Cov teb chaws muaj zog nyob ntiaj teb, yuav tsum pab cov neeg nyob Rakhine hauv Mias Mas teb

Lub lis piam kawg hauv lub 4 hlis, Npees Las Des tau cog lus nrog lub Leej Haum Kuj hauv kev pab nrhiav tib neeg kev ncaj ncees nyob hauv lub xeev Rakhine, nyob Mias Mas teb. Vim Mias Mas teb yog lub teb chaws nyob sib npuas ciam nrog Npees Las Des teb. Kev sib cog lus nrhiav kev thaj yeeb, yog xav pab ntau txhiab tus neeg nyob hauv lub xeev Rakhine uas raug teeb meem kev tshaib nqhis. 

Txawm li cas kuj xij, kev sib cav sib ceg thiab kev mem hais txog lub teb chaws, ua kom kev sib cog lus no nres tseg. Ua rau tsoom pej xeem Rohingya yuav luag 2 plhom leej uas lawv yog haiv neeg tsawg thiab yog cov raug hiam heev tshaj nyob thoob ntiaj teb poob nyob hauv kev raug tua cheb ntxuav. 

Cov kws soj ntsuam thiaj teeb lo lus nug txog tus yam ntxwv tseeb tiag ntawm tib neeg kev ncaj ncees. Tas cov xwm txheej no tshwm sim nyob hauv lub caij cov Rohingya khiav tawm hauv lawv tej vaj tse mus, vim lawv tshaib plab thiab raug cov Arakan sau mus ua tub rog tua tseem hwv cov tub rog. 

Txij lub 11 hlis tsaib ub los, kev sib ntaus sib tua ntawm cov tub rog Mias Mas thiab cov tub rog Arakan muaj ceem heev zuj zus. Cov Rohingya ze ntawm 118,000 leej thiaj yuav tsum khiav mus rau Npees Las Des teb. Twb xub muaj 1,200 plhom tus neeg Rohingya khiav mus nyob ua ntej lawm. Feem coob yog khiav hauv xyoo 2017, tom qab cov tub rog tua lub xeev Rakhine.