Cov Tswv Qhia As Xias yuav sib tuav xam txog cov hauj lwm yav tom ntej, nyob hauv lub rooj sab laj loj zaum tim 12 ntawm cov Tswv Qhia As Xias (FABC) nyob Jakarta.
Lub rooj sab laj zaum no yog lub Cheeb Koom Txoos Jakarta ua tus npaj nyob hauv lub tsev tos qhua Mulia Senayan. Sawv daws yuav tuav xam txog lub ntsiab lus ‘kev nqua hu kom tig los yuav lub siab tshiab raws lub pwm tsav txoj cai thiab cov hauj lwm hauv kev ua tus choj, thiab ua tus tuam coj nyob As Xias.’ Tau txais kev txhawb siab los ntawm Zam ntawv Moo Zoo zaj 1 qib 50. “Nej yuav pom tej yam loj dua no.”
Kev sab laj yuav qhib rau hnub tim 21 lub 7 hli no, hauv lub thaj txi Ntuj uas muaj Tswv Qhia Oswald Gracias tus sawv cev Vaj Qhia ua tus coj lub Txoos. Hnub tim 22 lub 7 hli, yog hnub ntawm kev thov Ntuj thiab kev rov xav txog, uas yog Tswv Qhia Tagle ua tus coj cov kab ke rov xav txog. Yog hais txog tus ntsuj plig ntawm lub pwm tsav, kev pauv ntxeev fab kev ntseeg thiab kev tuam choj txuas nrog kev sib raug zoo.
Dua li qhov seem ntawm kev sab laj, yuav tuav xam txog qhov tseeb hauv zej zog thiab kev pauv ntxeev ntawm lub ntiaj teb nyob As Xias. Yuav muaj lus tshwj xeeb, muaj kev sib tham hauv pab pawg, kev tuav xam hauv xeev ntuj thiab kev sib tham tej pab pawg me hais txog kev ua tus coj ntawm lub pwm tsav, kev sib koom tes fab kev ntseeg thiab lub Koom Txoos cov dej num hauv xeev ntuj no. Cov tuaj koom sab laj kuj yuav tau txais Vaj Qhia Leo 14 cov ntaub ntawv thiab.
Lub rooj sab laj yuav xaus rau hnub tim 26 lub 7 hli, uas yog xaus lub thaj txi Ntuj nyob hauv lub tuam tsev teev Ntuj Our Lady of Assumption nyob Jakarta. Dhau ntawd yuav muaj kev mus ncig tsham Islam lub tsev teev Ntuj Istiqlal uas nyob ze ntawd hauv kev phooj ywg. Yog lub Cim ntawm Is Ntos Nes Xias teb kev muab siab rau nrog lwm cov kev teev hawm sib haum xeeb.
Txiv Plig John Mi Shan tus lwm tswj kev sib xa xov hauv zej zog ntawm FABC hais tias : “Kev sab laj zaum no mus deb dua kev ntseeg.’
Nws hais tias : “Nov yog lub caij uas lub Koom Txoos As Xias tsim nyog yuav sib mloog, sib tuav xam ua ke thiab txuas hnub nyoog hauv kev tshaj lub Moo Zoo uas peb muaj ua ke.” Hauv kev ua tus thawj coj ntawm Radio Veritas Asia, nws yuav sib tham nrog lub rooj xov xwm ntawm lub Cheeb Koom Txoos Jakarta, thiab lub pwm tsav Tswv Qhia Kav Tos Liv nyob Is Ntos Nes Xias. Tswv Qhia Samson Shukardin uas nws yog tus thawj tswj cov Tswv Qhia Kav Tos Liv nyob Pakistan hais tias :
“Kev sab laj zaum no ua kom muaj qhov npaj cov hauj lwm qhia kev ntseeg sib luag thiab coj mus ua tau tiag nyob As Xias.” Yog qhov yuav pab txhawb nqa kev sib koom tes ntawm lub rooj Tswv Qhia, txhawb nqa cov tub ntxhais hluas kev ua tus coj thiab ua kom lub Koom Txoos As Xias muaj lub suab khov kho hauv kev txuag tib neeg kev ncaj ncees thiab kev thaj yeeb hauv kev ntseeg.
