Vaj Qhia Fas Ntshis Kus cov lus hauv lub Caij Plaub Caug (Pope Francis message for Lent).
Vaj Qhia Fas Ntshis Kus cov lus hauv lub Caij Plaub Caug (Pope Francis message for Lent).
Peb mus ua ke hauv kev cia siab.
Kwv tij zoo nyiad !
Peb pib lub Caij Plaub Caug hauv nruab xyoo ntawm peb txoj kev ntseeg thiab kev cia siab hauv kev daws txhaum thiab cov kab ke txais tshauv. Lub Koom Txoos yog peb niam los yog peb tus xib hwb caw kom peb qhib siab txais Tswv Ntuj cov txiaj ntsim. Kom peb tau tsuj xeeb Yes Xus tus nyob siab dua kev txhaum thiab yeej txoj kev tuag. Yog qhov Leej Ntshiab Paj Lug hais tias :
“Txoj kev yeej rhuav txoj kev tuag tog rau hauv qab thu lawm. Kev tuag, koj txoj kev yeej nyob qhov twg ? Kev tuag, koj rab hmuv nyob qhov twg ?”
Yes Xus raug ntsia nyob saum Ntoo Cuam thiab nws sawv rov los. Yes Xus yog peb txoj kev ntseeg lub plawv thiab yog peb kev cia siab hauv Tswv Ntuj cov lus cog. Nws yog qhov tiav log nyob hauv Leej Tub uas yog tus Leej Txiv nyiam. Qhov ntawd yog qhov Yes Xus hais tias : “Kuv pub txoj sia nyob mus li rau lawv, lawv yuav tsis tuag ib zaug li. Tsis muaj leej twg yuav chua tau lawv ntawm kuv txhais tes.”
Nyob hauv lub Caij Plaub Caug no, thaum peb sib faib txiaj ntsim hauv lub xyoo ntshiab huv, kuv xav tawm tswv yim me me hais txog mus ua ke hauv kev cia siab lub ntsiab. Thiab kev thov tig los yuav lub siab tshiab uas Tswv Ntuj khuv leej peb. Nyob hauv peb tus kheej los yog hauv zej zog.
Thawj yam, yog kev mus kev. Lo lus tseem ceeb hauv kev tsuj xeeb yog : “Tus nrhiav qhov tseeb hauv kev cia siab.” Yog qhov nco txog kev mus kev ntev ntev ntawm haiv His Xas Lais mus rau thaj av cog lus raws li piav nyob hauv ntawv Kev Tsiv. Txoj kev nyuab no yog txij ntawm kev ua qhev mus txog kev twj lij, thiab kev coj kev ntawm Tswv Ntuj tus nyiam thiab hlub nws haiv neeg. Thiab Tswv Ntuj ib txwm ncaj ncees rau lawv. Kev tsiv raws Ntawv Ntshiab ntawd, nws yog qhov nyuab uas tsis nco txog peb cov kwv tij hauv peb txheej neeg. Nws tab tom khiav ntawm kev nyuab thiab kev phem kom tau nrhiav lub neej zoo dua rau tus kheej thiab rau cov neeg uas lawv nyiam lawv hlub. Kev tig los yuav lub siab tshiab thawj zaug thiaj tshwm sim los ntawm qhov peb nco tias sawv daws yog cov nrhiav qhov tseeb nyob hauv lub neej no.
Peb txhua tus raug caw kom nres thiab nug tias peb lub neej puas ua kom pom qhov tseeb tau li cas ? Kuv tab tom mus kev tiag, los kuv tab tom sawv ntsug nyob twj ywm tsis nti ? Qhov kuv tsis nti, yog vim kuv ntshai thiab tag kev cia siab los yog ua xyem xyav txog qhov yuav tawm ntawm kuv txoj kev kaj siab. Kuv tab tom nrhiav kev muab kuv tej txhaum pov tseg, los puas muab kuv lub meej mom tso tseg tom qab ? Kev muab peb lub neej niaj hnub los sib piv thiab cov neeg thoj nam los cov pej kum neeg yog cov hauj lwm zoo nyob hauv lub Caij Plaub Caug. Kom tau kawm txog kev sib pom dej siab ntawm lawv li cas nyob hauv lub tswv yim no ?
