Xas Vis Yes (Francisco Javier) yug xyoo 1506 nyob Xyis Pas Yas teb. Lawv tsev neeg yog nom, nws txiv xav kom nws ua Leej Choj, ces thaum Xas Vis Yes muaj 18 xyoo, nws txiv xa nws mus kawm txuj nyob Pas Lis hauv Fab Kis teb.
Xyoo 1529 Xas Vis Yes tau ntsib Los Yos Las. Thaum ntawd Xas Vis Yes muaj 23 xyoos, hos Los Yas Las muaj hnub nyoog 38 xyoo. Los Yos Las tsis muaj nyiaj, nws thov tuaj nrog Xas Vis Yes thiab Pob Zeb Laws Fev (Pierre Lefevre) nyob hauv ib kem tsev.
Chiv thawj Xas Vis Yes tsis tshua zoo siab txais Los Yos Las, tab sis tos tsis ntev mas Xas Vis Yes pom Los Yos Las coj tus yam ntxwv txawv tas sawv daws, ces Xas Vis Yes kuj yuav ib lub siab tshiab xws li Los Yos Las.
Xyoo 1534 Xas Vis Yes thiab ib pab phooj ywg nrog Los Yos Las cog lus taug txoj kev pluag kev tsim txiaj nyob saum lub roob Moos Mas ze Pas Lis. Lawv npaj siab yuav mus tshaj Ntuj Lus rau Yes Lus Xas Les. Peb xyoos tom qab, Xas Vis Yes tau txais lub Cim Tiag Tes ua Leej Choj, ces Xas Vis Yes thiab nws cov phooj ywg tsa lub koom haum ‘Yes Xus Is’ los ua cov hauj lwm Vaj Qhia kom ua, tus tswj lub koom haum yog Los Yos Las.
Tus vaj Pos Tws Nkas thov ib pab tub tshaj Ntuj Lus ntawm Vaj Qhia, mas Vaj Qhia hais kom lub koom haum Yes Xus Is xa ib co Leej Choj mus ua tub tshaj Ntuj Lus raws li tus vaj Pos Tws Nkas thov, ces Los Yos Las thiaj tso Xas Vis Yes mus. Vaj Qhia tsa Xas Vis Yes ua tiam lis sawv Vaj Qhia chaw kav tas lub Koom Txoos nyob Toob Fab Kawg (East Indies). Xyoo 1541, lub 4 hlis tim 7 Xas Vis Yes caij nkoj sawv kev ntawm lub tsheej Lis Npos (Lisbon) mus rau Is Ntias teb. Thaum ntawd Xas Vis Yes muaj 35 xyoos.
Thaum lawv caij nkoj, Xas Vis Yes ntuas cov neeg nrog nws caij nkoj, nws tshaj Ntuj Lus rau ib pab Es Thias Pias ua qhev nyob saum lub nkoj, nws pab cov neeg mob. Thaum lub nkoj tuaj txog, Xas Vis Yes twb nto moo tias nws yog ib tug Leej Choj kub siab ua Ntuj cov hauj lwm.
Xyoo 1542 Xas Vis Yes tuaj txog Nkos As hauv Is Ntias teb. Xas Vis Yes ua tus saib lub tuam tsev kawm txuj, nws xyiv fab qhia kev cai rau cov Pos Tws Nkas lawv tej poj niam thiab lawv tej me nyuam, nws ntuas cov Pos Tws Nkas coj tus yam ntxwv tsis phim Ntuj kev cai. Lawv pom Xas Vis Yes yog ib tug neeg kub siab, nws pab cov neeg mob, cov neeg nyob txim, ces cov Pos Tws Nkas mloog nws. Tab yog Xas Vis Yes ua Vaj Qhia tus tiam lis saib lub Koom Txoos nyob Toob Fab Kawg, tsis kav nws coj tus yam ntxwv tsis muab hlob, nws kub siab ua hauj lwm tshaj sawv daws, nws coj tus yam ntxwv pluag tshaj sawv daws, nws tseem khwv tshaj sawv daws thiab, ces cov Leej Choj uas xub tuaj dua Xas Vis Yes lawv sawv daws hwm nws.
