Thawj tus neeg Thaib tuag los ntawm tus kab mob Anthrax nyob hauv ntau caum xyoo tas los

Thaib lub pwm tsav kev noj qab haus huv tshaj txog thawj tus neeg tuag los ntawm tus kab mob anthrax, nyob hauv ntau caum xyoo tas los no. Cov tseem hwv Thaib tau ceeb toom rau tsoom pej xeem txog kev txwv tsis pub noj nqaij nyoos thiab kav tsij nrhiav kev tiv thaiv kom txhob kis mob ntxiv.

Hnub tim 2 lub 5 hlis no, Thaib lub pwm tsav kev noj qab haus huv thov kom sawv daws nyob tswm seeb. Tom qab thawj tus neeg tuag los ntawm tus kab mob anthrax nyob hauv 30 tawm xyoo. Lub pwm tsav hais tias nov yog kev kis tus kab mob anthrax zaum ob lawm. Tus kab mob anthrax yog ib hom kab mob nyob hauv av, nws kheev kheev kis mob rau cov tsiaj noj zaub thiab tej tsiaj qus. Nws ua rau neeg tuag tau. Tus neeg mob anthrax tej tawv nqaij yuav khaus, ua hlwv thiab o. 

Cov tseem hwv thiaj ceeb toom txwv tsis pub tsoom pej xeem noj nqaij nyoos, vim nqaij nyoos yog hom txhiam xws uas cov neeg nyob Thaib toob fab pej nyiam noj heev. Tom qab tus neej 53 xyoos uas mob anthrax tuag, mas hais tias yog nws mus tuav thiab kov cov nyuj nyob hauv lub xeev Mukdahan uas nyob ze Los Tsuas teb. Tseem muaj ib tug txiv neej uas nws hnub nyoog 53 xyoos tau kov cov nyuj ntawd ib yam thiab. Tam sim no tus txiv neej ntawd tseem pw nyob hauv tsev kho mob. Cov neeg muag nqaij nyuj thiab cov noj nqaij nyuj nyoos 638 leej, tab tom noj tshuaj thiab tos saib seb puas muaj dab tsi tshwm sim.