Vaj Qhia Les Os 14 thawj lo lus qhia Ntuj kev cai yog lo tias 'kev nyiam tsis tas suav xam'.

Hnub tim 21 lub hli no, yog thawj hnub Vaj Qhia Les Os 14 tawm tuaj qhia Ntuj kev cai rau cov ntseeg tuaj mloog nws. Lub ntsiab hauv hnub no yog hais tias ‘Kev nyiam tsis tas suav xam’ (Love does not calculate).

Yav tas los, nyob hauv lis piam Hnub Plaub mas Vaj Qhia Fas Ntshis Kus tawm tuaj qhia Ntuj kev cai tsis tseg rau cov ntseeg tau kawm, Vaj Qhia Fas Ntshis Kus tab tom qhia txog ntu hais tias ‘Huab Tais Yes Xus Pleev yog peb chaw tso siab’ (Jesus Christ, Our Hope), ces Vaj Qhia Fas Ntshis Kus txawm tso ntiaj teb tseg lawm. Nyob hauv hnub tim 21 tas los no, Vaj Qhia Les Os 14 thiaj tawm tuaj qhia ntu no txuas mus. Vaj Qhia Les Os 14 xav txog Huab Tais Yes Xus zaj paj lug tus tseb nplej, mas Vaj Qhia pom tias Tswv Ntuj tsis tos kom peb ua thaj av zoo tshaj tso.

Vaj Qhia hais tias yog peb muab ua zoo saib mas yuav pom tias zaj paj lug tus tseb nplej yog zaj paj lug txawv dua cov; zaj paj lug no qhib rau peb pom tias Huab Tais Yes Xus ua zoo li cas los sib txuas lus, thiab pub tus lw tshaj lub Moo Zoo li cas rau peb taug.

Cov paj lug mas yog tej zaj tshwm sim nyob hauv peb lub neej, tiam sis txhua zaj paj lug muaj lub hom phiaj yog xav qhia tej yam tob tob rau tus mloog. Cov paj lug pab kom tus mloog thim xav thiab nrhiav tswv yim saib tus hais xav qhia dab tsi. Yog li mas Vaj Qhia thiaj kom sawv daws sim rov nug tus kheej tias “Nyob hauv zaj paj lug no, kuv nyob rau qhov twg?” thiab “Thaum kuv ntsia daim duab hais txog tus tseb nplej, kuv pom tias daim duab no qhia dab tsi rau kuv lub neej?”

Ntawm Vaj Qhia Les Os 14 mas nws pom tias nws pom Tswv Ntuj lub zog thiab yam Tswv Ntuj lub zog hloov tau yus lub neej. Vaj Qhia hais li no “Txhua lo lus hauv lub Moo Zoo piv tau rau cov noob nplej. Tus tseb nplej tseb cov noob li cas rau hauv daim teb, mas Huab Tais tseb nws Lo Lus zoo li ntawd rau hauv peb lub neej. Daim teb los thaj av mas tsis yog peb nruab siab xwb, tseem yog lub qab ntuj, yog pawg neeg, yog lub Koom Txoos. Hais tau tias tsis muaj ib qho me me hauv txoj sia uas lub Moo Zoo mus tsis txog. Peb pom tias tsoom sid tsis hais tus ua hauj lwm dab tsi, tus coj lub neej zoo li cas, lawv sawv daws tuaj mloog Huab Tais Yes Xus piav zaj paj lug no. Qhov no qhia rau peb paub tias Huab Tais Yes Xus cov lus yog pub rau txhua tus neeg, tab sis sawv daws tau txais tsis sib xws; tej tus khaws tau ntau ces nws txi txiv ntau, tej tus khaws tau tsawg mas nws txi txiv tsawg. Thaum peb paub li no lawm, peb thiaj yuav rho tau tej yam hauv zaj paj lug no los piv tau rau peb lub neej.

Pom ntxiv tias zoo li tus tseb nplej nws tsis quav ntsej txog cov noob nplej tias yuav poob rau thaj av zoo los phem, tawv los phom, do los fab. Qhov no yog ib lub cim qhia tias Tswv Ntuj hlub tas txhua tus neeg. Nyob hauv peb mas thaum peb yuav ua dab tsi, peb yuav muab coj lus suav xam thiab npaj zoo zoo tso mam nqes tes ua, tab sis txoj kev nyiam tsis ua hauj lwm zoo li ntawd.