Thaum Xas Vis Yes faib hauj lwm rau cov tub tshaj Ntuj Lus nyob Nkos As tas, nws mus xyuas cov neeg pib ua Ntuj kev cai nyob Is Ntias teb, nws qhia kev cai rau lawv.
Xas Vis Yes tshaj lub Moo Zoo nyob Is Ntias teb, mas nws tsis kawm cov Is Ntias tej kev cai lawv ib txwm coj, nws tsis kawm lawv tej xeem lus. Xas Vis Yes tsuas vam txog cov tub cev lus los qhia kev cai. Tab sis yog vim Xas Vis Yes yog ib tug neeg nyiam Yes Xus thiab nyiam neeg kawg nws siv tas nws lub zog los qhia Ntuj kev cai rau sawv daws, nws pab sawv daws, hlub sawv daws nyob hauv Yes Xus, mas thiaj muaj ntau vam leej thov txais lub Cim Ntxuav. Lawv tsis paub nws lus tiam sis lawv pom nws tus yam ntxwv ces lawv xav txais nws cov lus qhia.
Xas Vis Yes saib cov neeg Is Ntias lub siab lub tswv yim yog zoo li ib lub rooj uas tsis muaj dab tsi nyob saud, ces nws tso Ntuj kev cai nyob hauv lawv lub tswv yim, thiab nws qhia sawv daws kom coj Ntuj kev cai xws li cov nyob Aws Los Pas. Yog vim li ntawd, mas cov neeg ua Ntuj kev cai thiaj ib txhij txais Yes Xus lub Moo Zoo thiab txais ntau yam uas yog Aws Los Pas kev cai nrog, lawv yuav tej lub npe Aws Los Pas, lawv yuav cov zaj hu nkauj Aws Los Pas, lawv yuav txoj kev xam hnub nyoog li cov Aws Los Pas.
Xas Vis Yes nyob Is Ntias teb tau 3 xyoos, ces xyoo 1545 Xas Vis Yes thiaj caij nkoj mus txog Mas Las Kas (Malacca) thiab cov pov txwv Mos Lus Kus (Maluku Islands).
Xyoo 1547 Xas Vis Yes nyob Mas Las Kas, nws pom ib lub nkoj coj ib co neeg Zis Pees (Japanise) tuaj txog lub tsheej nkoj theem. Muaj 3 tug neeg nyob hauv pab ntawd ua phooj ywg nrog Xas Vis Yes; ib tug hu ua ‘Yas Zis Los’ (Yajirō). Yas Zis Los piav rau Xas Vis Yes mloog tias cov Zis Pees muaj ib co Leej Choj hnav daj, lawv coj tus yam ntxwv zoo li cov Txiv Plig, lawv teev ib tug tuam vaj hu ua ‘Dais Nis Sis’ (Dainichi). Yas Zis Los tseem hais rau Xas Vis Yes tias yog Xas Vis Yes mus tshaj Yes Xus lub Moo Zoo nyob Zis Pees teb, mas cov Zis Pees yuav zoo siab txais lub Moo Zoo. Xas Vis Yes xav kawm xeem lus Zis Pees vim nws xav mus tshaj Ntuj Lus rau lawv lub teb chaws. Tab sis nws yuav tsum rov mus Nkos As tso, ces Xas Vis Yes thiaj coj Yas Zis Los nrog nws mus nyob Nkos As ib xyoos. Xyoo 1549 Xas Vis Yes sawv kev mus Zis Pees teb.
Thaum lub 4 hlis xyoo 1549 Xas Vis Yes nrog Yas Zis Los caij nkoj ua ke mus rau Zis Pees teb. Muaj ob tug tub koom haum Yes Xus Is nrog Xas Vis Yes tuaj; yog Tos Les thiab Fes Nas Ntes. Tos Les (Cosme de Torres) yog Leej Choj, nws muaj 40 xyoo, hos Fes Nas Ntes (Juan Fernández) yog Leej Tij, nws muaj 23 xyoos.