Peb yuav pom tias Tswv Ntuj thov kom peb ua dab tsi, kom peb vam meej nyob hauv kev mus txog Leej Txiv lub tsev zoo dua qub. Nov yog kev soj ntsuam kev ncaj ncees zoo heev hauv cov neeg mus kev txhua tus.
Yam ob, koom mus kev ua ke. Lub Koom Txoos tau hu kom mus kev ua ke, yog lub Rooj Ncauj Lus Vas Tis Kas Ob. Cov neeg ntseeg raug hu kom nrog lwm tus mus kev thiab tsis yog mus kev ib leeg. Leej Ntuj Plig Ntshiab txhib peb tsis pub to hau ntsoov rau tus kheej. Tab sis kom tso tus kheej rau tom qab thiab mus cuag Tswv Ntuj nrog peb cov kwv tij. Kev mus kev ua ke yog hais txog kev sib koom tes hauv peb lub meej mom uas yog Tswv Ntuj cov me nyuam. “Vim nej sawv daws puav leej yog Tswv Ntuj cov tub huv tib si nyob hauv txoj kev ntseeg txog Yes Xus Pleev. Nej sawv daws tau txais lub Cim Ntxuav nyob hauv Leej Pleev, mas nej hnav Leej Pleev lawm. Tsis muaj Yus Das los Hes Las, tsis muaj tus qhev los tus twj lij, tsis muaj txiv neej los poj niam. Vim nej sawv daws koom ua tib leeg nyob hauv Yes Xus Pleev.”
Yog hais txog mus kev ua ke thiab tsis sib thawb los saib tsis taus lwm tus. Tsis sib ntxub los siab nkhaus, tsis tso ib tug pov tseg rau tom qab los tsis cais ib tug li. Thov kom peb txhua tus mus ntxiv nyob hauv tib txoj kev thiab tib lub hom phiaj. Muab siab rau ib leeg thiab ib leeg nyob hauv kev nyiam thiab kev ua tiag nyiaj.
Hauv lub Caij Plaub Caug no, Tswv Ntuj thov kom peb rov xav txog peb lub neej nyob hauv peb tsev neeg, hauv peb tej chaw ua hauj lwm thiab siv peb lub sij hawm. Peb muaj peev xwm uas yuav mus ua ke nrog lwm tus, mloog lawv, sib pab tiv kev haub kev ntxias uas yuav ua rau peb to hauv ntsoov rau tus kheej thiab nco txog yam peb xav tau xwb. Thov kom peb nug tus kheej nyob ntawm Tswv Ntuj xub ntiag tias : cov Tswv Qhia, cov Txiv Plig, cov uas raug xaiv tsa thiab cov neeg ntseeg uas ua tub txib hauv Tswv Ntuj. Peb puas tau ua hauj lwm nrog lwm tus ? Peb puas tau txais luag tej luag ntxhi tsis hais tus nyob deb los nyob ze ? Peb puas tau ua kom lwm tus paub tias lawv yog ib feem hauv zej zog, los sis ua kom lawv nyob nrug deb.
Li ntawd, nov thiaj yog kev hu kom hloov siab zaum ob. Yog kev hu kom nkag mus koom Vas Tis Kas lub rooj sab laj.
