‘txoj hauj lwm txiav txim’, lub tshav nplej yog ‘lub ntiaj teb’, cov nplej qoos yog ‘cov neeg zoo’, cov npluag yog ‘cov neeg phem’, lub txhab yog ‘Ntuj Ceeb Tsheej’, thiab cov hluav taws tsis txawj tuag yog hais txog cov hluav taws hauv dab teb; cov neeg uas Leej Pleev cov ntshav ntxuav lawv kom ntshiab tuaj tsis tau, mas lawv yuav poob mus rau dab phem teb chaws mus li. Nyob ntawd, lawv yuav raug tsim txom quaj tom hniav nkawv.
Zam ua kab ke ntxuav mas yog ib lub cim qhia tias tus ua kab ke ntxuav yuav tsum muab siab rau yuav lub siab tshiab. Ntawm Yes Xus, mas nws yuav ntxuav neeg lub siab thiab tus plig kom rov ntshiab tuaj, vim tsuas muaj Leej Ntuj Plig xwb thiaj yuav xaus mus nyob ntxaws tau hauv neeg lub siab lub tswv yim. Leej Ntuj Plig Ntshiab zoo li cov hluav taws hlawv yam tsis zoo nyob hauv neeg thiab ua kom neeg lub siab kub lug mloog Ntuj Lus.
Zam yog ib tug neeg tsis nrhiav koob meej, nws kuj tsis muab hlob; yog li thaum Yes Xus tuaj thov Zam ua kab ke ntxuav, Zam thiaj yig vim Zam saib nws me dua Yes Xus tiag. Peb tseem yuav pom ntxiv mus tias Zam yuav hais qhia rau nws cov thwj tim txog Yes Xus thiab kom cov thwj tim mus raws Yes Xus. Zam yig tas zog, tab sis Yes Xus hais rau Zam tias “Nyem no, cia koj ua rau kuv, wb thiaj tau ua raws txoj kev ncaj.”
‘Txoj kev ncaj’ ntawd yog dab tsi? Yog tus yam ntxwv Tswv Ntuj xav kom Zam thiab Yes Xus ua raws. Zam yuav tsum ua kab ke ntxuav rau Yes Xus, mas lub ntuj thiaj yuav qhib, Huab Tais Leej Txiv lub suab thiaj yuav nrov tuaj txog sawv daws.
Ua cas Yes Xus thiaj tuaj txais kab ke ntxuav ntawm Zam? Lub Koom Txoos qhia peb tias vim 6 yam no:
1) Vim Yes Xus xav coj sawv daws tuaj txais lub Cim Ntxuav uas nws yuav qhia rau sawv daws, mas Yes Xus thiaj xub ua ntej txais kab ke ntxuav kom sawv daws ua raws li nws tus lwj lwm.
2) Vim Yes Xus xav kom sawv daws pom tias Yes Xus nyiam ua neeg me ces nws zoo siab thov Zam ua kab ke ntxuav rau nws.
3) Vim Yes Xus xav kom sawv daws paub tias nws pom Zam txoj kab ke ntxuav yog ib yam tseem ceeb.
4) Vim Yes Xus xav kom Huab Tais Leej Txiv thiab Huab Tais Leej Ntuj Plig tau lub sij hawm tshaj tias Huab Tais Leej Txiv thiab Huab Tais Leej Ntuj Plig nyiam Huab Tais Leej Tub tiag, mas sawv daws thiaj yuav ntseeg txog Yes Xus zoo dua.
5) Vim Yes Xus xav ua kom cov dej nyob ntiaj teb no ntshiab tuaj, mas tas cov dej nyob ntiaj teb thiaj tsim nyog ua lub Cim Ntxuav los ntxuav lub qab ntuj neeg.
6) Vim Yes Xus xav ua thawj tug txais lub Cim Ntxuav nyob hauv Leej Ntuj Plig Ntshiab, mas Leej Ntuj Plig thiaj tawm tuaj rau Zam pom.
Yes Xus txais kab ke ntxuav tas, nws tawm hauv dej los tim ntug nqhuab tam sis ntawd, ces lub ntuj qhib plho, pom Tswv Ntuj tus Plig nqes xws li ib tug nquab los rau saum Yes Xus. Ib lub suab nrov saum ntuj tuaj hais tias “Tus no yog kuv Leej Tub uas kuv nyiam. Nws yog kuv qhov chaw zoo siab.” Qib lus no txhais tias Leej Ntuj Plig yog tus coj Yes Xus ua Leej Txiv txoj hauj lwm cawm neeg. Huab Tais Leej Txiv kuj yog tus zeem tseeb tias Yes Xus yog Huab Tais Leej Tub tiag. Zam pom lub ntuj qhib plho, mas ntshe yog tej zaum Zam pom ib qho pom kev dawb vog tawm saum ntuj tuaj xws li xob laim, thiab ntshe pom tej yam ci rau saum Yes Xus taub hau.