Hnub tim 15 lub 8 hli xyoo 1549 lawv mus txog hauv lub nroog Kas Nkos Sis Mas (Kagoshima) nyob hauv ib lub pov txwv nyob Zis Pees qab teb, hu ua Kis Yus Sus (Kyushu). Tus vaj txheeb Zis Pees (Daimyo) uas tswj lub nroog Kas Nkos Sis Mas tso lus rau Xas Vis Yes kom nws tshaj Ntuj Lus ywj siab nyob hauv nws lub xeev. Yog vim nws xav tias cov laus pav Pos Tws Nkas tej nkoj ua luam yuav nquag tuaj ua luam nyob Kas Nkos Sis Mas, ces tus vaj txheeb thiaj yuav tau nyiaj ntau.
Thaum Xav Vis Yes tuaj txog Zis Pees teb, nws pom tias yuav qhia kev cai rau cov Zis Pees xws li qhia rau cov Is Ntias tsis tau, vim cov Zis Pees yeej muaj kev cai teev lub ntuj, yeej muaj kev cai sib fim ntau, thiab lawv paub txuj ci ntau. Yog nws qhia raws tus piv txwv Rooj Khoom mas cov Zis Pees yuav tsis kam txais Ntuj kev cai. Tab sis yog nws maj mam nrhiav saib cov Zis Pees yuav coj lub Moo Zoo kom haum lawv txoj qub kev cai uas yeej muaj hwj chim mas nyaj ntau leej nyiam dua, thiab Ntuj kev cai yuav tsis hem lawv, ces cov Zis Pees thiaj tsis ntshai coj Ntuj kev cai vim lawv pom tias lub Moo Zoo nrog lawv cov qub kev cai sib haum ntau, lawv tseem yuav pom tias Ntuj kev cai pab ua kom lawv teb chaws zoo dua yav thaud tuaj thiab. Yog li mas Xas Vis Yes thiaj tshaj lub Moo Zoo raws tus piv txwv ‘Yoog Luag Txuj’; yog nws tsum kawm xeem lus Zis Pees, kawm kom paub cov Zis Pees tej kev cai, nws yuav tau yoog lawv tej kev cai teev hawm tab sis yuav tsis txhob ntseeg raws li lawv cov kev cai teev hawm ntawd, nws yuav tau hloov lub Koom Txoos cov kev cai lub hauv paus hauv ntsis kom haum cov Zis Pees tiam sis nws yuav tsis hloov lub Moo Zoo lub ntsiab.
Xas Vis Yes tseem pom tias nyob hauv cov Zis Pees cov kab ke qub kev cai mas muaj tej yam zoo siv, hauv lawv cov lus kuj muaj tej lo zoo hais, hauv lawv zaj tswv yim muaj tej zaj zoo yuav, tej yam uas cov Zis Pees ib txwm tsim thiab muab los teev lawv cov dab, mas Xas Vis Yes muab tej yam ntawd los teev Tswv Ntuj raws li lub Moo Zoo. Xas Vis Yes kawm saib yam twg yog zoo khaws tseg los yam twg yuav tsum tso pov tseg; tej yam yuav ua kom cov neeg yuam kev tsis to taub Yes Xus lub Moo Zoo mas yuav tsum tso pov tseg, tej yam zoo pab cov neeg hwm Ntuj mas yuav khaws tseg.
Xas Vis Yes kuj yoog cov Zis Pees tej kev cai kav teb chaws, ua zoo rau cov nom tswv, hwm lawv, ua kom zoo lawv siab, tsis hla cov nom tswv kav teb chaws lus, nws tsis ua ib yam dab tsi kom cov nom tswv xav tias nws yog neeg pej kum teb tuaj ua ntxhov nyob hauv lub teb chaws.
