Muaj 17 tus tub kawm tuag los ntawm kev pov hoob pob tua lub tsev kawm ntawv nyob Mias Mas teb, tab txawm yuav tso tseg tsis sib tua lawm kuj xij
Hnub tim 12 lub 5 hlis 2025 no, muaj 17 tus tub kawm raug tua tuag thiab 20 leej raug mob los ntawm dav hlau pov hoob pob raug ib lub tsev kawm ntawv nyob Depayin, hauv Mias Mas teb.
Kev pov hoob pob no tshwm sim nyob hauv Depayin nyob Sagaing, uas yog qhov chaw uas cov ntxeev siab kav thiab tab tom raug kev kub ntxhov loj los ntawm av qeeg hnub tim 28 lub 3 hlis xyoo no. Nay Phone Latt uas yog tus hais lus ntawm NUG, zeem tseeb txog cov neeg tuag thiab nws hais tias : “Tej zaum qee leej ploj mus lawm, vim kev puas tsuaj los ntawm hoob pob. Li ntawd, tej zaum cov neeg tuag yuav muaj coob tshaj no.” Lub tsev kawm ntawv yog NUG ua tus kav, thiab yog cov tub tseem hwv hauv kev xaiv tsa uas raug cov tub rog txeeb kav hauv xyoo 2021, thiab pab neeg tiv tseem hwv cov tub rog uas yog lawv phooj ywg.
Cov xwm txheej no tshwm sim, tab txawm cov tub rog yuav tshaj tias tsis sib tua lawm, tom qab av qeeg los. Thiab qhov kawg lawv yuav ncua kev sib tua mus txog hnub tim 31 lub 5 hlis, kom tau zoo kev mus pab hais txog tib neeg kev ncaj ncees. Cov tub rog tsis tawm tswv yim dab tsi txog qhov uas dav hlau pov hoob pob zaum no, tab txawm muaj kev tsis sib tua txij lub 4 hlis los thiab ntau pab neeg tiv cov tub rog kuj pom zoo. Tsis kav kuj tseem muaj kev siv dav hlau pov hoob thiab tuaphom loj ua ntu zus nyob txhua qhov chaw uas muaj kev sib txeeb sib tawg.
Mias Mas teb poob nyob hauv kev sib tawg txij thaum cov tub rog txeeb kav teb chaws lub 2 hlis xyoo 2021. Cov tub rog Mias Mas yuav tsum nrog cov haiv neeg tsawg uas tuav riam phom sib tua, thiab nrog cov tub rog uas txhawb nqa NUG sib tua.
