Hauv thawj 4 lub hlis xyoo 2026, muaj hluav taws qus kub hnyiab ntau tshaj plaws yam tsis tau muaj los dua

Lub tsev vas Internazionale tshaj tawm lub 5 hlis tag los tias cov kws tshawb fawb ntawm World Weather Attribution hais tias “Txij lub 1 hlis txog lub 4 hlis xyoo no, lub ntiaj teb raug hluav taws qus kub hnyiab li ntawm 150 plhom hes taj. Yog ntau dua qhov qub li ntawm 20 feem pua. As Fis Kas teb yog xeev ntuj raug kub hnyiab ntau tshaj plaws, yog 85 plhom hes taj. Yog qhov nce siab kawg, vim yav tag los xeev ntuj As Fis Kas raug hluav taws qus kub li ntawm 69 plhom hes taj; yog 23 feem pua. Teeb meem yog los ntawm cov av noo hloov mus ua av qhuav sai heev. Ntuj nag yav tag los ua kom tej nroj tsuag loj hlob thiab hloov mus ua hluav taws hauv lub caij ntuj qhuav. Hais txog As Xias teb, mas Tes Os Dos Kis Pees (Theodore Keeping) tus kws hais txog hluav taws qus ntawm Imperial College London hais tias “As Xias teb raug hluav taws qus kub hnyiab li ntawm 44 plhom hes taj. Yog kub ntau dua xyoo 2014 li 40 feem pua.” 

Is Ntias teb, Mias Mas teb, Thaib teb, Los Tsuas teb thiab Suav teb yog cov teb uas muaj hluav taws qus kub hnyiab ntau tshaj. 

Qhov txhawj xeeb tshaj yog pom tias tseem yuav phem dua no. Thaum ntiaj teb lub Koom Haum soj ntsuam huab cua pom tias El Nino pib hloov nyob hauv lub 5 hlis, mas ntuj yuav qhuav heev thiab cov khuab lig cua ntuj sov yuav muaj zog heev nyob Aus Thas Lias teb, Kas Nas Das teb, As Mes Lis Kas teb thiab hauv lub hav zoov Amazon. Kis Pees hais tias “Qhov txhawj xeeb txog hluav taws qus, tej zaum yuav nce siab dua yav tag los yam tsis tau pom dua. Yog tias El Nino hloov mus rau qhov phem.”

Fes Des Lis Os Tos (Friederique Otto) tus kws tshawb fawb txog huab cua ntawm Imperial College London thiab yog tus tsim World Weather Attribution hais tias “Yog lub qab xyoos no El Nino hloov, mas yuav muaj huab cua pauv ntxeev thiab El Nino yuav ua rau lub ntuj qhuav tshaj plaws yam tsis tau tshwm sim los dua.”