Ib tug Txiv Plig yav tag los uas nws npaj siab ua Txiv Plig tso lub neej nyob As Mes Lis Kas tseg, nws rov qab los ua Txiv Plig tom qab 20 dhau mus.
Txiv Plig Shafaqat John uas nws muaj 40 xyoo, tau txais lub Cim Tiag Tes ntawm Tswv Qhia Khalid Rehmat hnub tim 11 lub 8 hli 2026. Nyob hauv lub tsev teev Ntuj hwm lub Siab Ntshiab hauv lub nroog Lahore, thiab nws tau ua thawj thaj txi Ntuj hnub tim 14 lub 8 hli hauv lub tsev teev Ntuj hwm Leej Ntshiab Yos Xes, uas yog lub tsev teev Ntuj nyob hauv nws lub zos. Txiv Plig John yug xyoo 1986 nyob hauv ib tsev neeg Kav Tos Liv coj nruj. Nws tau kawm nyob hauv lub tsev kawm ua Txiv Plig hwm Leej Ntshiab Mary’s Minor, hauv lub nroog Lahore xyoo 2006. Tom qab no nws tau kawm cov txuj kev ntseeg, tab sis nws tso tseg hauv xyoo 2014, vim qee yam kev txom nyem. 10 xyoo tom qab ntawd, nws tau ua xib hwb qhia ntaus paj nruag nyob hauv ntau qhov chaw thiab hauv lub tsev kawm ntawv txheej siab hwm Leej Ntshiab Anthony’s nyob Lahore. Thiab nws kuj muaj feem cuam txog pab tub hu nkauj suab sib xyaws nyob hauv tsev teev Ntuj ua ntu zus. Lub suab hu nws rov tshwm sim dua ib zaug thaum Tswv Qhia Sebastian Francis Shaw thov kom nws rov mus kawm ua Txiv Plig.
Kev txiav txim siab zaum no ua rau nws yuav tsum xaiv txog txoj hauj lwm ruaj khov. Kev saib xyuas tsev neeg thiab lub neej sib yuav uas yuav tau ua lub neej zoo nyob As Mes Lis Kas. Kev rov los rau lub tsev kawm ua Txiv Plig dua, yog tom qab nws siv sij hawm 3 hnub los teev Ntuj thiab ua tib zoo xav. Nws tau txiav txim siab tsis yuav poj niam thiab tawm ntawm kev ua xib hwb qhia ntaus paj nruag, thiab rov mus kawm ua Txiv Plig dua ib zaug ntxiv nyob hauv xyoo 2024. Nws hais tias : “Kev ua Txiv Plig yog lub suab hu kuv tseeb tiag. Zoo ib yam li Tswv Ntuj tau coj Yos Nas kev, Tswv Ntuj kuj tau coj kuv rov los cuag nws ib yam.” Nws piav tias : “Lub caij kuv nyob sab nraud ntau xyoo dhau los, ua rau kuv nkag siab txog kev txom nyem ntawm ib tsoom neeg zoo tuaj. Thiab yim ua kom kuv xav ua tub txib rau cov neeg pluag txom nyem thiab cov raug tso tseg nyob hauv zej zog.
Hais txog nws niam thiab nws txiv uas nkawd tuag lawm, mas nws hais tias : “Kuv yog qhov tau los ntawm kuv niam thiab kuv txiv txoj kev teev Ntuj.” Txiv Plig Asif Sardar uas yog tus pab tus Tswv Qhia hauv lub Cheeb Koom Txoos Lahore hais txog kev txais lub Cim Tiag Tes zaum no tias : “Yog qhov ua tiav hauv kev mus kev ntau xyoo thiab muaj kev txhawj xeeb.” Tom qab txais lub Cim Tiag Tes tas, Txiv Plig John pib tshaj lub Moo Zoo nyob hauv lub Cheeb Koom Txoos Lahore, thiab tau txais txoj hauj lwm ua tus saib xyuas kev ua hauj lwm niaj hnub ntawm Caritas Lahore.
