Hnub tim 8 lub 5 hlis xyoo 2025 no sij hawm 6 teev tsaus ntuj, tas cov Tswv Qhia Liab hauv lub Koom Txoos Kav Tos Liv pov ntawv xaiv tus Vaj Qhia tshiab; yog Tswv Qhia Liab Pes Vos (Cardinal Prevost).
Tswv Qhia Liab Pes Vos muaj hnub nyoog 69 xyoos, nws yug hnub tim 14 lub 9 hli 1955 nyob Tshis Khas Nkos (Chicago) As Mes Lis Kas teb. Pes Vos xaiv ua tub tshaj Ntuj Lus nyob hauv lub koom haum Aus Nkus.
Xyoo 1985 Txiv Plig Pes Vos mus tshaj Ntuj Lus nyob teb chaws Pes Lus hauv As Mes Lis Kas Naj. Xyoo 1999 Txiv Plig Pes Vos raug xaiv ua tus tswj lub koom haum Aus Nkus nyob As Mes Lis Kas, ces nws tshais chaw rov los nyob Tshis Khas Nkos. Xyoo 2001 cov tub tshaj Ntuj Lus hauv lub koom haum Aus Nkus thoob qab ntuj xaiv nws ua tus tswj tag nrho lub koom haum, ces Txiv Plig Pes Vos thiaj rov tshais chaw ib lwm ntxiv tuaj nyob hauv lob koom haum Aus Nkus lub tuam tsev nyob Los Mas. Xyoo 2013 Txiv Plig Pes Vos rov mus nyob Tshis Khas Nkos, nws ua tus tswj fab kev kawm rau cov tub tshaj Ntuj Lus hauv lub koom haum Aus Nkus.
Xyoo 2014 thaum lub 11 hlis, Vaj Qhia Fas Ntshis Kus tsa Txiv Plig Pes Vos ua tus saib xyuas lub Ceeb Koom Txoos Tshis Nkas Yos (Chiclayo) nyob Pes Lus, ib xyoos tom qab nws mam tau ua Tswv Qhia. Cov Tswv Qhia nyob Pes Lus tawg ua 2 pab; ib pab taug qub kab ke, ib pab taug cov kab ke tshiab. Tswv Qhia Pes Vos tsis xaiv tuaj pab twg, nws nyob qhov nruab nrab pab kom sawv daws rov sib haum xeeb. Yog li mas xyoo 2023 Vaj Qhia Fas Ntshis Kus thiaj tsa Tswv Qhia Pes Vos ua Tswv Qhia Liab.
Raws li lub Koom Txoos cov kab ke, mas tus twg ua Vaj Qhia nws yuav tau daws npe tshiab, yog li mas Tswv Qhia Liab Pes Vos thiaj xaiv yuav lub npe hu ua Les Os tab sis vim yav tas los muaj 13 tus Vaj Qhia yuav lub npe no lawm, ces sawv daws thiaj hu tus Vaj Qhia tshiab ua ‘Vaj Qhia Les Os 14’.
Vaj Qhia Les Os 14 yog thawj tus Vaj Qhia zwm rau lub koom haum Aus Nkus, thiab yog thawj tus neeg As Mes Lis Kas tau ua Vaj Qhia.
Vaj Qhia Les Os 14 thawj lo lus yog thov kom sawv daws sib pab txhim tus choj coj mus ntsib kev kaj lug. Vaj Qhia hais li no “Nej sawv daws nyob kaj lug mog. Thov nej pab peb txhim tus choj nyob hauv kev sib tham, kev sib fim kom sawv daws tau nyob ua ke hauv txoj kev kaj siab lug mus li.”
Hnub chiv tim 11 lub 5 hlis tas los, ua ntej yuav hais zaj poj vaj nyob saum ntuj, Vaj Qhia Les Os 14 ntuas sawv daws koom siab thov Ntuj kom Tswv Ntuj txhib tsoom ntseeg los ua txoj kab xwm Leej Choj thiab coj lub neej qee rau Ntuj, kom lawv ua lub neej nyob hauv kev sib tsob hwb mas peb thiaj muaj cuab kav tshais ruam mus raws kev nyiam thiab qhov tseeb nyob hauv peb lub neej ntoj kev nyob hauv lub ntiaj teb no. Vaj Qhia Les Os 14 hais tias lub Koom Txoos vam txog cov Leej Choj thiab cov neeg qee lub neej rau Tswv Ntuj tshaj plaws, ntawm peb mas peb pab thiab lawv taug txoj kev Tswv Ntuj txhib lawv mus kom lawv nrhiav tau kev lees txais, kev mloog lus, kev txhawb siab thiab kom lawv pom tus qauv zoo nyob hauv lawv pab pawg.
Vaj Qhia Les Os 14 kuj nco txog Vaj Qhia Fas Ntshis Kus cov lus tau hais tseg nyob hauv hnub thov Ntuj rau Tswv Ntuj txhib siab tias Vaj Qhia Fas Ntshis Kus ntuas sawv daws kom txais cov hluas thiab ua lawv luag, ntawm peb mas peb thov Tswv Ntuj pab peb sawv daws kom coj tau lub neej sib tsob hwb, ib tug pab ib tug kom sawv daws ua neej nyob tau hauv txoj kev nyiam thiab qhov tseeb.
Vaj Qhia Les Os 14 kuj hais cov lus txhawb siab txog Tswv Ntuj kev txhib siab tias “Txhob ntshai! Kav tsij lees lub Koom Txoos thiab Huab Tais Pleev lo lus hu nej. Thov nkauj ntshiab Mab Liab tus tau txais txoj sia nyob mus li vim nws yeem mloog Huab Tais Tswv Ntuj txhib nws, ua peb luag nyob hauv kev raws Huab Tais Yes Xus qab.”
Tom qab teev Ntuj tas, Vaj Qhia Les Os 14 tseem hais cov lus thov kom tso tseg kev sib cov nyom nyob Ua Nkas Zis Nas, Nkas Ntxas, thiab ciam teb Is Ntias – Pas Kis Taas. Vaj Qhia hais tias “Niaj hnub no, tsov rog ntiaj teb zaum peb yog kev sib tua ib qhov zuj zus tuaj. Kuv thov cov thawj coj hauv lub qab ntuj no, kom txhob sib ntaus sib tua ntxiv.”
Vaj Qhia thov kom tso tsov rog pov tseg, kom sawv daws tig los tsim kev sib haum xeeb, kev ncaj ncees; yam li nyob Ua Nkas Zis Nas teb mas thov tseem hwv tso cov tub rog raug ntes rov mus lawv tsev, tso cov me nyuam rov mus nrhiav lawv niam lawv txiv; yam li nyob Nkas Ntxas mas thov lawv txhob sib tua ntxiv, kom sawv daws tau mus pab tsoom pej xeem raug xwv txheej raws li txoj kev sis nyiam sis hlub thiab thov kom tso cov neeg raug ntes rov qab; yam li nyob ntawm ciam teb Is Ntias thiab Pas Kis Taas mas Vaj Qhia xav kom ob tog nrhiav kev sib tham kom haum tas ob lub teb chaws thiaj tsis muaj kev puas ntsoog.
Dhau tej teb chaws li hais los no, tseem muaj kev sib cov nyom loj me nyob ntau thaj tsam, mas Vaj Qhia thiaj thov leej niam Mab Liab pab cev lub Koom Txoos cov lus thov rau Huab Tais Yes Xus thiab coj kev thaj yeeb tuaj pub rau lub ntiaj teb pom.