Thaum ntawd, Yas Zis Los twb txais lub Cim Ntxuav lawm, ces nws pab Xas Vis Yes lawv qhia Ntuj kev cai rau cov neeg Zis Pees hauv lub nroog Kas Nkos Sis Mas. Yas Zis Los qhia lawv kom lawv hu Tswv Ntuj ua Dais Nis Sis, tab sis Dais Nis Sis yog ib tug tuam vaj nyob hauv Phus Thas kev cai. Tsis yog cov ua Ntuj kev cai tus Huab Tais Tswv Ntuj. Thaum Xas Vis Yes pom cov Zis Pees tus mlom Dais Nis Sis mas nws thiaj pom tias yuav hu Tswv Ntuj ua Dais Nis Sis tsis tau, ces Xas Vis Yes tis npe rau Tswv Ntuj ua ‘Des Os’ (Deus) raws li cov Pos Tws Nkas hu. Xas Vis Yes pom tias cov Leej Choj uas Yas Zis Los hais txog mas yog cov hauj sam teev hawm Phus Thas.
Thaum chiv thawj tej tus hauj sam zoo siab tuaj mloog Xas Vis Yes cov lus qhia txog Yes Xus lub Moo Zoo. Tab sis thaum Xas Vis Yes ntuas cov hauj sam kom lawv tso lawv tus yam ntxwv phem nrog txiv neej sib deev tseg, mas lawv pib ntxub Xas Vis Yes tas siab.
Tau ib xyoos tus vaj txheeb tsis pom ib lub nkoj Pos Tws Nkas tuaj ua luam nyob hauv lub xeev Kas Nkos Sis Mas li. Hos hnov hais tias cov nkoj Pos Tws Nkas tuaj ua luam nyob hauv lwm lub xeev. Cov hauj sam los tuaj liam txog Xas Vis Yes tsis tseg rau tus vaj txheeb thiab, ces tus vaj txheeb thiaj npau taws, nws txwv tsis pub nws ib tug pej xeem kawm Yes Xus lub Moo Zoo ntxiv. Yog tus twg yuav txais lub Cim Ntxuav, mas tus ntawd yuav tsum raug tua pov tseg.
Xas Vis Yes cia Yas Zis Los saib cov ntseeg nyob Kas Nkos Sis Mas, ces Xas Vis Yes nrog Txiv Plig Tos Les thiab ib tug tub hluas Zis Pees hu ua ‘Npes Nas’ sawv kev mus cuag tus tuam vaj nyob Kis Yos Taus (Kyoto). Lawv 3 leeg caij nkoj hla dej mus txog lub pov txwv loj hu ua Hoos Sus (Honshu). Lawv mus txog lub nroog His Las Dos. Tab tom yog lub sij hawm ib lub nkoj Pos Tws Nkas nyuam qhuav tuaj txog. Cov laus pav Pos Tws Nkas pom Xas Vis Yes nyob ntawd, lawv tuaj hwm Xas Vis Yes, vim Xas Vis Yes nto moo tias nws yog ib tug Leej Choj muaj lub siab kub lug tshaj lub Moo Zoo. Cov Zis Pees pom cov laus pav Pos Tws Nkas hwm Xas Vis Yes, mas lawv ntau leej zoo siab mloog Xas Vis Yes qhia tias Yes Xus yog tus Huab Tais cawm ntiaj teb neeg. Xas Vis Yes nyob hauv lub nroog His Las Dos hnub puav xwb, muaj ze ntawm 100 tus neeg Zis Pees thov txais lub Cim Ntxuav.
Xas Vis Yes lawv mus txog Kis Yos Taus. Nws xav tias yuav pom ib lub tuam tsev zoo nkauj tab sis nws kawg pom ib lub tuam tsev phem hauj sim xwb, vim lub caij ntawd tus tuam vaj Zis Pees tsis muaj hwj chim li, tus tuam vaj muaj lub npe loj tab sis cov vaj txheeb Dais Mis Yaus nyias kav nyias xeev ntuj, lawv tsis mloog tus tuam vaj nyob Kis Yos Taus.
