Leej Ntshiab As Npaws tus Loj (Albertus Magnus) yug los nyob Zes Mas Nias teb xyoo 1201. As Npaws pib kawm txuj nyob Pas Dos Vas, Is Tas Lias Pej Fab. Nws ua Leej Choj nyob hauv lub koom haum Dos Mis Nis Kas. As Npaws tseem yog ib tug qhia cov txuj thoob tsib thiab cov txuj hais txog Tswv Ntuj nyob hauv lub Koom Txoos.
Vaj Qhia tsa As Npaws ua Tswv Qhia nyob hauv lub nroog Kaus Laws. As Npaws tsis nyiam ua Tswv Qhia, nws thiaj ua ob xyoos xwb, ces nws rov ua Xib Hwb kawm txuj mus li thiab qhia txuj tas nws sid nyob Zes Mas Nias teb ntau.
As Npaws kub siab kawm tus kws txuj Hes Las hu ua As Lis Tos (Aristotle) cov txuj, thiab kawm cov txuj As Las Npias (Islamic philosophy). Cov txuj uas As Npaws rau siab kawm ntau yog cov txuj hais txog txhua yam toob xib nyob hauv lub ntuj thiab lub teb.
As Npaws sau tej phau ntawv qhia tias yus yim paub lub ntuj lub teb mas yus yim qhuas txog Tswv Ntuj uas tsim lub ntuj lub teb. As Npaws hais tias “Txuj ci txhua yam yog los ntawm Tswv Ntuj los.’
As Npaws tuag xyoo 1280, nws hnub nyoog muaj 79 xyoo. Lub Koom Txoos saib Leej Ntshiab As Npaws yog Koom Txoos cov kws txuj.