Yam peb, thov kom peb koom mus kev ua ke hauv kev cia siab, vim peb tau txais cov lus cog. Thov kom kev cia siab uas tsis ua rau tag kev cia siab, yog lo lus tseeb tiag hauv xyoo ntshiab huv. “Kev tso siab ua kom tsis muaj qhov khuv xim, vim Leej Ntuj Plig Ntshiab uas Ntuj pub rau peb, nws hliv Tswv Ntuj txoj kev nyiam rau hauv peb lub siab.” Yog qhov txhib hauv kev mus kev nyob hauv lub Caij Plaub Caug mus txog kev yeej nyob hauv lub Caij Hla. Raws li Vaj Qhia Npes Nes Dis tim 16 qhia peb nyob hauv tsab ntawv Spe Salvi tias : “Tib neeg xav tau kev nyiam kev hlub uas tsis muaj qhov sib pauj. Lawv xav tau qhov tseeb uas ua rau lawv hais tias : ‘Tsis hais kev tuag, txoj sia, Ntuj cov Tshiab, tus tswv kav, yam uas muaj nyob, yam uas los yuav txog, lub hwj chim, qhov siab, qhov tob los yog lwm yam hauv tas txhua yam. Tas txhua yam nyob saum ntuj thiab nyob nruab yeeb, txhua yam uas ntuj tsim los : yeej tsis muaj ib yam yuav cais tau peb ntawm tus Tswv Ntuj uas nyiam peb nyob hauv peb tus Huab Tais Yes Xus Pleev.”
Yes Xus, kuv txoj kev cia siab rov sawv los lawm. Nws muaj txoj sia thiab ua vaj nto koob meej. Kev tuag hloov ua kev yeej. Kev ntseeg thiab kev cia siab ntawm cov neeg ntseeg nyob tas hauv yam no. Yog kev sawv rov los ntawm Yes Xus Pleev.
Nov yog kev hu kom hloov siab zaum peb. Kev hu kom muaj kev cia siab thiab tso siab rau Tswv Ntuj. Thiab Tswv Ntuj cov lus cog uas hais txog txoj sia nyob mus li. Thov kom peb nug tus kheej tias : “Kuv puas ntseeg tias Tswv Ntuj daws tau kuv cov txhaum, los kuv ua zoo li kuv tuaj yeem pab tus kheej tau. Kuv puas nqhis kev cawm thiab puas thov kev pab ntawm Tswv Ntuj kom kuv tau txais kev cawm ?
Kuv puas kov tau kev cia siab uas ua kom kuv mem tau txhua yam nyob hauv keeb kwm meej tseeb ? Thiab puas ua lub zog txhawb siab kom kuv cia siab rau kev ncaj ncees thiab kev ua kwv ua tij ? Saib xyuas peb lub tsev thiab hauv tus yam ntxwv uas tsis muaj leej twg paub tias raug cais.
Kwv tij sawv daws ! Vim Tswv Ntuj kev nyiam kev hlub nyob hauv Yes Xus Pleev, peb thiaj tau txais kev txhawb nqa hauv kev cia siab uas tsis ua kom peb tag kev cia siab. Kev tso siab ua kom peb tsis muaj chaw khuv xim, vim Leej Ntuj Plig Ntshiab uas Ntuj pub rau peb, nws hliv Tswv Ntuj txoj kev nyiam rau hauv peb lub siab.
Kev cia siab zoo li tus tswg uas ruaj khov hauv fab ntsuj plig. Kev cia siab txhib kom lub Koom Txoos thov Ntuj, kom sawv daws tau txais kev cawm. Tswv Ntuj xav kom tas zeej tsoom txais kev cawm thiab paub qhov tseeb. Thiab nyob tos lub Koom Txoos yuav sib sau nrog Yes Xus ua ib tug. Koj yog tus nraug vauv hauv kev ci ntsa ib nyob saum ntuj. Nov yog kev thov ntuj ntawm Leej Ntshiab Tes Les Xas As Vis Las :
“Kuv tus ntsuj plig, kuv txoj kev cia siab, koj tsis paub lub caij nyoog. Koj yuav ceev faj, vim txhua yam dhau mus sai. Tab txawm kev ua siab kub ntawm koj, yuav ua kom yam tseeb rais ua yam cuav, thiab hloov lub caij nyoog luv, los ua lub caij nyoog ntev kuj xij.” Yog lo lus thov ntawm fab ntsuj plig rau Tswv Ntuj.
Thov Niam Mab Liab uas yog peb Leej Niam hauv kev cia siab. Ua tus cev lus rau peb thiab koom nrog peb mus kev ua ke hauv lub Caij Plaub Caug.
Vaj Qhia Fas Ntshis Kus.