Peb twb pom tias Tswv Ntuj hlub tas sawv daws tsis hais zoo los phem muaj los pluag, mas Tswv Ntuj thiaj tseb nws Lo Lus rau hauv sawv daws nruab siab. Txawm tias peb kub siab txais Lo Lus, los peb lam txais Lo Lus, los peb txais Lo Lus vim peb ntshai; li cas los Tswv Ntuj cia siab tias muaj ib hnub twg Lo Lus yuav txi txiv nyob hauv peb.

Tswv Ntuj tsis tos cia peb ua thaj av zoo tshaj tso, nws mam tseb Lo Lus lub noob rau hauv peb. Tswv Ntuj tseb nws Lo Lus tuaj rau peb hnub dhau hnub, txhua lub caij tsis tseg. Tswv Ntuj Lo Lus yog Huab Tais Yes Xus.”

Niaj hnub no nyob hauv Kas Ntxas mas txaus ntshai thiab txaus txhawj heev. Lub koom haum pab cuam kev txom nyem tshaj tias nyem no nyob Kas Ntxas teb, lub Leej Haum Kuj (UN) kev pab zaub mov tab tom ntsib xwv txheej, ntshai tsis ntev tom ntej no zaub mov yuav tsis txaus yug cov neeg nyob Kas Ntxas. Lawv hais tias nyob hauv hnub tim 20 lub 5 hlis,cov His Xas Lais rov tua Kas Ntxas dua tshiab ua rau muaj cov neeg Pas Les Tis Nas tuag coob ntxiv.

Txawm tias tseem hwv His Xas Lais tso cai rau cov tsheb xa kev pab mus pub rau cov pej xeem nyob hauv Kas Ntxas, tsis kav lawv kuj ua nruj kawg ces muaj tsawg tsawg lub tsheb thiaj nkag mus txog cov neeg txom nyem. Li ntawd, nyob tas qhov txhia chaw thiaj muaj neeg sawv los thov kom His Xas Lais tso tseg kev siv tub rog thiab txo lawv qhov ua nruj rau ntiaj teb kev pab cuam cov neeg txom nyem nyob Kas Ntxas. Vim li ntawd, tom qab qhia Ntuj kev cai rau cov tuaj mloog Vaj Qhia lus nyob hauv Leej Ntshiab Pob Zeb lub tshav puam tas, Vaj Qhia Les Os 14 thiaj li hais ntxiv tias “Kuv rov thov dua tshiab, thov kom tseem hwv tso cai rau lub koom haum pab cuam cov neeg txom nyem tau kev mus ua hauj lwm nyob hauv Kas Ntxas thiab thov kom tso tseg kev tsov rog uas ua rau tej me nyuam, tej laus, thiab tej neeg mob tsuas muaj tu siab.”

Tom qab ntawd, Vaj Qhia Les Os 14 tau nrog cov ntseeg tuaj fiv Ntuj tham, Vaj Qhia ntuas cov yog Leej Choj kom txhim lawv lub neej nyob saum Huab Tais Yes Xus thiab daim txiag zeb uas yog Huab Tais Yes Xus cov lus qhia, mas lawv thiaj yuav tshais ua cov neeg muaj lub siab tawv qhawv tshaj Ntuj Lus. Vaj Qhia Les Os 14 kuj hais rau cov Leej Phauj tias “Cov muam zoo nyiam, kuv koom nrog nej thov Ntuj kom Huab Tais Tswv Ntuj pub nej cov lus cog tseg txi txiv.”

Tseem tshuav cov pawg ntseeg, Vaj Qhia Les Os 14 hais li no rau lawv “Thov kom nej pheej xeeb raws nraim lub Moo Zoo, nej ua tus tseem neeg ntseeg nyob hauv nej tsev neeg thiab hauv txhua thaj tsam nej mus nyob.” Vaj Qhia lub tswv yim nco txog cov hluas, cov mob, thiab cov txij nkawm, ces Vaj Qhia xa lus rau lawv tias “Xav kom lawv zoo siab tsob hwb Tswv Ntuj thiab nyiam cov nyob ze lawv raws nraim li lub Moo Zoo qhia lawv.”