Thaib teb ua cov kab ke hawm Vaj Qhia ua ntej yuav faus Vaj Qhia nyob Los Mas.
Tas ntiaj teb tab tom hais lo lus sib ncaim rau Vaj Qhia Fas Ntshis Kus nyob Los Mas. Tsoom neeg ntseeg Kav Tos Liv nyob Thaib teb sib koom thov Ntuj thiab ua thaj txi Ntuj tshwj xeeb ib lub lis piam nyob hauv lub tuam tsev teev Ntuj nyob Bangkok.
Lub pwm tsav Tswv Qhia nyob Thaib teb (CBCT), yuav ua thaj txi Ntuj kom txwm ib lub lis piam los ua kev nco txog Vaj Qhia tus tau tag sim neej lawm. Vaj Qhia tag sim neej rau hnub tim 21 lub 4 hlis nyob hauv nws lub tsev Domus Sanctae Marthae nyob Vas Tis Kas. Hnub 6 thaum tsaus ntuj muaj lub thaj txi Ntuj tshwj xeeb rau cov tiam lis, cov thawj coj hauv zej zog thiab cov sawv cev txhua txoj kev teev hawm thiab ntau pab neeg.
Tus coj lub thaj txi Ntuj yog Vaj Qhia tus tiam lis nyob Thaib teb, yog Tswv Qhia Bryan Wells. Nws hais ib co lus tu siab kawg nyob hauv ntu kawg lub thaj txi Ntuj, kom tau nco txog Vaj Qhia txoj sia thiab nws lub cuab tam. Tas cov Txiv Plig Kav Tos Liv thiab cov hauj sam sib koom hawm Vaj Qhia nyob hauv lub tsev teev Ntuj Assumption nyob Bangkok. Yog lub caij lawv tab tom ua kab ke pam tuag rau Vaj Qhia nyob Los Mas. Cov kab ke no ua kom pom txog lub cuab tam hauv kev sib tham ntawm cov kev teev hawm thiab Vaj Qhia txoj kev tsim kev thaj yeeb.
