Tim 18 Lub 6 Hlis 2026
Ntawv Moo Zoo tshwm sim.
Yam uas peb tau ua tas los, yog peb tau maj mam ua kev nkag siab tias Ntawv Cog Lus Qub tshwm sim los li cas. Peb tau piav yooj yim los piav luv txog tej qhov tsim nyog. Tab sis hais txog kev txhais cov lus no kom yog, nws yog qhov txaus txhawj thiab yog qhov ntseeg tias cov lus no yog cov lus Tswv Ntuj qhia. Ces thiaj txhais raws cov txwm ntawv uas sau tseg. Qhov tiag cov lus no yog los ntawm cov sau keeb kwm sib txawv heev. Li ntawd, thiaj tsis yog qhov txawv uas qee zaum peb pom tej lo lus txaj muag, xws li tej thaum hais txog tias Tswv Ntuj txib kom tua neeg. Tsis yog Tswv Ntuj hais lo lus no, tab sis yog cov neeg lub caij ntawd lawv xav li ntawd. Cov sau lawv hais tias cov His Xas Lais kuj xav zoo ib yam li cov neeg lub caij ntawd. Ntawv Ntshiab tau qhia His Xas Lais txoj kev rau peb, yog txoj kev uas nkag siab nyuab, qeeb thiab tsis meej pem. Txoj kev uas cov His Xas Lais thiab cov yaj saub taug txheej thaud, mus txog thaum ntsib tus Tswv Ntuj tseeb tiag thiab yog tib tug Tswv Ntuj xwb. Peb yuav nco ntsoov tias ; nyob hauv Ntawv Ntshiab peb tau pom kev nthuav tawm ntawm Tswv Ntuj. Peb yuav tau pom qhov ci ntsa yog thaum Yes Xus Nas Xas Les tuaj cuag peb. Yog kev nthuav tawm tiav log hais txog qhov zoo nkauj ntawm Tswv Ntuj. Yam no kuj raug siv nyob hauv ntawv Cog Lus Qub.
Kwv tij Hmoob sawv daws ! Hnub no peb tham txog lub Moo Zoo tshwm sim ntu ib los xaus li no xwb. Thov Huab Tais Yes Xus Pleev lub txiaj ntsim nrog nej nyob, ua nej siab kaj lug ! Peb mam sib ntsib dua, nej sawv daws nyob zoo !
