Kev sib tua nyob ntawm ciam teb tsis tshua tshwm sim pes tsawg, tab sis muaj kev nyiag thauj tshuaj txhaum kev cai thiaj ua rau tseem hwv As Mes Lis Kas ceeb toom txog kev thaj yeeb nyob ntawm Los Tsuas Av Xab Xeeb Kaum.
Kev sib tua uas tsis tshua muaj tshwm sim nyob Los Tsuas teb, ntseeg tias yog los ntawm kev ua luam tshuaj nees. Ua rau cov tseem hwv Thaib muab lub Roob Tsua Ntuj uas yog qhov chaw neeg ncig tsham kaw tseg, thiab yog qhov chaw nyob ntawm ciam teb Los Tsuas.
Hnub tim 5 lub 5 hlis no, cov tub tseem hwv Thaib uas saib xyuas hav zoov tshaj tias : lub Roob Tsua Ntuj uas nyob ntawm Thaib thiab Nplog ciam teb, hauv lub xeev Chiangrai rau muag kaw tseg lawm. Yuav tos txog thaum tus tiam lis As Mes Lis Kas tshaj tias muaj kev thaj yeeb lawm, mas mam rov qab qhib.
Nyob Vees Cas cov nom tswv tau ceeb toom kom cov neeg As Mes Lis Kas uas yuav mus rau lub xeev Bokeo rov xav kom zoo. Tom qab muaj kev sib ntaus sib tua los ntawm cov tub rog Los Tsuas thiab cov tsis paub neeg. Nyob ze Av Xab Xeeb Kaum, uas yog Los Tsuas, Mias Mas thiab Thaib sib npuab ciam. Yog lub qhov tsuaj txhaum kev cai loj tshaj nyob As Xias toob fab naj los ntau tiam neeg lawm. Hnub tim 3 lub 5 hlis no, lub xov tooj cua Los Tsuas tshaj tias muaj kev sib ntaus sib tua nyob ntawm ciam teb hauv lub xeev Bokeo, thiab cov tub rog Los Tsuas ntes tau 4 tus neeg. Muaj qee leej raug tua tuag thiab raug mob, tab sis tsis muaj qhov meej pem pes tsawg.