Tus tuam vaj hnov tias ib tug neeg tawv dawb pluag pluag xav tuaj nrog nws tham, mas tus tuam vaj tsis kam txais, ces Xas Vis Yes thiaj tsis tau ntsib tus tuam vaj. Nws rov qab los Kas Nkos Sis Mas. Txawm tus tuam vaj tsis txais nws, mas Xas Vis Yes tsis xav dab tsi, txawm nws mus kev ntev hli thiab raug txom nyem, los nws kuj tsis muab saib tias yuav nkim zog dag vim Xas Vis Yes paub tias yog txoj kev tsim koob hmoov tseg xwb.
Xas Vis Yes tau paub tias muaj ib tug vaj txheeb Dais Mis Yaus muaj hwj chim dua cov nyob Zis Pees Naj Fab, nws yog tus kav lub tsheej Yas Mas Kus Sis (Yamaguchi), ces Xas Vis Yes xav tias txawm ib tug tsis txais nws, los tej zaum lwm tus yuav txais nws, ces Xas Vis Yes lub siab loj tuaj.
Xas Vis Yes tseem pom tseeb kawg tias cov neeg tshaj Ntuj Lus nyob Zis Pees teb yuav tsum muaj ib co vaj txheeb pov hwm lawv. Cov tub tshaj Ntuj Lus yuav tsum hnav tsoos tsho zoo xws li cov vaj txheeb, ces cov vaj txheeb thiaj hwm lawv. Thaum Xas Vis Yes tseem nyob hauv lub nroog Mas Las Kas mas tus thawj tswj cov Pos Tws Nkas tau pub paj tshab ntau rau Xas Vis Yes. Xas Vis Yes thiaj thau nws tej tsoos tsho zoo nkauj los hnav. Nws thau tus thawj tswj Pos Tws Nkas cov tsab ntawv pab cev Xas Vis Yes rau tus tuam vaj Zis Pees. Xas Vis Yes nqa ib lub teev muaj tswb qhia tias txog pes tsawg teev. Nws nqa cov twj paj nruag uas muaj 70 txoj hlua, nws nqa ib rab phom muaj 3 lub qhov, nws nqa tej daim tsom iav thiab tej yeeb yaj tsom zoo nkauj. Ces Xas Vis Yes thiab Fes Nas Ntes caij nkoj mus txog lub nroog Yas Mas Kus Sis uas nyob hauv lub pov txwv Hoos Sus. Tus vaj txheeb txais nkawd zoo, nws nrog Xas Vis Yes ua phooj ywg, nws tau muab ib thaj av rau Xas Vis Yes tsa tsev, thiab ua ntawv tso lus rau Xas Vis Yes tshaj Ntuj Lus.
Xas Vis Yes nyob Yas Mas Kus Sis 5 lub hlis. Thawj ob lub hlis, mas muaj cov Zis Pees 500 tawm leej tuaj kawm kev ntseeg lub ntsiab thiab txais lub Cim Ntxuav. Nyob hauv cov txais lub Cim Ntxuav, kuj muaj tug puav hauj sam thiab tej tus kws ntaus rog Zis Pees, tab sis muaj ib tug nto moo loj dua cov, nws yog ib tug kws hais kwv txhiaj ncig zos, nws tsim tej zaj hu nkauj qhia Ntuj kev cai mus hu ncig zos, mas yog nws tau ua ib tug tub tshaj Ntuj Lus zoo kawg.
Xas Vis Yes tso Txiv Plig Tos Les nyob Yas Mas Kus Sis saib cov ua Ntuj kev cai, ces nws los nyob hauv lub pov txwv Kis Yus Sus, hauv lub xeev Npus Nkos (Bungo), vim tus vaj txheeb kav Npus Nkos hu kom Xas Vis Yes mus nyob hauv nws lub xeev. Tus vaj txheeb ntawd tseem hluas, nws lub npe hu ua ‘Os Tos Mos’. Ob peb xyoos tom qab nws txiav siab txais lub Cim Ntxuav thiab nyob ruaj nreb hauv txoj kev ntseeg tas nws sim neej.
Ua ntej Xas Vis Yes yuav mus nyob hauv lub xeev Npus Nkos, nws xub mus nyob hauv lub nroog Os Is Tas ob lub hlis. Xas Vis Yes thiaj txiav siab hais tias nws yuav rov mus Is Ntias teb, vim nws yog tus thawj tswj saib kev tshaj Ntuj Lus rau cov Koom Txoos zwm rau lub tsheej Nkos As nyob Is Ntias teb. Xas Vis Yes xav mus thov kom lub koom haum Yes Xus Is nyob Aws Los Pas xa ib co tub koom haum mus pab kev tshaj Ntuj Lus nyob Zis Pees teb, ces hnub tim 20 lub 11 hlis xyoo 1551 Xas Vis Yes caij nkoj ncaim ntawm Zis Pees teb rov mus rau Is Ntias teb.
Lub 2 hlis 1552 Xas Vis Yes rov los txog Nkos As. Nws mus xyuas cov Leej Choj sawv daws, nws rov qab faib hauj lwm kom haum sawv daws kev txawj kev ntse. Xas Vis Yes sau ib tsab ntawv ntuas cov Leej Choj kom nyiam ua neeg me, nyiam pab luag tej, nyiam muab txoj sia los txi rau Tswv Ntuj. Lub 4 hlis tim 17 Xas Vis Yes caij nkoj mus txog Mas Las Kas, nws xav mus tshaj lub Moo Zoo nyob Suav teb, vim cov Zis Pees yeej ib txwm hais rau nws tias lawv tej kev txawj ntse thiab kev cai yog tuaj ntawm Suav teb tuaj, mas Xas Vis Yes thiaj xav mus cuag tus vaj nyob Suav teb. Xas Vis Yes xav tias yog tus vaj Suav ua Ntuj kev cai mas tas Toob Fab Kawg yuav txais Yes Xus lub Moo Zoo.
Thaum Xas Vis Yes caij nkoj mus rau Suav teb, cov tswv nkoj Zis Pees ntshai coj Xas Vis Yes mus nqes nkoj nyob hauv lub teb chaws, mas lawv tso Xas Vis Yes nqes nkoj nyob hauv lub pov txwv ‘Xas Soos’ (Shangchuan Island). Kuj muaj ib tug neeg ntseeg nrog Xas Vis Yes nqes nkoj nyob ntawd thiab. Thaum ntawd yog tim 6 lub 6 hli, xyoo 1552.
Xas Vis Yes nyob ntawd ob peb lub hlis, nws tos saib puas yuav muaj ib lub nkoj txais nws mus kom txog daim av Tuam Tshoj, tab sis tsis muaj lub nkoj twg kam txais nws. Nyob ntawd, Xas Vis Yes raug ib tug mob npaws loj. Xas Vis Yes niaj hnub thov Ntuj tuav txog Yes Xus lub npe tsis tseg, ces hnub tim 3 lub 12 hlis Xas Vis Yes thiaj tas sim neej. Tus neeg ntseeg uas nrog Xas Vis Yes nyob thiaj muab Xas Vis Yes log rau hauv lub pov txwv Xas Soos. Tab sis thaum tus vaj Pos Tws Nkas hnov lub moo phem no, mas nws tso neeg tuaj thauj Xas Vis Yes lub cev rov los zais hauv lub tsheej Nkos As, Is Ntias teb.
Txog xyoo 1622 Vaj Qhia Nqes Nkos Lis tim 15 (Pope Gregory XV) zeem tseeb tias Xas Vis Yes yog ib tug Leej Ntshiab nyob hauv lub Koom Txoos Kav Tos Liv, thiab xyoo 1927 Vaj Qhia Pis Yus tim 11 (Pope Pius XI) xaiv Leej Ntshiab Fas Ntshis Kus Xas Vis Yes ua tus pov hwm txoj hauj lwm tshaj lub Moo Zoo rau pej kum teb (Foreign Missions).
